Ekuma Tuyindulwilanga Nlekelo a Mfumu?

1, 2. Nkia diambu Yesu kavanga muna fuku wa lumbu kia 14 kia ngonde ya Nisani ya mvu wa 33 wa Tandu Kieto? (Tala e fwaniswa ova ntandu.)

Muna fuku wa lumbu kia 14 kia ngonde a Nisani ya mvu wa 33 wa Tandu Kieto, nsungi a miezi yakala kuna Yerusaleme. Yesu ye ntumwa zandi badia e lambu dia Nduta, dina diasungamesanga o wantu e mpila ina Yave kakûdila Isaele muna ubundu kuna Ngipito se vioka 1.500 za mvu. Yesu wadia lambu diamfunu ye ntumwa zandi 11 zakwikizi. Wakanikina alongoki andi vo badianga e lambu diadi muna sungamena lufwa lwandi.—Matai 26:1, 2.

² Entete Yesu wasamba, wavana e mbolo ke yafuna ko kwa ntumwa zandi yo vova vo: “Nutambula nwadia.” I bosi, wabonga e mbungw’a vinyu, wasamba diaka yo vova vo: “Nunua yo, yeno awonso.” (Matai 26:26, 27) E mbolo ye vinyu nsasa yakala. E ntumwa za Yesu zakwikizi mambu mayingi balongoka muna fuku wauna wamfunu.

 3. Nkia yuvu tubadika mu longi diadi?

³ Yesu wazola vo alongoki andi bayindulanga lufwa lwandi konso mvu. Kuna kwalanda, e lumbu kiaki kiayantika yikilwa vo “Nlekelo a Mfumu” yovo Luyindulu. (1 Korinto 11:20) Vena ye yuvu yayingi tulenda kiyuvula. Ekuma tufwete sungamenanga lufwa lwa Yesu? Ayeyi i nsas’a mbolo ye vinyu? Aweyi tulenda kubamena mu kuma kia Luyindulu? Aki nani bafwete dia mbolo yo nua vinyu? Aweyi Akristu besongelanga vo beyangalelanga e vuvu bena kiau?

 4. Lufwa lwa Yesu nkia nzila lwatuziulwila?

⁴ Wau vo Adami wasumuka, watusambukisa e sumu yo lufwa. (Roma 5:12) Ke mosi ko muna wantu alembi lunga olenda vana Nzambi lukûlu mu kuma kia moyo andi ngatu wa wantu ankaka. (Nkunga 49:6-9) Kansi, Yesu wavana moyo andi alunga mu kuma kieto yo sunzula e ntalu a lukûlu lwalu kwa Nzambi. Muna mpila yayi, Yesu waziula e nzila kimana twakala ye vuvu kia zinga yakwele mvu, kondwa kwa sumu ye lufwa.—Roma 6:23; 1 Korinto 15:21, 22.

 5. (a) Aweyi tuzayidi wo vo Yave yo Yesu zola bekutuzolanga? (b) Ekuma tufwete kadilanga muna Luyindulu?

⁵ Nzambi wasonga zola kwandi muna wantu vava kakubika lukûlu. (Yoane 3:16) Yesu mpe wasonga zola kwandi wau kavana moyo andi mu kuma kieto. Kana nkutu vitila keza ova ntoto, Yesu ‘watoma zolanga wan’a wantu.’ (Ngana 8:30, 31) Kieleka, tuvutulanga kikilu matondo mu dina Yave yo Yesu bavanga muna wete dieto! Ekiaki, i kuma tukadilanga muna Luyindulu mu lemvokela nkanikinu a Yesu wa ‘kwamanana wo vanga muna luyindulu luame.’—1 Korinto 11:23-25.

 6. Adieyi tubakwidi mu kuma kia mbolo ye vinyu isadilwanga muna Luyindulu?

⁶ Muna lambu diansuka Yesu kadia ye ntumwa zandi, kavanga sivi ko dia kitula mbolo se nitu andi yovo kitula vinyu se menga mandi. Muna kuma kia mbolo, Yesu wavova vo: “Eyayi nitu ame isunzulanga.” Wavova mu kuma kia vinyu vo: ‘Eyayi menga mame ma kangu isunzulanga, mana mebungukila muna wete dia wantu ayingi.’ (Maku 14:22-24, NW) Ediadi disonganga e ziku vo e mbolo ye vinyu sinsu kwandi.

 7. E mbolo ke yafuna ko nki isunzulanga?

⁷ Muna fuku wauna, Yesu wasadila mbolo ke zafuna ko zasuva muna lambu dia Nduta. (Luvaiku 12:8) Ezak’e ntangwa Nkand’a Nzambi usadilanga e mfuna muna yika e sumu. (Matai 16:6, 11, 12; Luka 12:1) E mbolo ke yafuna ko kasadila o Yesu, nitu andi yakondw’e sumu isunzulanga. (Ayibere 7:26) Ekiaki i kuma tusadilanga e mbolo ke yafuna ko muna lumbu kia Luyindulu.

 8. E vinyu nki isunzulanga?

⁸ E vinyu kasadila o Yesu menga mandi yovo moyo andi isunzulanga. Diau dimosi mpe ye vinyu tusadilanga o unu. Vana fulu kiayikilwanga vo Ngolongota, kiakala kuna mbazi a mbanza Yerusaleme, Yesu wafwa mu kuma kieto yo vana moyo andi “muna luyambulwilu lua masumu.” (Matai 26:28; 27:33) Avo tuvutulanga matondo muna lukau lwalu lwantalu, tukala twakubama konso mvu muna lungana muna nkinzi wau wamfunu. Aweyi tulenda kubamena?

 9. (a) Ekuma tufwete sadilanga e nkubika ya tanga e sono ya Nkand’a Nzambi mu kuma kia Luyindulu? (b) Aweyi omonanga mu kuma kia lukûlu?

⁹ Imosi muna mpila tulenda kubamena mu kuma kia Luyindulu, i landanga e nkubika ya tanga sono ya Nkand’a Nzambi mu kuma kia Luyindulu ina muna finkanda Fimpanga e Sono Lumbu Yawonso. O tanganga e sono dikutusadisa mu badika mana Yesu kavanga vitika kafwa.a Mpangi mosi ankento wasoneka vo: “Tuvingilanga ye kiese kiawonso e lumbu kia Luyindulu. E nsas’a lumbu kiaki iwokelanga konso mvu. Isungamenanga lumbu kimosi yakala ku luziku. . . , yatalanga se diame yo yindula e nluta mia lukûlu. . . . Elo, yasungamenga e sono yawonso ye una ndenda yo sasila! Kansi vava kaka yayindula e mfwilu mitwasanga lufwa, o ntim’ame wazala ye kiese mu kuma kia nluta mitwasa lukûlu.” O badika e nluta tuvwa mu kuma kia kimenga kia Yesu i mosi muna mpila tulenda kubamena mu kuma kia Luyindulu.

10. Adieyi diaka tulenda vanga mu kubama mu kuma kia Luyindulu?

¹⁰ E mpila yankaka tulenda kubamena i wokesa e ola za salu kia umbangi yo bokela wantu ayingi kimana beza muna Luyindulu. Tulenda wo vanga muna sala se aviti a nzila ansadisi. Vava tumokenanga y’akaka mu kuma kia Nzambi, Mwan’andi ye vuvu kia moyo a mvu ya mvu, tukalanga ye kiese mu zaya vo tuvangidi mana Nzambi kekutulombanga vo twavanga.—Nkunga 148:12, 13.

11. Ekuma Paulu kavovela vo esi Korinto akaka badianga e mbolo yo nua vinyu muna Luyindulu lembi kala bafwana?

¹¹ Vava tukubamanga mu kuma kia Luyindulu, tufwete badikanga dina Paulu kasonekena Akristu kuna Korinto. (Tanga 1 Korinto 11:27-34.) Paulu wavova vo konso ona odia mbolo yo nua e vinyu lembi kala wafwana, ‘nkanu kenata muna nitu yo menga ma Mfumu.’ Muna kuma kiaki, avo Nkristu akuswa odidi e mbolo yo nua vinyu kansi okuyivananga muna mavangu mambi, ‘muna dia yo nua i kekuyisilanga muna mfundu.’ Muna lumbu ya Paulu, esi Korinto ayingi bayivananga muna mavangu mambi. Dilenda kala vo akaka muna yau tezo baviokesanga muna dia yo nua vitila yovo muna ntangw’a Luyindulu yo leka tulu. Wantu awaya ke bazitisanga lumbu kiaki ko. Muna kuma kiaki, Nzambi kabatondanga ko vava badianga mbolo yo nua vinyu.

12. (a) O Paulu ye nki katezanesa Luyindulu? Nkia lulukisu kavana kw’awana badianga e mbolo yo nua vinyu? (b) Avo ndiona odianga e mbolo yo nua vinyu ovolele sumu diampwena, adieyi kafwete vanga?

¹² Muna tezanesa Luyindulu ye lambu, Paulu walukisa ana badianga e mbolo yo nua vinyu vo: “Ke nulendi nua mbungw’a Yave ye mbungw’a nkuya ko; ke nulendi dila vana ‘meza ma Yave’ ko ye vana meza ma nkuya.” (1 Korinto 10:16-21) Avo muntu odianga e mbolo yo nua vinyu ovolele sumu diampwena, kafwete vava lusadisu kwa akuluntu. (Tanga Yakobo 5:14-16.) Avo mavangu mandi masongele vo ovilukidi kieleka o ntima, ke kondwa luzitu ko muna kimenga kia Yesu vava kedia e mbolo yo nua vinyu muna Luyindulu.—Luka 3:8.

13. Ekuma tufwete sambilanga mu kuma kia vuvu katuvana o Nzambi?

¹³ Tulenda mpe kubama mu kuma kia Luyindulu muna sambanga yo badika e vuvu katuvana o Nzambi. Ke tuzolele kondwa luzitu ko muna kimenga kia Yesu. Muna kuma kiaki, avo ke tuna kikilu ye ziku ko vo tu akuswa, ke tufwete dia mbolo ko ngatu nua vinyu. Ozevo, nani ofwete dia mbolo yo nua vinyu muna Luyindulu?

14. Wau vo akuswa mu kangu diampa bena, adieyi bevanganga muna Luyindulu?

¹⁴ Awana bedianga e mbolo yo nua vinyu muna Luyindulu bena kikilu ye ziku vo mu kangu diampa bena. Yesu wavova mu kuma kia vinyu vo: ‘E mbungwa yayi kangu diampa isunzulanga muna menga mame.’ (1 Korinto 11:25) Yave wakanga kangu dia Nsiku ye Aneyisaele. Kansi, kuna kwalanda wavova vo ovingisa dio ye kangu diampa. (Tanga Yeremiya 31:31-34.) Yave wakanga kangu diadi ye Akristu akuswa. (Ngalatia 6:15, 16) Lufwa lwa Yesu i lwasikidisa kangu diadi. (Luka 22:20) Yesu i Nkambami a kangu diampa. Akuswa ana bena muna kangu diampa bekala yo Yesu kuna zulu.—Ayibere 8:6; 9:15.

15. Aki nani bena muna kangu dia Kintinu? Nkia lau bevwa avo basikidi ye kwikizi?

¹⁵ Akristu akuswa bazeye wo vo mu kangu dia Kintinu mpe bena. (Tanga Luka 12:32.) E kangu diadi diakangwa vana vena Yesu ye alandi andi akuswa, ana bakala entwadi muna “mpasi zandi.” (Filipi 3:10) O unu, akuswa ana besonganga kwikizi bena mpe muna kangu diadi. Besinga yala yo Kristu kuna zulu yakwele mvu. (Lusengomono 22:5) Bafwana dia mbolo yo nua vinyu muna Nlekelo a Mfumu.

16. Muna lukufi, yika e nsas’a sono kia Roma 8:15-17.

¹⁶ Akuswa bena kikilu ye ziku vo wan’a Nzambi, balenda dia e mbolo yo nua vinyu. (Tanga Roma 8:15-17.) Paulu wavova vo akuswa bekazanga vo “Aba, e Tata.” Muna ndinga Ki-aramiti, o mvovo “Aba” usadilwanga mu bokela o se mu mpila ya kikundi nze “e papa,” ye mu mpila ya luzitu nze “e tata.” O mvovo wau usonganga e ngwizani bena yau akuswa yo Yave vava betambulanga o “mwand’a kiwana.” O mwand’a Nzambi “usianga umbangi” yo yau kimana bakala kikilu ye ziku vo wan’andi akuswa. Ediadi ke disongele ko vo ke bazolele diaka zingila va ntoto ko. Bazeye wo vo avo basikidi ye kwikizi yamuna lufwa, beyala kumosi yo Yesu nze atinu kuna zulu. Bazeye wo mpe vo ‘bakuswa kwa ndiona wavauka,’ i sia vo, Yave. O unu, akete kaka vana vena 144.000 ma wan’a Nzambi bakinu ova ntoto. (1 Yoane 2:20; Lusengomo 14:1) Wau vo ngwizani ambote bena yau yo Yave, bekunyikilanga vo “Aba, e Tata.”

17. Nkia vuvu bena kiau Akristu akuswa? Aweyi bezayilanga vo akuswa?

¹⁷ Avo u Nkristu akuswa, nanga nkumbu miayingi ovovelanga e vuvu kiaku kia kwenda kuna zulu vava osambanga. E sono ya Nkand’a Nzambi nsasa yankaka ikalanga kwa ngeye. Kasikil’owu, vava Nkand’a Nzambi uvovelanga longo lukala kuna zulu vana vena Yesu ye ‘ndumb’ansompi,’ obakulanga vo e sono kiaki ngeye kivovele ye ovingilanga longo lwalu. (Yoane 3:27-29; 2 Korinto 11:2; Lusengomono 21:2, 9-14) Yovo, vava Nkand’a Nzambi uvovelanga zola kwa Nzambi muna akuswa, obakulanga vo ngeye uvovele. Vana ntandu, vava otanganga muna Diambu dia Nzambi o tuludiku tuvewanga kwa Akristu akuswa, o mwand’avelela ukufilanga mu lemvokela tuludiku twatu. Mwand’avelela a Nzambi usianga umbangi yo ngeye vo vuvu kia kwenda kuna zulu una kiau.

18. Nkia vuvu bena kiau “mameme makaka”? Aweyi omonanga mu kuma kia vuvu kiaki?

¹⁸ Avo u mosi muna “ndong’ayingi” ya “mameme makaka,” Nzambi wavana e lau dia zinga yakwele mvu muna Paradiso ova ntoto. (Lusengomono 7:9; Yoane 10:16) Aweyi obadikilanga e vuvu kiaku? O ntim’aku uzalanga ye kiese vava obadikanga dina Nkand’a Nzambi uvovanga mu kuma kia Paradiso. Ovingilanga ye kiese kiawonso e lumbu osinga zingila va nza ya luvuvamu kumosi ye yitu ye akundi aku. Ozolele vo e nzala, usukami, mpasi, mayela ye lufwa lwafokoka emvimba. (Nkunga 37:10, 11, 29; 67:6; 72:7, 16; Yeseya 33:24) Una ye tima dia monana diaka ye azolw’aku ana bafwa. (Yoane 5:28, 29) Ka lukatikisu ko vo ovutulanga matondo kwa Yave mu kuma kia vuvu kiaki. Kana una vo kudianga mbolo ko ngatu nua vinyu, okalanga muna Luyindulu kadi ovutulanga matondo muna kimenga kia Yesu.

19, 20. (a) Adieyi ofwete vanga muna zinga yakwele mvu? (b) Ekuma ozolele kadila muna Luyindulu?

¹⁹ Avo osongele lukwikilu muna Yave, Yesu ye muna lukûlu, olenda zinga yakwele mvu, kiakala ova ntoto yovo kuna zulu. Vava okalanga muna Luyindulu, badikanga e vuvu una kiau ye mfunu a lufwa lwa Yesu. Kina kia 3 kia Abidi kuna nim’a ndimuk’a ntangwa, mazunda ye mazunda ma wantu mu nz’amvimba bekala muna nkinzi a Luyindulu muna Maseka ma Kintinu yovo mu fulu yankaka.

²⁰ Vava tukubamanga yo nyindu asikila mu kuma kia Luyindulu, tusonganga vo tuvutulanga matondo muna kimenga kia Yesu. Avo otomene tamb’o matu muna longi dia Luyindulu, ediadi dikufila mu songa zola kw’akaka yo kubalonga oma ma zola kwa Yave ye kani diandi mu kuma kia yeto awonso. (Matai 22:34-40) Muna kuma kiaki, kubama kimana wakala muna Luyindulu.