O Se Diau Nani, Abarayama Yovo Nkadi Ampemba?

Yesu wakinu kaka muna Yerusaleme mu kuma kia Nkinzi a Saba (yovo Sudi), mu longa kena mambu mamfunu. Akaka muna Ayuda ana bena muna nkinzi, bavovele vo: “Oyeto tu mbongo ya Abarayama, ke twabundunwa nkutu kwa muntu ko.” Yesu ovutwidi vo: “Nzeye wo vo nu mbongo ya Abarayama. Kansi oyeno nuzolele kumponda, e kuma kadi, e diambu diame ke disikilanga omo yeno ko. Mana yamona kwa Se diame, i nsamunanga, kansi oyeno mana nwawá kwa se dieno, i nuvanganga.”—Yoane 8:33, 37, 38.

Yesu ubasongele vo o Se diandi waswaswana yo se diau. Ayuda ke babakwidi mvovo mia Yesu ko, bavovele diaka vo: “O se dieto, Abarayama.” (Yoane 8:39; Yesaya 41:8) Yau kikilu i mbongo ya Abarayama. I dianu bebanzilanga vo lukwikilu lumosi bena lwau yo Abarayama ona wakala nkundi a Nzambi.

Kansi Yesu ubavene mvutu zibalwekele mu ntima, ubavovese vo: “Kele vo nu wan’a Abarayama, nwadi vanga mavangu ma Abarayama.” Kadi o mwana se diandi ketangininanga. “Kansi owau nuzolele kumponda,” Yesu okudikidi vo, “mono inusamunwini e ludi kina yawá kwa Nzambi. Abarayama kavanga wo ko.” I bosi, Yesu ubavovese diambu dibatokanese ngindu. Ovovele vo: “Oyeno mavangu ma se dieno nuvanganga.”—Yoane 8:39-41.

Yamu wau Ayuda ke babakwidi ko kana Yesu nani kena vovela. Bavovele vo: “Ke tu wan’a zumba ko; Se dimosi tuna diau, Nzambi.” Nga o Nzambi se diau kikilu e? Yesu ubavovese vo: “O Nzambi kele vo kakala Se dieno, nga nunzolele, kadi kwa Nzambi yatuka, i dianu nginina ovava. Kiayizila mu kani diame ko, kansi yandi wantuma.” Yesu ubayuvuidi kiuvu kina yandi kibeni kavanini e mvutu. Ovovele vo: “Ekuma nulembele bakulwila mana ivovanga? Kadi ke nuzolele wá diambu diame ko.”—Yoane 8:41-43.

Yesu ubasongele mfwilu bevua wau balembele kwikila muna yandi. Ubavovese vo: “Nkadi ampemba i se dieno, zolela ya se dieno nuzolele vanga.” O se diau aweyi kena? Yesu otomene kunsengomona, oku vo: “Oyandi, mumponda-muntu tuka kuna lubantiku, kasikila muna ludi ko.” Yesu ovovele diaka vo: “Ndiona wa Nzambi, mvovo mia Nzambi kewanga. Kiaki i kuma nulembele wila, e kuma kadi, oyeno ke nwa Nzambi ko.”—Yoane 8:44, 47.

E mvovo mia Yesu mifungisi Ayuda makasi, bamvutwidi vo: “Ke kiau ko i kuma tuvovele vo, ‘Ngeye u Nsamaria, nkuya mpe wina wau e’?” Bevezele Yesu muna kunyikila vo “Nsamaria.” Kansi o Yesu kazolele kubalanda ko, ovutwidi vo: “Kina ye nkuya ko, Se diame kaka izitisa, vo i yeno, ke nunzitisi ko.” Yesu osongele o mfunu a diambu diadi vava kasidi o nsilu vo: “Avo muntu olunda diambu diame, kemona lufwa ko yakwele mvu.” O Yesu kavovele ko vo antumwa ye wantu bekunlandanga ke befwa ko. Kansi osongele vo ke bemona lufwasu lwakwele mvu ko, i sia vo, “lufwa lwanzole,” lwakondwa vuvu kia lufuluku.—Yoane 8:48-51; Lusengomono 21:8.

Kansi Ayuda babenze vo Yesu lufwa kikilu kavovele, bamvovese vo: “Owau tuzeye wo vo nkuya una wau. Abarayama wafwa, ye angunza mpe, kansi edi ovovele vo, ‘Ovo muntu olunda diambu diame, keyeleka lufwa ko yakwele mvu.’ Nga osundidi o se dieto Abarayama, ona wafw’e? . . . Ongeye nani okuyikitulanga?”—Yoane 8:52, 53.

Dialudi vo Yesu una kubasonga vo yandi i Masia. Kansi vana fulu kia kubasasila kana nani kikilu kena, Yesu ubavutwidi vo: “Avo iyikembese, o nkembo ame wankatu. Se diame okunkembesanga, ona nuyikidi vo Nzambi eno. Ke nunzeye mpe ko, kansi omono, inzeye. Avo mpovele vo, kinzeye ko, ozevo nkitukidi nkwa luvunu nze yeno.”—Yoane 8:54, 55.

Owau, Yesu ovovele diaka e mbandu a se diau wa nkwa kwikizi, oku vo: “O se dieno Abarayama wayangalela e vuvu kia mona e lumbu kiame, kamona kio yo yangalala.” Kieleka, wau kakwikilanga muna nsilu a Nzambi, Abarayama ngiz’a Masia kavingilanga. Ayuda ke bakwikidi wo ko, bavovese Yesu vo: “Ongeye kuna ye mvu 50 ko, nga wamona Abarayama e?” Yesu ubavutwidi vo: “Kieleka, kieleka, inusamunwini vo, vava ke kiawutukidi Abarayama ko, omono yakikadila.” Yesu zingu kiandi kuna zulu kavovele vava kakala vangwa kia mwanda kia nkuma.—Yoane 8:56-58.

Ayuda bafungidi kikilu makasi vava Yesu kavovele vo wakikadila kala una Abarayama kawutukidi ko, bazolele kuntubila matadi. Kansi Yesu okatukidi vo kwandi, ke balendele kumvanga mbi ko.