LONGI DIA 46
Ekuma Ofwete Kukiyekolwela kwa Nzambi yo Vubwa?
Muntu oyekolanga zingu kiandi kwa Yave, vava kesianga nsilu muna sambu vo Yave kaka kesambila yo sia luzolo lwa Nzambi va fulu kiantete muna zingu kiandi. (Nkunga 40:8) I bosi, ovubwanga mu songa kwa akaka vo ukiyekwele kwa Yave. E nzengo za kukiyekola kwa Yave, i nzengo zisundidi mfunu o muntu kalenda baka muna zingu kiandi. E nzengo zazi zilenda soba e zingu kiaku. Adieyi dilenda kufila mu baka nzengo zazi?
1. Adieyi difilanga muntu mu kukiyekola kwa Nzambi?
O zola kukutufilanga mu yekola zingu kieto kwa Yave. (1 Yoane 4:10, 19) Bibila kivovanga vo: “Zola Yave wa Nzambi aku muna nsi a ntim’aku wawonso, muna moyo aku wawonso, muna nyindu aku wawonso ye muna ngolo zaku zawonso.” (Maku 12:30) Tusonganga vo tuzolanga Nzambi muna mambu tuvovanga yo vanga. Nze una wantu wole betoma zolananga bebakilanga nzengo za kazala, o zola kweto muna Yave kukutufilanga mu yekola zingu kieto kwa yandi yo vubwa.
2. Nkia nsambu Yave kevananga kwa awana bavubwanga yo kituka Mbangi zandi?
Avo ovubilu, okota muna kanda dia Yave, okusonga o zola kwandi mu mpila zayingi, ongeye mpe otoma kumfinama. (Tanga Malaki 3:16-18.) Vana ntandu, wau vo Yave okituka Se diaku, okota muna kintwadi kia wan’a ngudi, i sia vo, kintwadi kia ampangi mu nza yawonso, ana bezolanga Yave yo kuzola mpe. (Tanga Maku 10:29, 30.) Kansi, vitila wavubwa vena ye mambu ofwete lungisa. Ofwete longoka mambu ma Yave, kunzola yo kwikila muna Mwan’andi. I bosi, ofwete yekola e zingu kiaku kwa Yave. Avo ovangidi mambu mama yo vubwa, okala ye lau dia zinga yakwele mvu. E Diambu dia Nzambi divovanga vo: ‘O luvubu . . . lukunuvuluzanga mpe owau.’—1 Petelo 3:21.
ZAYA DIAKA MANKAKA
Tala e kuma dinina diamfunu kwa ngeye wakiyekola kwa Yave yo vubwa.
3. Tufwete sola kana nani tusadila
Kuna nz’ankulu, akaka muna nkangu a Isaele bayindulanga vo balenda sambila Yave kumosi yo Bale wa nzambi aluvunu. Kansi, Yave watuma Eliya wa ngunza andi kasingika ngindu zau zabendomoka. Tanga 1 Ntinu 18:21, i bosi, vana e mvutu za kiuvu eki:
Nkia nzengo Aneyisaele bafwana baka?
Nze Aneyisaele, yeto mpe tufwete baka nzengo kana nani tusadila. Tanga Luka 16:13, i bosi, vana e mvutu za yuvu eyi:
Wantu ankaka beyindulanga vo balenda sambila Yave yo sambila mpe muntu yovo lekwa yankaka. Ekuma diadi ke dilendakena ko?
Aweyi tulenda songela kwa Yave vo yandi kaka tusolele sambila?
4. Yindula e mpila Yave kekuzolelanga
Yave tukau twayingi kekutuvananga. Oyeto nki tulenda kumvana? Tala e VIDEO.
Aweyi Nzambi kesongelanga vo zola kekuzolanga? Tanga Nkunga 104:14, 15 ye 1 Yoane 4:9, 10, i bosi, vana e mvutu za yuvu eyi:
Nkia tukau Yave kavana otoma zolanga?
Aweyi omonanga mu kuma kia Yave wau kavana tukau twatu?
Vava tutambulanga lukau tutomene yangalela, tuvutulanga matondo kwa muntu utuvene lo. Tanga Nsiku 16:17, i bosi, vana e mvutu za kiuvu eki:
Vava oyindulanga mawonso Yave kevanganga muna wete diaku, ediadi dikufilanga mu vanga nkia diambu?
5. Kukiyekola kwa Nzambi nsambu zayingi ditwasanga
Wantu ayingi bekwikilanga vo, otoma zayakana, kala ye salu kiambote ye nzimbu zayingi, kiese kikilu ditwasanga. Nga ediadi dialudi? Tala e VIDEO, i bosi, vana e mvutu za yuvu ilende.
Kanele vo mpangi muna video wazolanga tá somba, ekuma kayambulwila dio?
Wabaka nzengo za kukiyekola kwa Yave vana fulu kia kwamanana tá somba. Adieyi obenze, nga nzengo zambote kabaka? Ekuma?
Vitila Paulu wa ntumwa kakituka Nkristu, wakala ye lau dia kala ye salu kia tunda. Walongwa nsiku a Kiyuda kwa nlongi watoma zayakana. Kansi, wayambula mawonso mu kituka Nkristu. Nga Paulu wakibanza? Tanga Filipi 3:8, i bosi, vana e mvutu za yuvu eyi:
Ekuma Paulu kayikila mana kavanga vitila kakituka Nkristu vo “titi” yovo mbole?
Nkia nsambu katambula?
Nga obenze vo e zingu kiaku toma kitoma avo obakidi nzengo za sadila Yave? Ekuma?
Vava Paulu kakituka Nkristu, watambula nsambu zayingi lutila mambu kabembola
AVO MUNTU UVOVESE VO: “Nzeye wo vo ekiaki i ludi, kansi kina ye kani dia vubwa ko.”
Adieyi obenze, nga diamfunu mu yekola zingu kiaku kwa Yave?
MAMBU MASINA MA LONGI DIADI
O zola kukutufilanga mu kukiyekola kwa Yave yo vubwa
Nkia Mambu Olongokele?
Ekuma Yave kafwanukini zola kweto kwa nsi a ntima ye nsambil’eto?
Aweyi Yave kesambulwilanga selo yandi yavubwa?
Nga ozolele kukiyekola kwa Yave?
TALA MPE OMA MALENDE
Tala e kuma nyimbidi mosi yo muntu mosi wazolanga tá somba babakila nzengo za kukiyekola kwa Yave.
Yuvu Beyuvulanga Aleke—Adieyi Ivanga Muna Zingu Kiame?—Mpil’a Zingu Bakala Kiau (6:54)
Tala mambu mankaka mafwete fila muntu muna kukiyekola kwa Nzambi.
“Ekuma Ofwete Kiyekolwela kwa Yave?” (Eyingidilu dia 15 Yanuali, 2010)
Muna video yayi, tala kiese bemonanga awana bakiyekola kwa Yave.
Muna zaya dina diafila nkento mosi mu fimpulula mambu kasianga vana fulu kiantete muna zingu kiandi, tanga lusansu, “Eu me Perguntava ‘Por que Estamos Aqui?’”
“A Bíblia Muda a Vida das Pessoas” (Eyingidilu dia 1 dia Novemba, 2012)