“Nukala Yo Unkabu! Omono Nsundidi E Nza”

Yesu ye alongoki andi bakubamene mu sisa e suku dia ntandu, mûna badididi e lambu dia Nduta. Vava kabavene malongi ma mfunu, Yesu okudikidi vo: “Inuvovese mambu mama kimana nwalembi tá sakuba.” Ekuma o lulukisu lwalu lwinina o mfunu? Yesu ubavovese vo: “Wantu bekunuyinga muna masambilu. E ntangwa ikwiza, konso ona okunuvonda oyindula vo Nzambi kasadidi e salu kiavauka.”—Yoane 16:1, 2.

Nanga e mvovo miami mitokanese antumwa. Kana una vo Yesu wabavovesa kala vo e nza ikubamenga, kabazayisa ko vo vondwa bevondwa. Ekuma? Yesu ubavovese vo: “Kiateka kunuvovesa mambu mama ko, kadi yakedi yeno.” (Yoane 16:4) Owau mu kubalukisa kena vitila kenda kwandi. Ediadi nanga dikubasadisa muna lembi tá e sakuba.

Yesu ovovele diaka vo: “Se nkwenda kwa Ndiona wantuma; ke mosi ko muna yeno ungiuvuidi vo, ‘Akweyi okwenda?’” Muna fuku wau, antumwa bayuvudinge Yesu kana akweyi kekwenda. (Yoane 13:36; 14:5; 16:5) Kansi owau bakendalele, kadi Yesu ubazayisi vo bangikwa bebangikwa, bamwene ntantu. Muna kuma kiaki, ke balendele yuvula Yesu ko o nkembo una kevua ye nkia mawete betambula asambidi akieleka. Yesu ubavovese vo: “Kansi, wau inuvovese mambu mama, e ntima mieno mizele ye ntantu.”—Yoane 16:6.

Yesu otomene kubasasila, oku vo: “Inusamunwini e ludi vo, muna wete dieno ikwendela. Kadi avo kiele ko, o nsadisi kekwiza kwa yeno ko; kansi avo ngiele, ikuntwika kwa yeno.” (Yoane 16:7) Vava o Yesu kefwa yo vutuka kuna zulu, i bosi alongoki andi betambula o mwand’avelela. Yesu otwika o mwanda wau kimana wasadisa o nkangu andi omu nza yawonso.

O mwand’avelela usonga “e ziku kwa nza muna diambu dia sumu, unsongi ye mfundisa.” (Yoane 16:8) Kieleka, se diasengomoka vo e nza ke ikwikidi mu Mwan’a Nzambi ko. Vava Yesu ketomboka kuna zulu disonga unsongi wandi ye ziku kiampwena kisonganga vo Satana wa “nyadi a nza yayi” kafwete fundiswa.—Yoane 16:11.

Yesu ovovele diaka vo: “Mambu mayingi ngina mau muna kunuvovesa, kansi owau ke nwafwana mo bakula ko.” Vava Yesu kepongola o mwand’avelela, usadisa ntumwa zandi mu bakula “ludi kiawonso,” yo kubasadisa mu zingila e ngwizani ye ludi.—Yoane 16:12, 13.

Antumwa basivikidi vava Yesu kavovele mvovo emi: “Kolo kiandwelo kaka kisidi, ke nukumbona diaka ko, kolo kiandwelo diaka, nukumbona.” Antumwa bayuvuzianene kana nkia nsasa mina e mvovo mia Yesu. I bosi, Yesu obakwidi vo ntumwa zandi diambu bazolele kunyuvula, dianu vo, ubasasidi e mvovo miandi, oku vo: “Kieleka, kieleka, inusamunwini vo, nudila yo yayana, kansi e nza iyangalala; ntantu numona, kansi e ntantu zeno zikituka se kiese.” (Yoane 16:16, 20) Vava Yesu kefwa muna lumbu kilanda, mfumu za mabundu beyangalala, vo i alongoki bemona ntantu. Muna lufuluku lwa Yesu e ntantu za alongoki andi zikituka se kiese. E kiese kiaki kikwamanana yavana Yesu kekubapongolwela o mwand’avelela.

Yesu otezanese e mpasi za ntumwa zandi ye nsongo mia nkento se ke wuta, ubavovese vo: “O nkento avo se kewuta, ntantu kemonanga, kadi e ntangw’andi ifwene, kansi avo owutidi mwana, ke sungamenanga diaka e nsongo ko mu kuma kia kiese kia muntu owutukidi ova nza.” Muna kasakesa ntumwa zandi, Yesu ovovele diaka vo: “Owau, yeno mpe ntantu nuna zau; kansi tumonana diaka, e ntima mieno miyangalala, ke vena muntu ko okunukatula e kiese kieno.”—Yoane 16:21, 22.

Yamu lumbu kiaki, antumwa ke basidi lomba diambu ko muna nkumbu a Yesu. Owau Yesu ubavovese vo: “Muna lumbu kiakina, nulomba kwa Se muna nkumbu ame.” Ekuma belombela muna nkumbu a Yesu? Ediadi ke disongele ko vo Yesu okubalombela kwa Se. Yesu ubavovese vo: “Kadi yandi kibeni o Se unuzolele, kadi oyeno nunzolele yo kwikila vo Nzambi yayiza sunzula.”—Yoane 16:26, 27.

Nanga e mvovo miami mia lukasakeso, mivene antumwa unkabu wa vova vo: “Muna diadi tukwikidi vo kwa Nzambi watuka.” Kansi ke kolo ko, o lukwikilu lwau tontwa lutontwa. Dianu vo, Yesu ubavovese diambu divangama muna yau, ovovele vo: “E ntangwa ikwiza, kieleka izidi kala, numwangana konso muntu muna nzo andi, nukunsisa mono mosi.” Kansi Yesu ubakumikini, oku vo: “Kina mono mosi ko, kadi o Se wina yame. Inuvovese mambu mama kimana nwakala yo luvuvamu omu mono. Ova nza mpasi numona, kansi nukala yo unkabu! Omono nsundidi e nza.” (Yoane 16:30-33) Ediadi ke disongele ko vo Yesu obembwele ntumwa zandi. Yesu otomene wo zaya vo ntumwa zandi mpe besunda e nza wauna oyandi kasundidi yo, avo besikila ye kwikizi yo vanga luzolo lwa Nzambi, kana nkutu vo Satana ye nz’andi ivavidi fwasa e kwikizi kiau.