Aweyi Yave Kekutaninanga?

 1. Ekuma Yesu kalombela kwa Yave vo katanina alongoki andi?

MUNA fuku wansuka wa zingu kiandi ova ntoto, Yesu wayindula e mpasi zawonso zibwila alongoki andi. Wau vo wazolanga alongoki andi, Yesu walomba kwa Se diandi kimana ‘kabatanina mu kuma kia ndiona wambi.’ (Yoa. 17:14, 15) Yesu wazaya wo vo vava kevutuka kuna zulu, Satana wa Nkadi ampemba okwamanana nuanisa awana bazolele sadila Yave. Muna kuma kiaki, o nkangu a Yave lutaninu bevua o mfunu.

 2. Nkia ziku tuna kiau vo Yave owá e sambu yeto?

² Yave wavanga dina Yesu kalomba muna sambu kadi otoma zolanga o Mwan’andi. Muna kuma kiaki, avo tuvangidi mawonso muna yangidika Yave, okutuzola mpe. Avo tunlombele lusadisu yo lutaninu muna sambu, wá kekutuwá. Wau vo Yave Se dianzodi, okwamanana lunga-lunga o wan’andi. Avo kavangidi wo ko, ediadi difusulwisa nkumbu andi e nsoni.

 3. Ekuma tuvuididi lutaninu lwa Yave o mfunu?

³ O unu, lutaninu lwa Yave tuvuidi o mfunu ke mu tandu yavioka ko. Kadi Satana “makasi mayingi kena mau” wau kayingwa kuna zulu. (Lus. 12:12) Ofilanga wantu ankaka mu yindula vo vava bekutubangikanga ‘Nzambi besadilanga e salu kiavauka.’ (Yoa. 16:2) Akaka muna awana ke bekwikilanga muna Nzambi ko, bekutubangikanga kadi twaswaswana yo wantu a nza. Kiakala nkia kuma kikubafilanga mu kutubangika, ke tufwete mona wonga ko. Ekuma? E kuma kadi e Diambu dia Nzambi divovanga vo: “O Mfumu nkwa kwikizi, okunukumika yo kunutanina muna ndiona wambi.” (2 Tes. 3:3) Ozevo, aweyi Yave kekututaninanga? Yambula twavovela mpila zole kevangilanga wo.

 4. Landila e sono kia Efeso 6:13-17, nkia lekwa Yave katuvana muna kututanina?

⁴ Yave watuvana e nuaninua ya mwanda kimana yatutanina muna maswanga ma Satana. (Tanga Efeso 6:13-17.) E nuaninua yayi ya mwanda yangolo kikilu ye itoma salanga. Kansi, avo tuzolele vo yatutanina, tufwete vuata e nuaninua yayi yawonso. Ozevo, konso nuaninua nki kisunzulanga? Yambula twavovela nuaninua kimosi-kimosi.

 5. E mpond’a ludi, nki isunzulanga? Ekuma tufwete yo vuatila?

⁵ E mpond’a ludi, isunzulanga e ludi kina muna Bibila, i sia vo, Diambu dia Nzambi. Ekuma tufwete vuatilanga e mponda yayi? E kuma kadi Satana i “se dia luvunu.” (Yoa. 8:44) Mafunda ye mafunda ma mvu kavunini kala ye “ovukumunanga nza yawonso.” (Lus. 12:9) Kansi, e ludi kina muna Bibila kikututaninanga mu lembi vunua. Ozevo, aweyi tulenda vuatila e mponda yayi? Tulenda yo vuata muna longokanga e ludi mu kuma kia Yave, muna kunsambilanga “muna mwanda ye ludi” yo kala akwa ziku muna mambu mawonso.—Yoa. 4:24; Efe. 4:25; Ayib. 13:18.

 6. E nkikw’a tulu a unsongi, nki kisunzulanga? Ekuma tufwete kio vuatila?

⁶ E nkikw’a tulu a unsongi, kisunzulanga e nkanikinu miansongi mia Yave. Ekuma tufwete kio vuatila? Kuna nz’ankulu, e nkikw’a tulu kiataninanga o ntim’a soladi kimana walembi telwa kwa nsosolo yovo dionga. Diau dimosi, e nkikw’a tulu a unsongi kitaninanga o ntim’eto, i sia vo, kiwuntu kieto kiakati kimana kialembi vukumunua kwa nza yayi. (Nga. 4:23) Yave ovavanga vo twanzola yo kunsadila yo ntim’eto wawonso. (Mat. 22:36, 37) Kansi, Satana ovanganga mawonso kimana twayambula sadila Yave yo ntima wawonso, muna kutufila twazolanga e lekwa ya nza yayi ina Yave kemenganga. (Yak. 4:4; 1 Yoa. 2:15, 16) Avo e ndekwa zazi ke zitwese nluta ko, Satana osadilanga lubangamu muna kutufila twakolamena nkanikinu mia Yave.

 7. Aweyi tuvuatilanga e nkikw’a tulu a unsongi?

⁷ Tuvuatanga e nkikw’a tulu a unsongi muna tambulwilanga e nkanikinu mia Yave mu kuma kia edi diambote y’edi diambi yo zingila e ngwizani ye nkanikinu miami. (Nku. 97:10) Akaka bemonanga vo e nkanikinu mia Yave luvevoko lwau mikakidilanga. Kansi, e selo kia Yave ona oyambulanga sadila e nkanikinu mia Bibila muna zingu kiandi, olenda tezaneswa yo soladi okatwidi e nkikw’a tulu ekolo kena muna vita kadi omwene vo zitu diayingi kina. O vanga wo dia uzowa kikilu. Kwa ndiona ozolanga Yave, ke badikilanga e nkanikinu miandi ko vo “miampasi.” Kansi, obadikilanga mio nze lekwa kivuluzanga moyo andi.—1 Yoa. 5:3.

 8. O vuata e nsampatu muna malu, aweyi disongele?

⁸ Paulu watukasakesa mpe vo twavuata e nsampatu muna malu kimana twakubama muna samuna e nsangu zambote za luvuvamu. Ediadi disongele vo tufwete kalanga twakubama ntangwa zawonso muna samuna e nsangu zambote za Kintinu. Vava tusamunanga e nsangu zambote kwa akaka, o lukwikilu lweto mpe lukumamanga. Dialukasakeso kikilu mu mona una e selo ya Yave mu nz’amvimba besadilanga konso lau muna samuna e nsangu zambote konso fulu bena. Kasikil’owu, besamunanga e nsangu zambote kuna salu, kuna sikola, muna mazandu, mu nzo ye nzo, vava besumbanga e lekwa, vava bekingulanga e yitu bena vo ke Mbangi za Yave ko, vava bemokenanga yo wantu ana bazeye yovo vava ke bevaikanga mu nzo ko mu fikolo. Avo tuyambwidi samuna e nsangu zambote mu kuma kia wonga, tukala nze soladi okatwidi e nsampatu ekolo kena muna vita. Avo soladi ovangidi wo, olenda lwala muna malu. Muna kuma kiaki, diampasi dikala kwa yandi avo onuanisu. Diampasi mpe dikala mu lemvokela o luludiku lwa mfumu andi.

 9. Ekuma tufwete sadilanga e ngubu anene a lukwikilu?

⁹ E ngubu anene ya lukwikilu, isunzulanga o lukwikilu lweto muna Yave. Tukwikilanga vo Yave olungisa e nsilu miandi miawonso. O lukwikilu lwalu lukutusadisanga mu ‘zima maswanga mawonso matiya ma ndiona wambi.’ Ekuma tufwete sadila e ngubu anene? E kuma kadi ikututaninanga twalembi vukumunua kwa malongi ma avengomoki ngatu kendalala vava o wantu bekutusevanga mu kuma kia mana tukwikilanga. Kondwa kwa lukwikilu, ke tukala yo nkuma ko wa zizidila vava akaka bekutukomekenanga twaveza e nkanikinu mia Yave. Kuna diak’e sambu, konso ntangwa tulembi vanganga mana Yave kemenganga, kiakala kuna salu yovo kuna sikola, mu sadila tuna e ngubu eto. (1 Pet. 3:15) Tusadilanga mpe e ngubu eto konso ntangwa ke tutambulwilanga ko e salu kifutanga e nzimbu zayingi, kadi tuzeye wo vo e salu kiaki kilenda kutufila mu lembi sadila Yave una ufwene. (Ayib. 13:5, 6) Konso ntangwa tukwamanananga sadila Yave kana nkutu vava tusiwanga kitantu, mu taninua twina kwa ngubu eto a lukwikilu.—1 Tes. 2:2.

10. E mpu a vita ya luvuluzu, nki isunzulanga? Ekuma tufwete yo vuatila?

¹⁰ E mpu a vita ya luvuluzu, isunzulanga e vuvu kina Yave katuvana, i sia vo, vuvu kia kutuvevola muna lufwa yo senda awonso ana bevanganga o luzolo lwandi. (1 Tes. 5:8; 1 Tim. 4:10; Tito 1:1, 2) Nze una e mpu a vita yataninanga o ntu a soladi, o unu mpe e mpu a vita ya luvuluzu itaninanga e ngindu zeto. Mu nkia mpila? E vuvu kina Yave kekutuvananga kikutusadisanga mu sia e sungididi muna nsilu miandi yo kala ye ngindu zasikila vava tunuananga ye mpasi. Ozevo, aweyi tulenda vuatila e mpu yayi ya vita? Tulenda yo vuata muna yindulanga muna mpila ina Yave keyindulwilanga. Kasikil’owu, ke tusianga e vuvu kieto ko muna kimvuama kilenda vila, kansi muna Nzambi kaka.—Nku. 26:2; 104:34; 1 Tim. 6:17.

11. O nsosolo a mwanda nki usunzulanga? Ekuma tufwete wo sadila?

¹¹ O nsosolo a mwanda, usunzulanga e Bibila, i sia vo, Diambu dia Nzambi. O nsosolo wau una yo nkuma wa senzeka e mpila zawonso za luvunu yo vevola o wantu muna malongi maluvunu ye fu yambi. (2 Kor. 10:4, 5; 2 Tim. 3:16, 17; Ayib. 4:12) Tulongokanga una tufwete toma sadilanga o nsosolo wau muna longi dia yeto kibeni ye muna malongi tuvewanga muna nkubik’a Nzambi. (2 Tim. 2:15) Katula e nuaninua ya mwanda ina katuvana o Yave, nkia mpila yankaka kekututaninanga?

12. Nkia lusadisu lwankaka tuvuidi o mfunu? Ekuma?

¹² E soladi diazikuka ozeye wo vo kalendi sunda e vita ko muna ngolo za yandi kibeni. Lusadisu lwa masoladi mankaka kavuidi o mfunu. Diau dimosi mpe, ke tulendi sunda Satana ye alandi andi ko muna ngolo za yeto kibeni. Lusadisu lwa mpangi zeto tuvuidi o mfunu. Kiaki i kuma Yave katuvanina e “kintwadi kia wana-ngudi awonso” ana bakubama muna kutusadisa.—1 Pet. 2:17.

13. Landila e sono kia Ayibere 10:24, 25, aweyi tukutakanu tulenda kutukasakesela?

¹³ Imosi muna mpila tulenda tambulwila o lusadisu tuvuidi o mfunu i lungananga muna tukutakanu tweto. (Tanga Ayibere 10:24, 25.) Ezak’e ntangwa, yeto awonso tulenda kendalala. Vava tukendalalanga, o tukutakanu tulenda kutukasakesa. Kasikil’owu, e nkomena za nsi a ntima zina mpangi zeto bevananga zikutukasakesanga kikilu. E malongi ma Bibila ye nsongesela bevanganga, zikutukasakesanga mu kwamanana sadila Yave. O mokena ye ampangi vitila ye kuna mfoko a tukutakanu, dikutukasakesanga kikilu. (1 Tes. 5:14) Kuna diak’e sambu, muna tukutakanu tukalanga ye lau dia mona e kiese kitukanga muna sadisa akaka. (Mav. 20:35; Roma 1:11, 12) O tukutakanu tukutusadisanga mpe mu mpila yankaka. Tukutusadisanga mu kala ateleki ye alongi ambote. Kasikil’owu, i muna tulongokelanga una tulenda toma sadila e Salanganu Yeto ya Longela. Muna kuma kiaki, toma kubikanga o tukutakanu. Ekolo una mu lukutakanu, sianga e sungididi muna malongi. Kuna mfoko a lukutakanu, sadila mana olongokele. Muna mpila yayi, okituka “soladi diambote dia Kristu Yesu.”—2 Tim. 2:3.

14. Nkia lusadisu lwankaka tuna lwau?

¹⁴ Tuvuidi mpe lusadisu lwa mafunda ye mafunda ma mbasi mankuma. Yindul’eti dina mbasi mosi kaka kalenda vanga! (Yes. 37:36) Owau, se yindula dina vu kia makesa ma mbasi kilenda vanga. Ke vena muntu ko yovo nkuya olenda sunda e vu kiaki kia makesa mankuma ma Yave. Wau vo Yave osundidi o nkuma muna mawonso, avo una kuna sambu dieto, tukwamanana sunda e mbeni zeto, kana nkutu vo ndonga bena. (Afu. 6:16) Ediadi dialudi kikilu. Muna kuma kiaki, avo nkundi aku a salu, a sikola yovo yitu kiaku una vo ke Mbangi a Yave ko ovovele yovo vanga e diambu muna kukendeleka, sungamena vo Yave una kuna sambu diaku. Zaya dio vo kunuananga e vita yayi ngeye mosi ko. Yave una kuna ntwal’aku muna kufila.

15. Landila e sono kia Yesaya 54:15, 17, ekuma ke venena muntu ko olenda kakidila e salu kia samuna e nsangu zambote?

¹⁵ E nza yayi iyalwanga kwa Satana ivuidi kuma yayingi muna kutumenga. Kasikil’owu, oyeto ke tukuyisianga muna mambu ma mbumba ma nza yayi ko ngatu nuana e vita. Tusamunanga e nkumbu a Nzambi kwa wantu yo kubavovesa vo, Kintinu kia Nzambi kaka kitwasa o luvuvamu omu nza ye tuvanganga mawonso muna lemvokela e nkanikinu miansongi mia Nzambi. Tusonganga kwa wantu vo o nyadi a nza yayi nkwa luvunu kikilu ye mumponda-muntu ona osundidi. (Yoa. 8:44) Tusamunanga mpe kwa wantu vo ke kolo ko, e nza yayi ya Satana ifwaswa. Dialudi vo, Satana ye alandi andi ke belenda kutusima ko. Kadi tukwamanana sadila Yave muna sadila konso ndekwa. Kana una vo Satana ovuidi o nkuma, kalendi kakidila ko vo e nsangu zambote za Kintinu zalwaka kwa wantu omu nz’amvimba. Mawonso mama, malendakana kaka kadi Yave okututaninanga.—Tanga Yesaya 54:15, 17.

16. Aweyi Yave kevuluzila o nkangu andi muna kolo kia mpasi zayingi?

¹⁶ Adieyi divangama ke kolo ko? Muna kolo kia mpasi zayingi, Yave okutuvuluza mu mpila zole zisundidi. E mpila yantete, Yave ovuluza e selo yandi yakwikizi vava kefila ayadi a nza mu fwasa Babele Anene, i sia vo, kintwadi kia nsambila zawonso zaluvunu. (Lus. 17:16-18; 18:2, 4) E mpila yazole, ovuluza o nkangu andi vava kefwasa e nza ya Satana muna vita ya Armangedo.—Lus. 7:9, 10; 16:14, 16.

17. Ekuma tufwete kwamanena siamisina e ngwizani eto yo Yave?

¹⁷ Avo tukwamanene siamisa e ngwizani eto yo Yave, ke vena diambu ko Satana kalenda vanga dikututwasila e mfwilu miakwele mvu. E ziku kia diambu i kiaki, yandi ofwaswa yakwele mvu. (Roma 16:20) Muna kuma kiaki, vuatanga e nuaninua yawonso ya mwanda, kukatudi yo ko! Kuvavi nuana e vita yayi ngeye mosi ko. Sadisanga e mpangi zaku yo landa o luludiku lwa Yave. Avo ovangidi wo, kala ye ziku vo Yave wa Se diaku dianzodi okukumika yo kutanina.—Yes. 41:10.