Ayuda Bawidi Nding’a Nzambi—nga Besonga Lukwikilu?

Kina Kiamosi, kia 10 kia ngonde a Nisani, Yesu ovovele lufwa lwandi wau kelonganga muna tempelo. Wau katokanene e nkumbu a Nzambi, Yesu ovovele vo: “E Tata, kembesa nkumbu aku.” I bosi, ndinga itukidi kuna zulu, oku vo: “Nkembese yo kala, nkembesa yo diaka.”—Yoane 12:27, 28.

O wantu vana ndambu basivikidi. Akaka bayindwidi vo mbandanu italumukini. Akaka bavovele vo: “Mbasi ovovele kwa yandi.” (Yoane 12:29) Kinga nding’a Yave kwandi bawidi! Kansi tu, eyayi ke nkumbu antete ko o wantu bawidi e nding’a Nzambi mu kuma kia Yesu.

Mvu ntatu ye ndambu miviokele kala tuka muna lumbu kia luvubu lwa Yesu, Yoane wa Mvubi wawá nding’a Nzambi vava kavova mu kuma kia Yesu vo: “Ndioyu i Mwan’ame anzolwa, ona iyangalelanga.” Vava kiavioka e Nduta muna mvu wa 32 wa tandu kieto, Yesu wakituka vana ndose a Yakobo, Yoane yo Petelo. Yau atatu bawá e nding’a Nzambi vava kavova vo: “Ndioyu i Mwan’ame anzolwa, ona iyangalelanga. Nunwila.” (Matai 3:17; 17:5) Kansi muna nkumbu wau wantatu, Yave ovovele kimana e ndonga yawá.

Yesu ovovese nkangu vo: “E ndinga yayi ke izidi muna diambu diame ko, kansi muna diambu dieno.” (Yoane 12:30) E nding’a yayi isongele e ziku vo Yesu i Mwan’a Nzambi, yandi i Masia wasilwa o nsilu.

E zingu kia kwikizi kia Yesu i mbandu ina o wantu bafwete landa muna songa vo Satana wa Nkadi ampemba, wa nyadi a nza yayi fwa kafwete fwa. Yesu ovovele vo: ‘Owau e nza yayi mu fundiswa ina; owau se kevaikiswa kuna mbazi, o nyadi a nza yayi.’ Yesu kena yo wonga wa lufwa lwalu ko, kadi sunda kesunda lo. Mu nkia mpila? Yandi kibeni ovovele vo: “Omono vava imanikwa, itunta wantu a mpila zawonso oku ngina.” (Yoane 12:31, 32) Muna lufwa lwandi vana nti, o Yesu otunta wantu kuna sambu diandi, i sia vo, oziula e nzila kimana bavua moyo a mvu ya mvu.

O Yesu vava kavovele vo “omanikwa,” o nkangu uvutwidi vo: “Twawa muna Nsiku vo o Kristu ozinga kaka yakwele mvu. Aweyi ovovele vo, o Mwan’a muntu kafwete manikwa? Nani i Mwan’a muntu ndioyo?” (Yoane 12:34) Kanele vo bamwene e sinsu yayi yawonso yo wá e nding’a Nzambi, ndonga muna yau ke bakwikidi ko vo Yesu yandi kikilu i Mwan’a muntu, Masia wasilwa o nsilu.

Nze una kateka vova, Yesu ovovele diaka vo yandi i “ntemo.” (Yoane 8:12; 9:5) Ovovese kwa ndonga yawonso vo: “O ntemo mu fikolo kaka ukala vovo nwina. Nukangala wau nwina yo ntemo, kimana nwalembi bukamwa e tombe . . . Ekolo nwina yo ntemo, nukwikila muna ntemo, kimana nwakituka wan’a ntemo.” (Yoane 12:35, 36) I bosi, Yesu wele kwandi, kadi ka lendi fwa mu lumbu kia 10 kia Nisani ko. Yesu “omanikwa” muna Nduta ya 14 kia ngonde a Nisani, i kiau e lumbu kekomwa vana nti.—Ngalatia 3:13.

Avo tuvutukidi kuna lubantiku lwa salu kia Yesu, tumona vo ungunza walungana vava Ayuda balembi kwikila muna Yesu. Yesaya wa ngunza wasakula vo o meso ma nkangu mevondwa, e ntima miau mibâla kimana balembi viluka, bawukwa. (Yesaya 6:10; Yoane 12:40) Kieleka, ndonga muna Ayuda ke bakwikidi ko vo Yesu yandi kikilu i Mvuluzi au wasilwa o nsilu, i nzila ya vuila o moyo.

Nikodemo, Yosefe wa musi Arimataya ye ayadi ankaka “bakwikidi” muna Yesu. Kansi, nga besikila muna lukwikilu yovo bevutuka manima mu kuma kia wonga wa yingwa muna masambilu yovo mu kuma kia ‘nkembo betambulanga kwa wantu’?—Yoane 12:42, 43.

Yesu yandi kibeni osasidi dina divavuanga muna kwikila muna yandi, ovovele vo: “Konso ona okwikilanga omu mono, ke mu mono kaka ko kekwikilanga, kansi muna ndiona wantuma mpe; konso ona umbwene, omwene mpe Ndiona wantuma.” E ludi kina Nzambi kavovesa Yesu kalonga kiamfunu kikilu. Muna toma songa o mfunu wau, Yesu ovovele vo: “Konso ona okumbembola yo lembi tambula mvovo miame, vena ye ndiona okumfundisa. E diambu dina mpovele, i diau dikumfundisa muna lumbu kiambaninu.”—Yoane 12:44, 45, 48.

I bosi, Yesu ofokwele moko kiandi muna mvovo emi: “Kivovele muna ngindu za mono kibeni ko, kansi, o Se ona wantuma, i yandi wampana nkanikinu mu kuma kia mana mvova yo longa. Nzeye wo vo o nkanikinu andi i moyo a mvu ya mvu.” (Yoane 12:49, 50) Yesu otomene wo zaya vo fioti kaka fisidi obungula menga mandi se kimenga, muna wete dia wantu bekwikilanga muna yandi.—Roma 5:8, 9.