Yesu Ovene Longi Mu Kuma Kia Mavua

Ekolo Yesu kedianga muna nzo ya Mfarisi, mafunda ma wantu mu kumvingila bena kuna mbazi. I diau mpe e ndonga yavanga kuna Ngalili. (Maku 1:33; 2:2; 3:9) Mwamu Yuda, ndonga izolele mona Yesu yo wá malongi mandi. Nswaswani ye dina Afarisi bavanga muna ntangw’a dia.

E diambu dina Yesu kevova, dina ye nsasa kwa alongoki andi, ovovele vo: ‘Nuyikenga ye mfuna ya Afarisi, i sia vo, umpuki.’ Yesu wavana kala lulukisu lwalu, kansi mana kamwene muna ntangw’a dia masongele vo kafwete vutukila longi diadi. (Luka 12:1; Maku 8:15) Nanga Afarisi bazolele songa vo nkangu befwilanga nkenda wau beswekanga o bi wau, kinga yau i wantu ambi ye bafwete tumbulwa. Dianu vo, Yesu ovovele vo: “Ke vena diambu ko diatoma swekama dilembi sengomonwa, ke vena mbumba ko ilembi zayakana.”—Luka 12:2.

Nanga e ndonga yizidi kwa Yesu, i esi Yuda ana ke bawidi ntete malongi ma Yesu ko vava kalongele muna Ngalili. Dianu vo, Yesu ovutukidi mambu masina kateka longa. Okasakese awonso bezidi wá, oku vo: “Ke nubamoni wonga ko, awana bevonda e nitu, yau ke bavangi diaka diambu diankaka.” (Luka 12:4) Nze una kateka vova, Yesu osongele vo alandi andi bafwete kwikila vo Nzambi okubalunga-lunga. Bafwete kwikila mpe muna Mwan’a muntu yo zaya vo Nzambi olenda kubasadisa.—Matai 10:19, 20, 26-33; 12:31, 32.

Vana vau, muntu mosi ovovele diambu dikuntokanesanga, oku vo: “E Nlongi, vovesa mpangi ame twakayana e vua.” (Luka 12:13) Muna Nsiku, mwasonama vo mwan’antete kafwete tambula kunku yole ya mavua, ozevo ke vafwete vaika ntantani ko. (Nsiku 21:17) Nanga o muntu ndioyo vua kwayingi kazolele katambula. Yesu kazolele kota mu diambu diadi ko, kuna ngangu zawonso oyuvuidi muntu ndioyo vo: “Nani untumbikidi kimfundisi yovo kimvambudi kia yeno wole?”—Luka 12:14.

I bosi, Yesu ovene longi kwa wantu awonso bena vo, ovovele vo: “Nutoma tala, nuyikenga ye loko diawonso, e kuma kadi, o muntu kana nkutu ulolo wa mavua kena mau, o moyo andi ke una muna mavua mandi ko.” (Luka 12:15) Kana nkutu vo muntu mavua mayingi kena mau, e lumbu kefwa, sisa kesisa mo. Muna songa o mfunu a diambu diadi, Yesu otele kingana kisonganga o mfunu wakuyivangila nkumbu ambote vana ndose a Nzambi.

Ovovele vo: “E mpatu za mvuama mosi zitomene yima mbongo. Oyantikidi yindula muna ntim’andi vo, ‘Aweyi mfwete vanga wau vo kina ye fulu kia lundila mbongo ame ko?’ I bosi, ovovele vo, ‘Edi ivanga: Ibangula malundilu mame, yatunga oma masundidi o nene, i muna nkutikila mbongo ame yawonso, ye lekwa yame yawonso yambote, i bosi, ivovesa moyo ame vo: “E moyo, lekwa yayingi yambote una yau ikubamene mu mvu miayingi; vunda kwaku, wadia, wanua, wamona kiese.”’ Kansi o Nzambi umvovese vo, ‘U zowa kwaku, o fuku wau o moyo aku katulwa ukukatulwa. Ozevo, e lekwa yoyo okubikidi, ya nani e?’ Diau adimosi yo muntu okuyilundilanga mavua, kansi ke mvuama ko kuna kwa Nzambi.”—Luka 12:16-21.

Alongoki a Yesu ye wantu akaka bewanga longi diadi, balenda mpe bua muna ntambu wa vava mavua mayingi. E ntokani za zingu zilenda mpe kubakakidila mu sadila Yave. Dianu vo, Yesu ovutukidi e diambu dina kavova muna Longi diandi vana Mongo, se mvu mosi ye ndambu uviokele kala.

Ovovele vo: “Nuyambula tokana mu kuma kia mioyo mieno, kana nki nudia, ngatu muna diambu dia nitu zeno, kana nki nuvuata. . . . Nubadika e ngono-ngono: Ke zikunanga ko, ngatu kutika; ke zina ye malundilu ko, kansi Nzambi odikilanga zo. Nga yeno ke nusundidi e nuni mfunu ko e? . . . Nubadika e mbena imenanga mvuma: Ke zifuntukanga ko, ngatu tunga nlele; kansi inuvovese wo vo, kana nkutu Solomo muna nkembo andi wawonso, kasidi vuatila nze imosi muna mvuma zazi ko. . . . Dianu vo, nuyambula tokana kana nki nudia, kana nki nunua, ngatu yangama ntima . . . Se dieno ozeye wo vo lekwa yayi nuvuidi o mfunu. . . . Nukwamanana vava Kintinu kiandi, ozevo e lekwa yayi ikunukudikilwa.”—Luka 12:22-31; Matai 6:25-33.

Aki nani besinga vava Kintinu kia Nzambi? Yesu osongele vo lutangu lwakete kaka lwa akwa kwikizi, i sia vo “fikambi-kambi,” yau bekala wo vanga. Kuna kwalanda diasengomonwa vo lutangu lwau 144.000. Nkia vuvu bena kiau? Yesu wabavana vuvu eki: “I luzolo lwa Se dieno kanuvan’e Kintinu.” Oyau ke bekuyifuntuna mu vava mavua ma nza yayi ko, mana e mivi balenda yiya. E ntima miau mikala muna “lusalu luna ke lusuka ko kuna zulu,” kuna beyadila kumosi yo Kristu.—Luka 12:32-34.