Akala, Nutanginina Zola kwa Kristu!

MUNA fuku wansuka wa zingu kiandi ova ntoto, Yesu wavovesa ntumwa zandi zakwikizi vo: “Nkanikinu ampa ikunusia, nuzolaziana; e nzola inuzolele, i nuzolaziananga. Muna wau i bezayil’o wantu awonso vo nu alongoki ame, ovo nzolani nuna yau.” (Yoa. 13:​34, 35) Elo, Akristu akieleka bafwete zolaziananga.

Kuna kw’akala bena vo Akristu, Paulu wa ntumwa wasoneka vo: “Akala, nuzolang’akazi eno, waun’o Kristu wazola dibundu, yo kuyekwela dio.” (Ef. 5:​25) O yakala una vo Nkristu, aweyi kalenda songela vo olemvokelanga luludiku lwalu muna longo lwandi, musungula kele vo nkaz’andi mpe selo kiayiyekola kia Yave?

Kristu Walunga-lunganga Nkutakani

Muna Nkand’a Nzambi tutanganga vo: “Akala bafwete zol’akazi au, nze to ya yau kibeni. Ndion’ozolele owandi nkento, wiyizolele: kadi ke vakedi nkutu muntu wasaula yandi nitu ko; tongonona kaka ketongononanga yo, yo wonzakana (yovo lunga-lunga), nze Kristu mpe dibundu.” (Ef. 5:​28, 29) Yesu watoma zolanga alongoki andi, wabavwang’o mfunu yo kubalunga-lunga. Kana una vo wantu alembi lunga bakala, wabasongang’e ngemba ye nkenda. Wau kazola ‘kuyisunzwil’e dibundu muna nkembo andi,’ Yesu wasiang’e sungididi muna fu yambote y’alongoki andi.​—⁠Ef. 5:⁠27.

Nze una Kristu kezolelanga nkutakani, o yakala kafwete songanga zola kwa nkaz’andi muna mvovo ye mavangu. Vava nkento kewanga mvovo mia nzola mia nkaz’andi, ozaya vo zolwa kezolwanga yo kala ye kiese. Kansi, avo nkento vezwa kevezwanga, kalendi kala ye kiese ko, kana nkutu oveno yawonso kalenda vwa o mfunu muna nzo.

O yakala aweyi kalenda songela vo ozolanga nkaz’andi? Vana va ndonga, okunsunzulanga kw’akaka kuna luzitu yo kunsanisina muna lusadisu kevananga. Kele vo nkento andi osadidi salu kiambote muna zingu kia nzo, o yakala ovovanga dio kw’akaka. Kana nkutu vava bekalanga va yau kaka, omonanga vo zola kezolwanga. Kunsimba muna koko, seva yandi, kumbimbakana, ye makaka mpe mebadikilwanga vo makondw’o mfunu, kansi malenda yangidika ntim’a nkento.

‘Kamona Nsoni za Kubayikila Abunzi Ko’

Kristu Yesu ‘kamona nsoni za kubayikila [alandi andi akuswa] abunzi ko.’ (Ayib. 2:​11, 12, 17) Avo u yakala una vo Nkristu, sungamena dio vo o nkento aku, mpangi aku mpe muna mwanda. E nkal’andi ya nkento wayiyekola kwa Yave ifwete kala va fulu kiantete ke mu nsilu a longo ko, kana nkutu nwateka kazala i bosi kavubwa. Vava nkaz’aku kesolwanga mu van’e mvutu muna lukutakanu, o mpangi ofilanga elongi okunyikilanga vo “Mpangi nengandi.” O nkento aku, mpangi aku mpe, ke kun’Eseka dia Kintinu kaka ko, kansi ye kuna nzo mpe. Diamfunu wansongang’e ngemba ye luzitu kuna nzo, nze vava nukalanga kun’Eseka dia Kintinu.

Avo kiyekwa una kiau muna nkutakani, ezak’e ntangwa dilenda kala diampasi mu lungisa kiyekwa muna nkutakani ye kina kia nzo aku. E ngwizani ambote ye akuluntu akaka ye selo ya salu, ye longa akaka kimana basalanga e salu yakaka ya nkutakani dilenda kusadisa mu kala ye ntangwa yafwana mu kala vamosi yo nkaz’aku ona ofwete luta kalanga yandi. Sungamena vo vena ye mpangi zayingi balenda sala e salu kin’osalanga muna nkutakani, kansi o nkaz’aku yo ngeye kaka nwasompana.

Vana ntandu, ngeye i ntu a nkaz’aku. Muna Nkand’a Nzambi tutanganga vo: “O ntu akal’awonso, i Kristu: o ntu a nkento, i’yakala.” (1 Kor. 11:⁠3) Aweyi fwete kadila kintu kiaki? Muna zola, ke mu yikanga kaka sono kina va ntandu ko yo vava vo wazitiswa mu ngolo. Tanginina Yesu Kristu muna mpila okadilanga yo nkaz’aku i nsabi mu kadila ntu mu mpila yambote.​—⁠1 Pet. 2:⁠21.

‘Oyeno nu Akundi Ame’

Yesu wayikila alongoki andi vo akundi. Wabavovesa vo: “Oyeno nu makangu mame, ovo nuvang’owu inukanikini. Kikunuyika diaka ko vo nu ntaudi; kadi ntaudi kazeye wo kwandi ko, owu uvanga mfumu andi: kansi inuyikidi vo nu akundi; kadi wawonso yawa kw’Es’ame, inuzayisi wo.” (Yoa. 15:​14, 15) Yesu ye alongoki andi mbokena zambote bakalanga zau. Basalanga kumosi. ‘Yesu ye alongoki andi’ babokelwa ku nkinzi a longo kuna Kana. (Yoa. 2:⁠2) Vakala ye fulu kina bazolanga kwenda, nze kuna mpatu a Ngetesemane. Nkand’a Nzambi uvovanga vo “o Yesu ngyenda zingi kayele ko y’alongoki andi.”​—⁠Yoa. 18:⁠2.

O nkento kafwete monanga vo yandi i nkundi ketoma zolanga o nkaz’andi. Akazi, diambote lwamonanga kiese kia zingu kumosi. Nusadilanga Nzambi kumosi. Nulongokanga Nkand’a Nzambi kumosi. Nukangalanga kumosi, mokena ye dila vamosi. Ke nukadi kaka akazi ko, kansi akundi ambote mpe.

“Ubazolele Yakuna Nsuka”

Yesu ‘wazola alongoki andi yakuna nsuka.’ (Yoa. 13:⁠1) Akazi akaka ke betangininanga Kristu ko muna diambu diadi. Besisanga ‘nkaz’a kileke kiau,’ yo zola nkento akaka una vo ndumba.​—⁠Mal. 2:​14, 15.

Akaka nze Willi, betangininanga Kristu. Mu kuma kia kimbevo kiangolo, nkaz’a Willi, mvu miayingi kavava lungwa-lungwa. Willi aweyi kabadikila diambu diadi? Wavova vo: “E lumbu yawonso yabadikilanga nkaz’ame nze lukau lwa Nzambi yo kunyangalela kana una vo mbevo. Vana ntandu, vioka mvu 60 yansila o nsilu a kunlunga-lunga muna ntangw’ambote ye muna ntangw’ampasi. Kisidi vilakana nsilu wau ko.”

Akala Akristu, nutanginina zola kwa Kristu. Nulunga-lunga akazi eno bevuminanga Nzambi, ana bena vo mpangi zeno ye akundi eno mpe.

[Foto ina muna lukaya lwa 20]

Nga nkaz’aku i nkundi ona otoma zolanga?

[Foto ina muna lukaya lwa 20]

‘Kwamanana zola nkaz’aku’