Vananga Lusadisu Muna Nkutakani Aku

Mu nza yawonso, wantu ayingi besambilanga Yave muna ulolo wa nkutakani. Bevutulanga matondo muna malongi ye luludiku betambulanga ye bazolele vana lusadisu muna nkutakani muna mpila zayingi. Nga i wau mpe omonanga mu kuma kia nkutakani aku?

1. Aweyi olenda sadila ntangwa ye ngolo zaku mu vana lusadisu muna nkutakani?

Yeto awonso tulenda vana lusadisu muna nkutakani. Muna bonga e nona, nga mpangi zankaka muna nkutakani aku anunu yovo ambevo? Nga olenda kubasadisa muna kubanata muna tukutakanu? Yovo olenda kubasadisa mu mpila zankaka nze kubasumbila madia yovo velelesa nzo zau? (Tanga Yakobo 1:27.) Tulenda mpe kukivana muna velelesa yo vangulula e Seka dieto dia Kintinu. Ke muntu ko okutukomekenanga mu sala e salu yayi. O zola kweto muna Nzambi ye muna mpangi zeto kukutufilanga mu ‘kuyivana kuna mvevo.’—Nkunga 110:3.

Mbangi za Yave ana bavubwa balenda vana lusadisu muna nkutakani mu mpila zankaka. Mpangi z’amakala ana bazikuka balenda kuyifwanisa mu kituka selo ya salu yovo akuluntu. Mpangi z’amakala ye z’amakento balenda yikama e salu kia samuna e sangu zambote muna salanga se aviti a nzila. Mbangi za Yave zankaka balenda kukivana muna tunga fulu yeto ya nsambila yovo kwenda sadila muna nkutakani zivuidi lusadisu o mfunu.

2. Aweyi tulenda sadila mavua meto mu vana lusadisu muna nkutakani?

Tulenda ‘zitisa Yave muna lekwa yeto yantalu.’ (Ngana 3:9) Tukalanga ye kiese kia vana nkayilu mia nzimbu yovo lekwa yankaka mu sadisa nkutakani zeto yo yikama salu kia samuna e nsangu zambote mu nza yawonso. (Tanga 2 Korinto 9:7.) O tukau tweto tusadilwanga mpe mu sadisa awana babwidilu sumbula. Mpangi zayingi ‘belundanga lekwa’ mu tambika yo se lukau. (Tanga 1 Korinto 16:2.) Tulenda mpe sia tukau tweto muna nkela zikalanga muna fulu yeto ya nsambila yovo sadila nzil’eto ya internete vana fulu kia sonama donate.jw.org. Tusonganga zola kweto kwa Yave vava tusadilanga nzimbu ye mavua meto muna sadisa e nkutakani.

ZAYA DIAKA MANKAKA

3. Sadisanga e nkutakani aku muna vananga nkayilu

Yave yo Yesu bezolanga awana bevaninanga kuna mvevo. Muna bonga e nona, Yesu wasanisina nkento ansona ona wakala nsukami, kansi wavana yawonso kakala yau se nkayilu kwa Yave. Tanga Luka 21:1-4, i bosi, vana e mvutu za yuvu eyi:

• Nga tufwete vana nzimbu zayingi muna yangidika Yave?

• Yave yo Yesu, aweyi bemonanga vava tuvananga tukau kuna mvevo?

Muna zaya una usadilwanga tukau tweto, tala e VIDEO. I bosi, vana e mvutu za kiuvu kilende.

VIDEO: ‘Lukau Lwamvevo kwa Yave’ (4:47)

• Aweyi tukau tweto tusadilwanga muna sadisa e nkutakani mu nza yawonso?

4. Tulenda kuyivana kuna mvevo wawonso

Kuna nz’ankulu, asambidi a Yave bavanganga ngolo mu vangulula e fulu yau ya nsambila. Kansi muna wo vanga, ke nzimbu kaka ko bavuanga o mfunu. Tanga 2 Tusansu 34:9-11, i bosi, vana e mvutu za kiuvu eki:

• Aweyi Aneyisaele awonso bavaninanga lusadisu mu lunga-lunga nzo a Yave?

Muna zaya una Mbangi za Yave belandilanga e mbandu yayi, tala e VIDEO. I bosi, vana e mvutu za yuvu ilende.

VIDEO: Tulunga-lunganga e Fulu Yeto ya Nsambila (3:31)

• Ekuma tufwete veleleselanga yo vangulula Maseka meto ma Kintinu?

• Nkia mpila zankaka olenda vanina lusadisu?

5. Mpangi z’amakala balenda kukifwanisa mu vanga mayingi muna nkutakani

Bibila kikasakesanga mpangi z’amakala mu kukifwanisa yo vanga mana balenda mu sadisa e nkutakani. Muna bonga e nona, tala e VIDEO. I bosi, vana e mvutu za kiuvu kilende.

VIDEO: Mpangi z’Amakala—Nukifwanisa Muna Salu Kiambote (5:19)

• Nze una omwene muna video, adieyi mpangi Ryan kavanga mu vana lusadisu muna nkutakani una ufwene?

Bibila kiyikanga mana mpangi z’amakala bafwete lungisa mu tumbikwa se selo ya salu yovo akuluntu. Tanga 1 Timoteo 3:1-13, i bosi, vana e mvutu za yuvu eyi:

• Nkia fu bafwete songanga mpangi z’amakala muna kuyifwanisa se selo ya salu yovo akuluntu?

• Nkia fu esi nzo zau bafwete songanga?—Tala tini kia 4 ye 11.

• Vava mpangi z’amakala bevanganga ngolo za songa e fu yayi, nkia nluta ditwasanga kwa mpangi zawonso muna nkutakani?

MAMBU MASINA MA LONGI DIADI

Yave oyangalelanga e ngolo tuvanganga muna sadila ntangwa, ngolo ye mavua meto mu sadisa e nkutakani.

Nkia Mambu Olongokele?

• Aweyi tulenda sadila ntangwa ye ngolo zeto mu sadisa e nkutakani?

• Aweyi tulenda sadila mavua meto mu sadisa e nkutakani?

• Mu nkia mpila ozolele sadisila e nkutakani?

TALA MPE OMA MALENDE

Tala e kuma Nzambi kelombelanga diaka tini kia kumi ko kwa asambidi andi.

“Adieyi Bibila Kivovanga mu Kuma kia Tini kia Kumi?” (Longi dina muna jw.org)

Bibila kivananga yiyekwa yankaka kwa mpangi zamakala bavubwa. Kansi, adieyi tuvova avo divavidi vo mpangi ankento kavanga yiyekwa yayi?

“Wisa kia Akuluntu Muna Nkutakani” (Eyingidilu, Fevelelo 2021)

Zaya Mbangi za Yave ana basonga unkabu mu natina mpangi zau e nkanda.

Una e Nkanda Milwakilanga Muna Zunga Yankaka ya Congo (4:25)

Nswaswani ye mabundu mankaka, akweyi kutukanga e nzimbu zisadilwanga e salu kieto?

“Akweyi Kutukanga e Nzimbu Zisadilwanga e Salu kia Mbangi za Yave?” (Longi dina muna jw.org)