Kingana Kia Mina Kumi

Kana una vo Yesu ku Yerusaleme kekwendanga, kansi yandi ye alongoki andi bakinu muna nzo a Zakai. O Yesu ozeye wo vo “Kintinu kia Nzambi kisikidiswa,” yandi kibeni okala se Ntinu. (Luka 19:11) Alongoki kebabakwidi diambu diadi ko, nze una balembele bakulwila vo Yesu fwa ke fwa. Muna diadi, Yesu otele kingana muna kubasadisa babakula vo Kintinu ke kikwiza mu ntangwa yayi ko.

Yesu ovovele vo: “Nkwa tunda wayenda kuna nsi anda, kimana kayadikwa kintinu, i bosi kavutuka kwandi.” (Luka 19:12) O nkangalu wa mpila yayi, ola zayingi wadia. E diadi disongele vo, Yesu i “Nkwa tunda wayenda kuna nsi anda,” kuna zulu, kuna o Se diandi ke kumvanina e kimfumu.

Muna kingana, vitila o ‘Nkwa tunda kenda kuna nsi yandá,’ obokele ntaudi kumi, ubavene mina imosi ya palata, ubavovese vo: “Nwenda zo kitila kweno yavana nkwiza.” (Luka 19:13) Mina imosi ya palata ntalu ayingi ifwanga, Ilenda tezaneswa ye zimbu zifutwanga kwa mvanti a sengo, mu ngonde tanu.

Nanga alongoki babakwidi vo bena nze ntaudi kumi muna kingana, kadi o Yesu ubatezanese kala ye akutiki a mbongo muna mpatu. (Matai 9:35-38) Dialudi vo, Yesu kabalombele ko beza ye mbongo ina bakutikidi. Kansi e salu kia kutika kisadisi mpe akaka mu kituka se alongoki yo baka e fulu muna Kintinu kia Nzambi. Alongoki besadilanga salanganu ya mpila mu mpila mu sadisa ndonga mu kala se avingidi a Kintinu.

Nkia mambu diaka o Yesu kasengomwene muna kingana kiaki? Yesu ovovele vo esi nsi andi “bansawidi, [nkwa tunda] bantumini akunzi, oku vo, ‘Ke tuzolele ko vo muntu ndioyo katuyala.’” (Luka 19:14) Alongoki bazeye wo vo Ayuda ke batambwidi Yesu ko, akaka muna yau bazolele nkutu kumvonda. Kunima lufwa lwa Yesu ye ngiend’andi kuna zulu, Ayuda ayingi bayantika bangika alongoki muna songa vo ke bazolanga Yesu ko. Ntantu miami misongele vo ke bazolele ko vo Yesu kakala se Ntinu.—Yoane 19:15, 16; Mavangu 4:13-18; 5:40.

Aweyi ntaudi kumi basadidi e mina yau yavana “nkwa tunda” ketambula “kintinu” yo vutuka? Yesu ovovele vo: “Una kayadikwa e kintinu, ovutukidi, obokele ntaudi zandi, zina kavana e nzimbu, kazaya kana nkia nluta babakidi. Ona wantete wizidi kuyisunzula, oku vo, ‘E Mfumu, e mina aku, mina kumi ilutidi.’ Umvovese vo, ‘Otomene sala, u ntaudi ambote! Wau vo osongele kwikizi muna diambu diandwelo, ovua wisa kia mavata kumi.’ Ona wanzole wizidi, oku vo, ‘E Mfumu, e mina aku, mina tanu ilutidi.’ Umvovese diau adimosi, ‘Ongeye mpe okala ye wisa kia mavata tanu.’”—Luka 19:15-19.

Avo alongoki babakwidi vo bena nze ntaudi zina zavanga mawonso balenda muna sadisa wantu bakituka se alongoki, balenda kala ye vuvu vo Yesu otoma yangalala. Balenda kala mpe ye vuvu vo Yesu okubasenda muna salu kiau. Dialudi vo, alongoki a Yesu ke yau awonso ko bena ye zingu yovo malau ngatu ngangu zafwanana. Kansi o Yesu ona “watambula kintinu,” osinga bakula e nswaswani yayi yo sambula e ngolo zau ye kwikizi kiau muna salu kia kitula wantu se alongoki.—Matai 28:19, 20.

Kansi, tala una Yesu kafokokwele kingana kiandi. Ovovele vo: “Kansi, wankaka wizidi, oku vo, ‘E Mfumu, tala mina aku, ina yalunda vana nlele. Wonga imwenene, kadi u nkwa ntim’ambadi; obonganga ina kulundidi ko, okutikanga ina kukunini ko.’ O Mfumu umvovese vo, ‘Muna mvovo miaku ikufundisila, u ntaudi ambi. Ozeye wo kwaku vo mono i nkwa ntim’ambadi, ibonganga ina kilundidi ko, ikutikanga ina kikunini ko. Ekuma walembi tambikila nzimbu zame kw’akiti? Ozevo, wau ngizidi, nga ntambwidi e nzimbu zame ye nluta.’ “Ovovese ana batelamene vavana vo, ‘Numbonga e mina, nuvana yo kwa ndiona wina ye mina kumi.’”—Luka 19:20-24.

Wau vo ntaudi ndioyo kazolele sala ko muna vuatumuna o mavua ma kintinu kia mfumu andi, ntaudi ndioyo mfwilu kabakidi. Alongoki mu yindula bena o luyalu lwa Yesu muna Kintinu kia Nzambi. Dilenda kala vo mana Yesu kavovele mu kuma kia ntaudi yansuka masadisi alongoki bazaya vo, avo ke bena yo vema ko, ke bevua fulu ko muna Kintinu kia Nzambi.

E mvovo mia Yesu misadisi alongoki andi akwikizi mu kudikila e ngolo. Yesu ofokwele muna mvovo emi: “Inusamunwini vo, konso ona una ye lekwa, yayingi kevewa, kansi ndiona kena ye lekwa ko, kina kena kiau nkutu, katulwa kikunkatulwa. Yesu ovovele diaka vo atantu andi, ana ke bazolele ko vo “yabayala,” vondwa bevondwa. Vava kavovele mambu mama, oviokele kuna ntwala, wele atomboki kuna Yerusaleme.”—Luka 19:26-28.