Kala Nkundi a Nzambi Yakwele mvu!

Ngolo divavanga muna vwa nkundi; ye ngolo divavanga muna zingisa kikundi. E ngolo ovanga mu kala ye kikundi yo Nzambi yo zingisa kio, zisambulwa kikilu. O Yesu wavova kw’awana bekwikilanga muna yandi: “E ludi [kikunuvevola, NW].” (Yoane 8:32) Aweyi disongele ediadi?

Olenda vevoka owau. Olenda vevoka muna malongi ma luvunu yo tuvunu kesayanesanga Satana. Olenda vevoka mu kondwa e vuvu kuzele kwa mazunda ma wantu ana ke bazeye Yave ko. (Roma 8:22) Akundi a Nzambi bevevokanga nkutu muna “wonga wa fwa.”—Ayibere 2:14, 15.

Olenda vwa luvevoko muna nz’ampa ya Nzambi. Ekwe luvevoko olenda vwa kuna ntwala! Muna Paradiso ova ntoto, vekala luvevoko muna vita, lwa mayela, yo umpumbulu. Luvevoko muna usukami ye nzala. Luvevoko lwa kinunu ye lufwa. Luvevoko lwa wonga, yo lubangamu, yo kondwa kwa unsongi. O Nkand’a Nzambi uvovanga mu kuma kia Nzambi vo: “Obundula koko kwaku, Yo yukutisa kinzola-nzola kia mioyo miawonso.”—Nkunga 145:16.

Akundi a Nzambi bezinga yakwele mvu. O moyo a mvu ya mvu i lukau luantalu kevana o Nzambi kwa awonso bevavang’o kala akundi andi. (Roma 6:23) Se badiki, moyo a mvu ya mvu, aweyi disongele kwa ngeye!

Ovwa e ntangwa ya vanga mambu mayingi. Nanga ozola longoka sika masikilu. Yovo zola longoka vanga e quadro za foto yovo salu kia mvadi a nti. Nanga ozola longoka oma ma bulu yovo ma nti. Nanga ozola kangala wa zaya nsi yo wantu a mpila mu mpila. Ovo ovwidi o moyo a mvu ya mvu olenda vanga mawonso mama!

Ovwa e ntangwa ya kala ye akundi ayingi. Wau ozinga yakwele mvu ozaya ndonga ya wantu akaka ana bakituka akundi a Nzambi. Ozaya o umbangu wau ye fu yau yambote, oyau mpe bekala akundi aku. Okubazola, oyau mpe bekuzola. (1 Korinto 13:8) Wau ovwa moyo ulembi suka dikusadisa mu kala nkundi a konso muntu ova ntoto! Edi disundidi o wete e kikundi kiaku yo Yave kiwokela kaka ekolo e tandu iviokanga. Yambula wakala nkundi a Nzambi yakwele mvu!