LONGI DIA 29
Adieyi Dibwilanga Muntu Avo Ofwidi?
Nga wafwilwa kala muntu ona watoma zolanga? Muna ntangwa yayina yampasi, nanga wakiyuvula: ‘Adieyi dibwilanga muntu avo ofwidi? Nga tusinga mona diaka azolw’eto ana bafwa?’ E longi diadi ye dina dilanda, divana e mvutu za lufiaulwisu za Bibila.
1. Adieyi dibwilanga muntu avo ofwidi?
Yesu watezanesa lufwa yo tulu. Avo muntu ku tulu twangolo kena, ke zayanga mambu mevangamanga ko. Aweyi lufwa lwinina nze tulu? Avo muntu ofwidi, kemonanga mpasi ko, ke monanga mpe kinsona ko. Bibila kivovanga vo: “Awana bafwa ke bazeye konso diambu ko.”—Tanga Kimpovi 9:5.
2. O zaya e ludi mu kuma kia lufwa, aweyi dilenda kutusadisila?
Wantu ayingi bemonanga wonga wafwa ye wa wantu bafwa. Kansi, dina Bibila kivovanga mu kuma kia lufwa, dilenda kubavevola muna wonga wau. Yesu wavova vo: “E ludi kikunuvevola.” (Yoane 8:32) Nswaswani ye mana melongwanga mu mabundu mankaka, Bibila ke kilonganga ko vo muntu moyo ulembi fwanga kena wau, owu ukwamanananga zinga avo ofwidi. Muntu avo ofwidi ke monanga diaka mpasi ko. Awana bafwa ke bazeye diambu ko ye ke balendi kutuvanga mpasi ko. Muna kuma kiaki, ke tufwete vava lembeka awana bafwa ko, kubasambila ngatu samba muna wete diau.
Wantu ankaka bevovanga vo wantu afwa bemokenanga yau. Ediadi ke dialudi ko, kadi nze una tulongokele kala, awana bafwa “ke bazeye konso diambu ko.” Ozevo, awana bevovanga vo azolw’au ana bafwa bemokenanga yau, nkuya bemokenanga miau, kadi yau bevuatanga e mpolo za awana bafwa. Muna kuma kiaki, ozaya e ludi mu kuma kia lufwa, dikututaninanga muna lembi vukumunua kwa nkuya. Yave okutulukisanga vo twavenga e fu kia vava mokena ye awana bafwa, kadi ozeye wo vo omokena ye nkuya diavonza kikilu.—Tanga Nsiku 18:10-12.
ZAYA DIAKA MANKAKA
Zaya diaka mambu mankaka melongwanga muna Bibila mu kuma kia lufwa. Siamisa lukwikilu lwaku muna Nzambi a zola, ona ke bangikanga wantu bafwa ko.
3. Zaya e ludi mu kuma kia awana bafwa
Mu nza yawonso, wantu bekwikilanga mambu maswaswana mu kuma kia dina dibwilanga muntu avo ofwidi. Kansi, mayingi muna mambu mama maluvunu.
Muna zunga kiaku, nkia mambu o wantu bekwikilanga mu kuma kia awana bafwa?
Muna zaya mana Bibila kilonganga, tala e VIDEO.
Tanga Kimpovi 3:20, i bosi, vana e mvutu za yuvu eyi:
Landila sono kiaki, avo muntu ofwidi akweyi kekwendanga?
Nga muna nitu a muntu muna ye lekwa kikwamanananga zinga avo ofwidi?
Bibila kiyikanga lufwa lwa Lazaro ona wakala nkundi a Yesu. Ekolo otanga Yoane 11:11-14, tala dina Yesu kavova mu kuma kia Lazaro. I bosi, vana e mvutu za yuvu eyi:
Yesu watezanesa lufwa ye nki?
Wau vo Yesu watezanesa lufwa yo tulu, adieyi ditulongele mu kuma kia awana bafwa?
Aweyi omwene mu kuma kia dina Bibila kivovanga mu kuma kia lufwa?
4. O zaya e ludi mu kuma kia lufwa, nkia nluta dilenda kututwasila?
O zaya e ludi mu kuma kia lufwa, dikutuvevolanga muna wonga wa awana bafwa. Tanga Kimpovi 9:10, i bosi, vana e mvutu za kiuvu eki:
Nga awana bafwa balenda kutuvanga e mbi?
E ludi kia Bibila kikututaninanga mpe mu lembi kwikila mu luvunu lwa sia vo, awana bafwa bafwete lembekwa yovo sambilwa nkutu. Tanga Yesaya 8:19 ye Lusengomono 4:11, i bosi, vana e mvutu za kiuvu eki:
O Nzambi aweyi kemonanga mu kuma kia muntu osambilanga awana bafwa yovo vava lusadisu lwau?
E ludi mu kuma kia lufwa kikutuvevolanga muna fu ikendelekanga Yave
5. O zaya e ludi mu kuma kia awana bafwa dikutuvevolanga
Wantu ayingi belongwanga vo vava befwa, bebangikwa mu kuma kia mambu mambi bevanganga. Kansi, dialufiaulwisu mu zaya vo ke vena muntu ko omweswanga e mpasi avo ofwidi, kana nkutu awana bavanga mambu masundidi o bi. Tanga Roma 6:7, i bosi, vana e mvutu za kiuvu eki:
Bibila kivovele vo avo muntu ofwidi ovevokele muna masumu mandi. Nga obenze vo muntu avo ofwidi mpasi kemweswanga mu kuma kia mambu mambi kavanga?
Avo tutomene zaya e mpila muntu Yave kena, tubakula vo ke tumbanga muntu ko avo ofwidi. Tanga Nsiku 32:4 ye 1 Yoane 4:8, i bosi, vana e mvutu za yuvu eyi:
O Nzambi ona una ye fu otangidi mu sono yayi, nga olenda mwesa awana bafwa e mpasi?
Nga o zaya e ludi mu kuma kia lufwa dialufiaulwisu? Ekuma?
AVO MUNTU UVOVESE VO: “Wonga imonanga mu kuma kia dina dikumbwila avo mfwidi.”
Nkia sono kia Bibila okuntangila muna kunkatula o wonga?
MAMBU MASINA MA LONGI DIADI
Avo muntu ofwidi, ke zayanga diaka diambu ko. Awana bafwa ke bemonanga diaka mpasi ko ngatu mwesa awana bena o moyo e mpasi.
Nkia Mambu Olongokele?
Adieyi dibwilanga muntu avo ofwidi?
O zaya e ludi mu kuma kia lufwa, nkia nluta dilenda kututwasila?
O zaya e ludi mu kuma kia awana bafwa, aweyi dikutufiaulwisilanga?
TALA MPE OMA MALENDE
Tala e nsas’a mvovo “moyo” muna Bibila.
Nga Nzambi wantu ambi ketumbanga kuna bilungi?
Nga tufwete mona wonga wa awana bafwa?
Mianda mia Mafwa—Misadisanga ovo Mbi Mivanganga? Nga Mina Kielek’e? (finkanda)
Tala una e ludi mu kuma kia lufwa kiafiaulwisila muntu mosi.
“E Mvutu Zakiá za Bibila Zansivikisa Kibeni” (Eyingidilu dia 1 dia Fevelelo, 2015)