‘Nuenda, Nuakitula Wantu se Alongoki’

1-2. (a) Landila nkanikinu wa Yesu wasonama muna Matai 28:18-20, ayeyi i mbebe yantete ya nkutakani ya Kikristu? (b) Nkia yuvu tubakila e mvutu mu longi diadi?

ANTUMWA kiese kiayingi bakala kiau vava bakutakana vana ndambu a mongo. Kuna nim’a lufuluku lwandi, Yesu wavanga e nkubika kimana kawanana ye ntumwa zandi vana mongo wauna. (Mat. 28:16) Nanga i mu kolo kiaki ‘kamoneka kwa vioka 500 za mpangi mu nkumbu mosi.’ (1 Kor. 15:6) Ekuma Yesu kabokelela alongoki andi mu lukutakanu lwalu? Muna kubavana salu kimosi kiamfunu: “Dianu vo, nwenda, nwakitula wantu a zula yawonso se alongoki.”—Tanga Matai 28:18-20.

² Alongoki ana bawá e mvovo mia Yesu yau bakituka yîkwa yantete ya nkutakani ya Kikristu muna tandu kiantete. E mbebe yantete ya nkutakani yayi i kitula wantu ayingi se alongoki a Kristu.b O unu, vena ye tezo kia 120.000 ma nkutakani mu nza yawonso. E nkutakani zazi mpe zina ye mbebe ya kitula wantu se alongoki. E longi diadi divana e mvutu za yuvu yá: Ekuma e salu kia kitula wantu se alongoki kinina kiamfunu kikilu? Adieyi divavuanga muna kitula wantu se alongoki? Nga Akristu awonso bafwete yikama e salu kia kitula wantu se alongoki? Ekuma tufwete kadilanga ye luzindalalu mu salu kiaki?

 3. Landila e sono kia Yoane 14:6 ye 17:3, ekuma e salu kia kitula wantu se alongoki kinina kiamfunu kikilu?

³ Ekuma e salu kiakitula wantu se alongoki kinina kiamfunu kikilu? Kadi muna kala nkundi a Nzambi, o muntu kafwete kituka nlongoki a Kristu. Vana ntandu, awana belandanga Kristu bena ye zingu kiakiese o unu, bena mpe ye vuvu kia zinga yakwele mvu. (Tanga Yoane 14:6; 17:3.) Dialudi vo Yesu mbebe ampwena katuvana, kansi ke yeto mosi kaka ko tusalanga e salu kiaki. Paulu wasoneka mu kuma kiandi ye akundi andi vo: “Tu asadi kumosi yo Nzambi.” (1 Kor. 3:9) Kana una vo tu wantu alembi lunga, Yave yo Kristu batuvana lau diampwena kikilu!

 4. Adieyi tulenda longoka muna mbandu a mpangi Ivan yo Matilde?

⁴ E salu kia kitula wantu se alongoki kilenda kututwasila kiese kiayingi. Badika e nona kia mpangi Ivan yo nkaz’andi Matilde kuna Colômbia. Basila umbangi kwa toko dimosi una ye nkumbu a Davier ona wabavovesa vo: “Nzolele soba e zingu kiame, kansi kilendanga ko.” Davier walongoka e nsaka za nuana, wanuanga mfomo, kolwa malavu yo zinga kumosi yo Erika wa makangu mandi. Mpangi Ivan wavova vo: “Twayantika kwenda kunkingula kuna vata diandi diakala kwandá. Muna ko lwaka, diavavanga vo twakangala ola zayingi muna mvelo mu nzila yazala ye nteke. Vava Erika kamona e mpila Davier kasobela e kadilu kiandi, wayantika mpe longoka o Nkand’a Nzambi.” Kuna kwalanda, Davier wayambula nua mfomo, kolwa malavu ye nsaka za nuana. I bosi, wakazala yo Erika. Mpangi Matilde wavova vo: “Vava Davier yo Erika bavubwa muna mvu wa 2016, twasungamena dina Davier kavovanga: ‘Nzolele soba e zingu kiame, kansi kilendanga ko.’ Twavaika mansanga mu kuma kia kiese.” Ka lukatikisu ko vo kiese kiayingi tumonanga vava tusadisanga wantu mu kituka se alongoki a Kristu.

 5. Nkia diambu diantete tufwete vanga muna kitula wantu se alongoki?

⁵ E diambu diantete tufwete vanga muna kitula wantu se alongoki i ‘vava’ awana bazolele longoka oma ma Yave. (Mat. 10:11) Tusonganga vo tu Mbangi za Yave vava tuvovelanga oma ma Yave kwa wantu tuwanananga yau muna zunga kieto. Vava tulemvokelanga o nkanikinu wa Kristu wa samuna e nsangu zambote, tusonganga vo tu Akristu akieleka.

 6. Adieyi dilenda kutusadisa mu sila umbangi una ufwene?

⁶ Muna salu kia umbangi, tuwanananga ye wantu ayingi bena ye tima dia longoka e ludi kia Nkand’a Nzambi. Kansi, akaka ke bezolanga wá nsangu tusamunanga ko. Divavanga vo twasikamesa o luzolo lwau lwa longoka e ludi kia Nkand’a Nzambi. Muna sila umbangi una ufwene, tufwete toma kubamanga. Solanga e mambu masikididi malenda tunta e sungididi kia wantu. I bosi, vava una olenda yantikila e moko.

 7. Aweyi olenda yantikila e moko yo muntu? Ekuma dinina diamfunu mu tamba o matu kwa muntu yo zitisa e ngindu zandi?

⁷ Kasikil’owu, olenda yuvula kwa muntu vo: “Nga ndenda zaya e ngindu zaku mu kuma kia diambu dimosi? Wantu awonso ova nza bewanananga ye mambu mayingi mampasi. Adieyi obenze, nga vena ye luyalu lulenda fokola e mpasi za wantu?” I bosi, olenda vovela e sono kia Daniele 2:44. Olenda mpe yuvula kwa muntu vo: “Muna ngindu zaku, azeyi i nsabi muna toma sansa o wana?” I bosi, vovela e sono kia Nsiku 6:6, 7. Kiakala nkia diambu ozolele vovela, yindulanga o wantu ana omokena yau. Yindula e nluta balenda vua avo balongokele dina Nkand’a Nzambi ulonganga. Vava omokenanga yo muntu, diambote mu toma kuntamba o matu yo zitisa e ngindu zandi. Muna mpila yayi, olenda bakula e ngindu zandi ye diasazu dikala kwa yandi mu wá mana okumvovesa.

 8. Ekuma tufwete vutukilanga kingula o wantu nkumbu miayingi?

⁸ Vitila o muntu kabaka e nzengo za longoka o Nkand’a Nzambi, ntangwa ye ngolo divavanga muna kunkingula nkumbu miayingi. Ekuma? Dilenda kala vo ke wanuka ku nzo ko vava tuvutuka kunkingula. Vana ntandu, dilenda vava vo wavutukila kingula o muntu nkumbu miayingi vitila katambulwila longoka Nkand’a Nzambi. Sungamena vo, o nti muna toma kula divavanga vo wayitilwanga o maza nkumbu miayingi. Diau dimosi mpe, o zola kwa muntu muna Yave yo Kristu kulenda wokela avo tumokene yandi oma ma Nkand’a Nzambi nkumbu miayingi.

9-10. Ekuma tulenda vovela vo Akristu awonso besalanga entwadi muna vava akwa ntima miansongi?

⁹ Akristu awonso bafwete yikamanga e salu kia vava akwa ntima miansongi. Tulenda tezanesa e salu kiaki ye salu kia vava o mwana ovididi. Mu nkia mpila? Yindula dina diavangama vava kindende kimosi kia mvu tatu kavila. Tezo kia 500 za wantu basadisa muna kumvava. I bosi, vava vavioka ola 20, mosi muna yau wasolola kindende kiaki muna mpatu a masangu. O muntu ndioyu kazola kuyibunda ntulu ko wau kasolola kindende kiakina. Wavova vo: “Wantu ayingi basala entwadi muna kunsolola.”

¹⁰ Wantu ayingi bena nze kindende kiaki kadi bavila bena. Ke bena ye vuvu ko, kansi lusadisu bavuidi o mfunu. (Ef. 2:12) Vioka milhões nana za wantu besalanga entwadi mu vava akwa luzolo lwambote. Dilenda kala vo kwasolwele muntu ko una ye luzolo lwa longoka o Nkand’a Nzambi. Kansi, ateleki akaka besalanga muna zunga kieno balenda solola wantu ana bazolele longoka e ludi kia Diambu dia Nzambi. Avo mpangi mosi osolwele muntu okitukidi se nlongoki a Kristu, awonso ana basadisa muna kunsolola bena ye kuma kia mona e kiese.

11. Kana nkutu vo kuna ye nlongoki ko, nkia mpila zankaka olenda yikamena e salu kia kitula wantu se alongoki?

¹¹ Kana nkutu vo kuna ye nlongoki a Nkand’a Nzambi ko, olenda yikama e salu kia kitula wantu se alongoki mu mpila zankaka. Kasikil’owu, avo omwene muntu ampa wizidi mu Seka dia Kintinu, olenda kunkayisa yo kumvana lusadisu kavuidi o mfunu. Avo osongele zola mu mpila yayi, olenda kunsadisa kabakula vo tu Akristu akieleka. (Yoa. 13:34, 35) Kana nkutu muna mvutu zaku zankufi, olenda longa wantu ampa una balenda vanina e mvutu ye ziku kiawonso ye kuna luzitu. Olenda mpe vaika yo nteleki ampa muna salu kia umbangi yo kunsadisa mu sadila Nkand’a Nzambi muna longa o wantu. Avo ovangidi wo, olenda sadisa nteleki ampa mu zaya una kalenda tanginina Kristu.—Luka 10:25-28.

12. Nga divavanga vo twakala ye ngangu zayingi muna kitula o wantu se alongoki? Yika e nona.

¹² Ke divavanga ko vo twakala ye ngangu zayingi muna kitula o wantu se alongoki a Yesu. Ekuma? Badika e nona kia mpangi Faustina ozingilanga kuna Bolívia. Kazayanga tanga ko vava kazaya e Mbangi za Yave. O unu mpangi Faustina ozeye tanga fioti. Wavubwa se Mbangi a Yave ye ozolanga longa akaka. Konso lumingu, olongokanga Nkand’a Nzambi ye wantu tanu. Ayingi muna alongoki a mpangi Faustina bazeye toma tanga. Kana una vo i wau, alongoki sambanu kasadisi kala mu baka e nzengo za vubwa.—Luka 10:21.

13. Kana una vo salu yankaka tuna yau, nkia nluta tulenda baka avo tuyivene muna salu kia kitula wantu se alongoki?

¹³ Akristu ayingi belungisanga salu yankaka yamfunu. Kana una vo i wau, bevaulanga e ntangwa ya longoka Nkand’a Nzambi yo wantu. Ediadi kiese kiayingi dikubatwasilanga. Kasikil’owu, mpangi mosi ankento una ye nkumbu a Melanie ozingilanga kuna Alasca, yandi mosi kaka wasansanga mwan’andi ankento wakala ye kimbuta kia mvu nana. O mpangi ankento wasalanga lumbu kiamvimba kuna salu yo lunga-lunga se diandi wayelanga e kimbevo kia câncer. Mpangi Melanie yandi mosi kaka wakala Mbangi a Yave muna mbanza kazingilanga. Muna kuma kiaki, wasambanga kwa Yave kimana kansadisa mu zizidila e kiozi yo vaika muna salu kia samuna e nsangu zambote. Wakala ye tima dia solola muntu kalenda longoka yandi o Nkand’a Nzambi. Lumbu kimosi, wasila umbangi kwa Sara yo kunzayisa vo Nzambi una ye nkumbu. Sara wayangalala kikilu. Ke vavioka kolo kiayingi ko, Sara watambulwila longoka Nkand’a Nzambi. Mpangi Melanie wavova vo: “Konso Kiatanu muna fuku, yayoya yakalanga. Kana una vo i wau, mono yo mwan’ame twayendanga longoka yandi o Nkand’a Nzambi. Ediadi nluta miayingi diatutwasilanga. Twavavululanga ye kiese kiawonso e mvutu za yuvu ya Sara. Vana ntandu, twayangalala mu mona vo Sara wakituka nkundi a Yave.” Sara wazizidila e kitantu kuna unkabu wawonso, wavaika muna dibundu diandi yo vubwa se Mbangi a Yave.

14. (a) Aweyi e salu kia kitula wantu se alongoki kinina nze salu kia lowa mbizi za maza? (b) Adieyi olenda longoka muna mvovo mia Paulu miasonama muna 2 Timoteo 4:1, 2?

¹⁴ Kana nkutu vo kwasolwele muntu ko ozolele kituka se nlongoki a Yesu, kuyoyi ko. Yesu watezanesa e salu kia kitula wantu se alongoki nze salu kia lowa mbizi za maza. Abaki a mbizi ola zayingi beviokesanga vitila babaka e mbizi. Nkumbu miayingi, besalanga muna fuku yovo mu mene-mene. Ezak’e ntangwa bekwendanga kwandá. (Luka 5:5) Diau dimosi mpe, ateleki ayingi beviokesanga ola zayingi muna vava o wantu mu ntangwa ye fulu yaswaswana. Ekuma? Muna kala ye lau dia wanana yo wantu. Awana bevanganga e ngolo besambulwanga kadi bewanananga yo wantu bena ye luzolo lwa wá e nsangu tusamunanga. Nga olenda teza samuna e nsangu zambote muna ola olenda wanana yo wantu yovo mu fulu ina olenda kubasololwela?—Tanga 2 Timoteo 4:1, 2.

15. Ekuma divavilanga vo twakala ye luzindalalu vava tulongokanga Nkand’a Nzambi yo wantu?

¹⁵ Ekuma divavilanga vo twakala ye luzindalalu vava tulongokanga Nkand’a Nzambi yo wantu? Kimosi muna kuma i kia sia vo e salu kieto ke sadisa kaka nlongoki ko mu zaya yo yangalela malongi ma Nkand’a Nzambi. Tufwete mpe kunsadisa mu zaya yo zola Yave wa Nsonekesi a Nkand’a Nzambi. Vana ntandu a sadisa o nlongoki mu zaya mana Yesu kakanikina kwa alongoki andi, tufwete mpe sadisa o nlongoki mu zaya una kalenda sadila e nkanikinu miami muna zingu kiandi. Kuna luzindalalu lwawonso, tufwete kunsadisanga ekolo kesianga e ngolo za sadila e nkanikinu mia Nkand’a Nzambi. Alongoki akaka ngonde zakete kaka bevanganga mu soba e ngindu ye fu yau, kuna kwa akaka ntangwa divavanga muna wo vanga.

16. Adieyi olongokele muna mbandu a Raúl?

¹⁶ E nona kia misionario mosi kuna Perú kisonganga e nluta mia songa luzindalalu. Wavova vo: “Yalongoka nkanda miole ye nlongoki una ye nkumbu a Raúl. Kansi, mpasi zayingi kanuananga zau muna zingu kiandi. Kasikil’owu, wanuananga ye mambu mampasi muna longo, wasadilanga e mvovo mia losola-losola ye wakala yo wana ana ke banzitisanga ko. Kansi, kakondwanga ko muna tukutakanu. Muna kuma kiaki, yakwamanana kunkingula muna kunsadisa kumosi ye esi nzo andi. Vioka mvu tatu tuka yazayanena yandi, wakifwanisa muna luvubu.”

17. Adieyi tuvovela muna longi dilanda?

¹⁷ Yesu watuvovesa vo: “Nwenda, nwakitula wantu a zula yawonso se alongoki.” Muna lungisa e mbebe yayi, nkumbu miayingi tuwanananga yo wantu bena ye ngindu zaswaswana ye zeto, musungula awana ke bena ye dibundu ko yovo awana ke bekwikilanga mu Nzambi ko. Muna longi dilanda tuvovela una tulenda samunuina e nsangu zambote kwa wantu awaya.