Salu Kia Yesu Muna Pereia

Yesu mu longa kena yo wuka mbevo muna Yuda ye muna Yerusaleme. I bosi, osaukidi Nkoko a Yodani kimana kenda longi mu mbanza za mvivu mia Pereia. Kansi ke zingila ko, kimana kavutuka muna Yerusaleme.

O Yesu wau kena muna Pereia, muntu mosi unyuvuidi vo: “E Mfumu, nga akete kaka bevuluzw’e?” Nanga o muntu ndioyo ozeye wo vo, mfumu za mabundu tantana betantananga kana vo wantu ayingi bevuluzwa yovo akete kaka. Vana fulu kia vova kana wantu nkwa bevuluzwa, Yesu ovovele dina wantu bafwete vanga muna vuluzwa. Yesu ubavovese vo: “Nusiamanana kotela muna mwelo ambatakani.” Kieleka, ngolo divavanga muna wo vanga. Ekuma? Yesu ovovele vo: “Inusamunwini vo, ayingi bevava mo kotela, kansi ke belenda ko.”—Luka 13:23, 24.

Muna songa o mfunu wa vanga e ngolo, Yesu otele kingana kimosi, ovovele vo: “O mfumu a nzo avo otelamene yo zika e kielo, oyeno nwatelama vana mbazi yo dodela kielo, yo vova vo, ‘E Mfumu, utuziulwila.’ . . . Kansi okunuvutula vo, ‘Kizeye kwame ko kuna nutukidi. Nukatuka ova ngina, yeno awonso avangi a umpumbulu!’”—Luka 13:25-27.

E kingana kiaki kisongele mfwilu mia muntu osukinini, wau kalweke muna ola ina kazolele, owene mwelo wakangama. Diavavanga vo kalwaka mu ola yambote, kana nkutu vo diampasi kwa yandi. I diau mpe e ndonga yadi vanga muna vua e nluta mia malongi ma Yesu muna Pereia. Bavidisa e lau diakitula nsambila yaludi se diambu disundidi o mfunu muna zingu kiau. Ndonga muna nkangu una Yesu kayizila, ke batambula ko e nkubik’a Nzambi muna luvuluzu lwau. Yesu ubavovese vo, ‘bebokomoka ye dilu yo kwetesa meno mau’ vava bevaikiswa kuna mbazi. Yesu ovovele vo: “Kwiza bekwiza ana betuka kuna este ye weste, kuna node ye sude,” kieleka, muna zula yawonso, “bevuanda kuna meza muna Kintinu kia Nzambi.”—Luka 13:28, 29.

Yesu osasidi vo: “Vena ye awana basukinini [i sia vo, zula ina vo ke Ayuda ko kumosi mpe ye Ayuda ana babundunwanga] yau bevita, ye ana bavitidi [i sia vo, mfumu za dimbundu dia Ayuda ana bekuyisananga vo yau i mbongo ya Abarayama] yau besukinina.” (Luka 13:30) “Besukinina,” disongele vo, o nkangu wau ulembi tondanga, ke ukota mu Kintinu kia Nzambi ko.

I bosi, Afarisi bezidi kwa Yesu, banlukisi vo: “Vaika, wakatuka mwamu, kadi o Erodi ozolele kuvonda.” Nanga Ntinu Erodi yandi kibeni wamwanga e nsangu zazi kimana Yesu kakatuka mu zunga kia Pereia. Erodi wonga kakala wau, nanga obwa muna nkanu wavondesa diaka ngunza yankaka wauna kavanga vava kavondesa Yoane wa Mvubi. Kansi, Yesu ovovese Afarisi vo: “Nwenda samunwina mfwenge yayina vo, ‘Omono ivaikisa nkuya yo wuka mbevo, o unu yo mbazi, muna lumbu kietatu ifokola.’” (Luka 13:31, 32) Yesu oyikidi Erodi vo “mfwenge,” nanga muna songa e ndekwa zambi kekalanga zau e bulu kiaki. Kansi o Yesu ketuminwa kwa Erodi ko yovo kwa muntu ankaka. Osala e salu kina o Se diandi kamvana, olanda e nkubika za Nzambi ke za wantu ko.

Kuna kwalanda Yesu wele kuna Yerusaleme, kadi ovovele vo: “ke dilendi vangama ko vo ngunza kavondelwa kuna mbazi a Yerusaleme.” (Luka 13:33) Ke vena ungunza wa Nkand’a Nzambi ko uvovanga vo Masia mu Yerusaleme kefwila. Ozevo, ekuma Yesu kavovele vo mûna kevondelwa? E kuma kadi Yerusaleme i vula dia sina, i mwau mwina Sanedina yovo mbazi a nkanu anene ya Ayuda, ina ye 71 lwa afundisi, i muna mufundisilwanga ngunza za luvunu. I mwau mpe muvaninwanga tukau twa bulu. Muna diadi Yesu obakwidi vo kalendi fwila fulu kiankaka ko.

Yesu oniongene, oku vo: “E Yerusaleme, e Yerusaleme, on’ovondanga e ngunza, yo tubila awana katuminu o matadi, nkumbu nkwa yazolele konka o wan’aku nze una e nsusu ikonkelanga o wan’andi kuna nsi a mave! Kansi, oyeno ke nwazola wo ko. Tala, e nzo eno ibembwelo kwa Nzambi.” (Luka 13:34, 35) Ayuda babembwele Mwan’a Nzambi, ediadi mfwilu dikubatwasila.

Vitila Yesu kenda kuna Yerusaleme, o mfumu a Afarisi umbokele kenda dila muna nzo andi muna lumbu kia Vundu. Ana babokeleso bazolele mona nkia diambu o Yesu kevanga mu kuma kia muntu mosi una ye kimbevo kia sulu (kimbevo kiwutisanga maza mu malu). Yesu oyuvuidi Afarisi ye ana batomene zaya Nsiku vo: “Nga diansongi mu wuka muna lumbu kia Vundu yovo ve?”—Luka 14:3.

Ke vena muntu ko umvene e mvutu. Yesu owukidi muntu ndioyo, i bosi oyuvuidi vo: “Nani vovo nwina, avo mwan’andi yovo ngombe ikobokele muna sima, vana vau kalembi kuntombola muna lumbu kia Vundu?” (Luka 14:5) Ke balendele kumvana mvutu ko mu kuma kia ngindu zandi za nkuma.