Lazaro Ofulukidi

O Yesu vava kawananene yo Mareta yo Maria muna Betania, bele yandi kuna ziami kia Lazaro. Ziami kia nduka, tadi diyekamene vana mwelo. Yesu ovovele vo: “Nukatul’e tadi.” O Mareta wau kalembele zaya dina Yesu kevanga, ovovele vo: “E Mfumu, owau se nsudi ketá, kadi lumbu yà iviokele kala.” Yesu umvovese vo: “Nga kivovese wo ko vo, avo okwikila omona nkembo a Nzambi e?”—Yoane 11:39, 40.

Bakatwidi e tadi. I bosi, Yesu osengwele meso kuna zulu, osambidi, oku vo: “E Tata, ntondele wau ungwidi. Nzeye wo vo e lumbu yawonso okungwanga; kansi muna diambu dia ndonga eyi inzietele i mpovèle wo, bakwikila vo ngeye wantuma.” E sambu kia Yesu vana meso ma ndonga kisongele kwa wantu vo mana kazolele vanga, mu nkum’a Nzambi kevangila mo. Yesu okazidi muna nding’angolo, oku vo: “E Lazaro, vaika!” Lazaro ovaikidi, o malu yo moko mandi mazingwa nlele miazikilwanga mvumbi, o luse luandi mpe luakangwa nlele. Yesu ubavovese vo: “Nunkutulula, nunyambula kenda.”—Yoane 11:41-44.

Ndonga muna Ayuda bezidi fiaulwisa Maria yo Mareta wau bamwene sivi diadi, bakwikidi muna Yesu. Kansi akaka muna yau bele zayisa Afarisi mana Yesu kavangidi. Afarisi ye nganga za mbuta bavuende mfulu muna mbazi a nkanu ya Ayuda, i sia vo Sanedina. Kayafa wa ngang’a mbuta una yau e ntwadi. Akaka muna yau bavovele vo: “Aweyi tuvanga, kadi muntu ndioyo sinsu yayingi kevanganga? Avo tunyambwidi, ozevo wantu awonso bekwikila muna yandi, esi Roma mpe bekwiza baka fulu kieto ye nsi eto.” (Yoane 11:47, 48) Kanele vo bawidi kimbangi kia wantu ayingi bavovele vo Yesu “sinsu yayingi kavangidi,” nganga za mbuta ke bayangalele ko muna mambu mana Yesu kavangidi muna lusadisu lwa Nzambi. Oyau tunda ye wisa kiau betokanenanga.

O lufuluku lwa Lazaro lufungisi Asaduki makasi, kadi oyau ke bekwikilanga mu lufuluku ko. Kayafa, mosi muna Asaduki, obongele e mvovo, oku vo: “Oyeno ke nuzeye diambu ko, ngatu zaya vo muntu mosi ofwa muna wete dia nkangu, ke mu zula kiawonso ko kiafwaswa.”—Yoane 11:49, 50; Mavangu 5:17; 23:8.

Mu kuma kia salu kiavauka kesalanga Kayafa, Nzambi unsidi e mvovo miami mu nua. Kavovela mio mu “ngindu za yandi kibeni” ko. Kayafa edi kazolele vova vo, Yesu kafwete vondwa kimana e tunda ye wisa kia afidi a nsambila ya Kiyuda kialembi fokoka. Kansi tu, ungunza wa Kayafa usongele vo lufwa lwa Yesu lutwasa lukûlu, ke kwa Ayuda kaka ko, kansi kw’awonsono, “wan’a Nzambi, ana bamwangana.”—Yoane 11:51, 52.

Kayafa olendele vukumuna Mbazi a Nkanu yawonso mu vonda Yesu. Nga Nikodemo ozayisa e diambu diadi kwa nkundi andi Yesu? Kuna kwalanda, Yesu okatukidi muna zunga kia Yerusaleme, kadi kazolele ko vo kavondwa vitila e ntangwa ina Nzambi kasikidisa.