Yesu Otayidi Vava Kalekelo Ntambu

Mfumu za mabundu bafungidi Yesu makasi. Kadi otele kingana kisenzekele o bi wau. Afarisi bavuende e mfulu kimana banlekela o ntambu. Bazolele vo Yesu kavova diambu dina oyau bekumfundila kwa nguvulu a Roma. Bafutidi mpe nzimbu kwa akaka muna alongoki au kimana banlekela o ntambu.—Luka 6:7.

Afarisi bezidi kwa Yesu, bavovele vo: “E Nlongi, tuzeye wo vo otoma vovanga yo longa, kutalanga ndose ko, muna ludi olongelanga nzil’a Nzambi: Nga diansongi kwa yeto dia futa e mpaku kwa Kaisa yovo ve?” (Luka 20:21, 22) Yesu kabakamene mu mvovo miau mia malengo ko. Kadi otomene wo zaya vo Afarisi bazala yo luvunu ye ngangu zambi. Avo Yesu ovovele vo, ‘Ke diansongi ko mu futa e mpaku,’ balenda kumfundu vo wantu kena vukumana batelamene luyalu lwa Roma. Kansi avo ovovele vo, ‘Diansongi mu futa e mpaku,’ o nkangu wau uyalwanga kwa Roma ulenda kunyindulwila e mbi yo kumvavila o mambu. Ozevo, o Yesu nkia mvutu kevana?

Yesu ubavovese vo: “Akwa kivunina, ekuma nuntontele? Nunsonga e nzimbu zina nufutilanga e mpaku.” Bantwasidi denali imosi. Ubayuvuidi vo: “E fwaniswa ye sono yayi yanani e?” Bavutwidi vo: “Ya Kaisa.” Ubavovese vo: “Ozevo, nuvana kwa Kaisa ina ya Kaisa, kwa Nzambi ina ya Nzambi.”—Matai 22:18-21.

E mvovo mia Yesu misivikisi Afarisi. Yesu ubakangidi o nua muna mvutu zandi. I bosi, Afarisi bele kwau. Kansi o kuma ke kwafwidi ntete ko, Afarisi bakinu kaka ye ngindu za kunlekela o ntambu. Wau vo Afarisi ke balendele diambu ko, mfumu za mabundu bezidi kwa Yesu.

I Asaduki. Oyau bevovanga vo ke vena yo lufuluku ko. Babundumwini e moko kia lufuluku ye longo lwa kinkwezi. Bayuvuidi Yesu vo: “E Nlongi, Mose wavova vo: ‘Avo muntu ofwidi lembi wuta wana, o nleke andi kafwete bonga nkaz’a mpangi andi kimana kanwutila e mbongo.’ Vakala mpangi nsambwadi vava twina. Ona wantete osompele yo fwa lembi wuta wana, osisidi nkaz’andi kwa nleke andi. I diau mpe diavangama kwa ndiona wanzole, ona mpe wantatu yamuna ndiona wansambwadi. I bosi, o nkento mpe ofwidi. Ozevo, muna lufuluku, nkento a nani kekala muna yau nsambwadi e? Kadi yau awonso bambonga se nkaz’au.”—Matai 22:24-28.

Yesu oyinduidi o mambu masoneka Mose, mana Asaduki bekwikilanga, ovovele vo: “Nga ke diau ko nwavidila, wau nulembele zaya e Sono ngatu nkum’a Nzambi e? Kadi vava befuluka muna mafwa, akala ke besompa ko ngatu akento basompeswa, kansi bekala nze ambasi kuna zulu. Muna diambu dia mafwa, mana mefuluka, nga ke nwatanga wo ko muna nkand’a Mose, o lusansu lwa nti walemanga, vava Nzambi kamvovesa vo: ‘Omono i Nzambi a Abarayama, Nzambi a Isaki ye Nzambi a Yakobo e’? Oyandi ke Nzambi a mafwa ko, kansi Nzambi y’awana ben’o moyo. Nwavila kikilu.” (Maku 12:24-27; Luvaiku 3:1-6) E ndonga isivikidi e mvutu za Yesu.

Yesu okangidi kala e nua mia Afarisi ye Asaduki, kansi owau e mfumu za mabundu bakutakene mu tonta diaka Yesu. Mosi muna asoneki oyuvuidi Yesu vo: “E Nlongi, nkia nkanikinu i wanene muna Nsiku?”—Matai 22:36.

Yesu ovutwidi vo: “Wantete i wau wuwu, ‘Wa, e Isaele, Yave wa Nzambi eto i Yave mosi kaka, zola Yave wa Nzambi aku muna nsi a ntim’aku yawonso, muna kiwuntu kiaku kiawonso, muna nyindu aku wawonso ye muna ngolo zaku zawonso.’ Wanzole i wau wuwu, ‘Zola nkw’aku wauna okuyizolelanga.’ Ke vena nkanikinu wankaka ko usundidi miami.”—Maku 12:29-31.

Vava bawidi e mvutu, nsoneki mosi ovovele vo: “E Nlongi, otomene vova ludi, ‘Yandi Mosi, ke vena wankaka ko, yandi kaka’; yo kunzola muna nsi a ntima yawonso, muna zayi wawonso, muna ngolo zawonso yo zola nkw’aku wauna okuyizolelanga, i disundidi yimenga yawonso yangioka ye tukau.” O Yesu wau kabakwidi vo, o nsoneki ndioyo kuna ngangu kavutulwidi, umvovese vo: “Ofinamene muna Kintinu kia Nzambi.”—Maku 12:32-34.

Yesu olongele muna tempelo mu lumbu tatu (kia 9, 10, ye 11 kia ngonde a Nisani). O wantu ankaka, nze nsoneki ndioyo bewanga malongi ma Yesu ye sungididi. Kansi ke mfumu za mabundu ko, kadi owau ke bena yo “unkabu wa kunyuvula diambu ko.”