Toma Yindula Yo Sadila Ngangu Zaku

E kingana kia mwana wavila kina o Yesu katele, kisivikisi avakulwisi a mpaku, asoneki ye Afarisi, vava bawidi vo Nzambi una yo luzolo lwa loloka asumuki bevilukanga o ntima. (Luka 15:1-7, 11) Owau Yesu mu mokena kena ye alongoki andi. Ubatelele kingana kiankaka, kingana kia vuama mosi wakala ye selo kiafwasidinge mavua mandi.

Yesu ovovele vo selo kiaki wafundwa kwa mfumu andi vo mavua mandi kafwasidinge. Dianu vo, o mfumu obakidi nzengo vo selo kiaki kafwete katuka mu salu. I bosi, selo ukiyuvuidi vo: “Aweyi mvanga, wau vo mfumu ame katula kekunkatul’o uselo? Kina ye ngolo zavatila ko, o lomba nsoni imwena ko. Nzeye dina mvanga, kimana wantu bantambula muna nzo zau avo nkatwilu uselo.’ Obokele e mindia-mfuka mia mfumu andi, mosi-mosi; ovovese ona wantete vo, ‘Ntalu kwa wadia kwa mfumu ame?”—Luka 16:3-5.

Wantete ovovele vo: “Nkam’a nzongo mia mazi ma olive,” i sia vo, 2.200 za litro. O muntu ndioyo nanga mazi ketekanga yovo mpatu za olive kena zau. Selo umvovese vo: “Tambula nkand’aku a mfuka, vuanda, wasoneka-soneka 50, [i sia vo, 1.100 za litro].”—Luka 16:6. 

Selo ovovese wankaka vo: “Ntalu kwa wadia?” Ovovele vo, “Nkam’a nzongo mia masa.” Selo umvovese vo: “Tambula nkand’aku a mfuka wasoneka 80.” Unkatwidi nzongo 20.—Luka 16:7.

Selo ndioyo yandi una ye mbebe ya lunda e nzimbu za mfumu andi. Wina mpe ye wisa kia kulula mfuka za wantu. Muna kulula e mfuka zau, selo ovangidi yau kikundi, kadi dilenda kunsadisa avo okatwilu mu salu.

Kuna kwalanda, mfumu andi owidi mana mavangamene. Dina e selo kavangidi ditwese mfwilu kwa mfumu andi. Kana una vo i wau, o mfumu unsivikidi yo kunsanisina, e kuma kadi “kasongele unsongi ko,” kansi otomene sadila e “ngangu zandi.” Yesu ovovele vo: “O wan’a tandu kiaki baviokele mbandu au o lungalala ke mu wan’a ntemo ko.”—Luka 16:8.

Yesu kasanisini ngangu zambi za selo kiaki ko, ngatu kasakesa wantu bavunginikanga akwau muna yinkita. Ozevo, nkia diambu o Yesu kazolele longa? Yesu okasakese alongoki andi vo: “Nuyivangila yikundi muna umvuama wa vilwa kimana avo usukidi, banutambula muna nzo za mvu ya mvu.” (Luka 16:9) Yesu olongele vo tufwete toma yindulanga yo toma sadila e ngangu zeto. Selo ya Nzambi, i sia vo, “wan’a ntemo,” bafwete sadila mavua mau kuna ngangu, yo lembi vilakana e vuvu kia moyo a mvu ya mvu kuna sentu.

Yave wa Nzambi kaka yo Mwan’andi balenda tambula muntu muna Kintinu kia zulu yovo muna Paradiso ova ntoto muna luyalu lwa Kintinu. Oyeto mpe tulenda kala se akundi a Yave yo Yesu avo tusadidi mavua meto muna yikama e Kintinu kia Nzambi. Avo tuvangidi wo, e zingu kieto kia kusentu kikala kiasikila vava e wolo, palata ye mavua mankaka ke mekala diaka mfunu ko mu nza yayi.

Yesu ovovele diaka vo awana bena ye kwikizi muna lunga-lunga yo sadila lekwa yantalu yovo mavua bena mau, besonga mpe kwikizi muna lunga-lunga e lekwa isundidi o mfunu. Dianu vo, Yesu ovovele vo: “Avo nukondelo kwikizi muna umvuama wa vilwa, nani okunuyekeka owu waludi [nze mambu ma Kintinu]?”—Luka 16:11.

Yesu osongele alongoki andi vo mayingi bafwete lungisa avo bazolele tambulwa “muna nzo za mvu ya mvu.” O muntu kalendi kala selo kia Nzambi ko ye vana vau mbundu a umvuama wa vilwa. Yesu ofokwele e moko kiandi mu mvovo emi: “Ke vena selo ko kilenda sadila mfumu zole, kadi omenga mosi yo zola wankaka, yovo otatidila mosi yo bembola wankaka. Ke nulendi sadila Nzambi ye Umvuama ko.”—Luka 16:9, 13.