Nga e Nzimbu i Tuku dia Mambu Mawonso Mambi?

Mvutu za Bibila

Ve. E Bibila ke kivovanga ko vo e nzimbu lekwa kiambi. Ke kivovanga mpe ko vo e nzimbu i tuku dia mambu mawonso mambi mevangamanga. Akaka bevovanga vo “e nzimbu i tuku dia mambu mawonso mambi.” Kansi ke diau ko e Bibila kilonganga. Bibila kivovanga vo “o zola nzimbu i tuku dia mambu mawonso mambi.”—1 Timoteo 6:10.

Adieyi Bibila kivovanga mu diambu ditadidi nzimbu?

Bibila kivovanga vo e nzimbu avo zisadilu mu mpila yambote zilenda twasa nluta, zilenda ‘tanina.’ (Kimpovi 7:12) Bibila kisanisinanga mpe awana bena ye fu kia kayila akaka, dilenda kala kubakayila nzimbu.—Ngana 11:25.

Bibila kikutulukisanga twalembi sia e nzimbu va fulu kiantete muna zingu. Kivovanga vo: “Yambula e zingu kieno kiakondwa zola muna nzimbu, nuyangalelanga ina nuna yau.” (Ayibere 13:5) E sono kiaki kikutulonganga vo tufwete sianga e nzimbu vana fulu kiandi yo lembi yambula vo zayala e zingu kieto. Avo tuna ye ina tuvuidi o mfunu nze madia, mvuatu ye nzo, tufwete yo yangalelanga.—1 Timoteo 6:8.

**Ekuma Bibila kikutulukisilanga mu diambu ditadidi zola nzimbu?**

Akwa loko ke bevua moyo a mvu ya mvu ko. (Efeso 5:5) Kadi, entete e fu kia loko i kimosi muna nsambil’a teke, i sia vo, nsambil’aluvunu. (Kolosai 3:5) Diazole, akwa loko nkumbu miayingi bevanganga mambu mambi muna lenda e lekwa kina bavuidi mfunu. E sono kia Ngana 28:20 kivovanga vo: ‘Ndiona ovavanga vuama mu nzaki, ke kwamanana kala kaka munkondwa-kuma ko.’ Muntu ozolanga nzimbu olenda vanga mambu mambi nze kutumuna nzimbu zangani, vunginika akaka, nata muntu mu kingolo mu kumvanga e mbi yovo vonda.

Kana nkutu vo muntu kavangidi mambu mama ko, o zola e nzimbu dilenda twasa mfwilu miankaka. Bibila kivovanga vo: “Awana bazolele vuama, bebwa muna umpukumuni ye ntambu ye muna zolela yayingi ya uzowa ye yampasi.”—1 Timoteo 6:9.

Ekuma dinina diambote mu landa malongi ma Bibila mu diambu ditadidi nzimbu?

Bibila kilonganga edi diambote ye mambu meyangidikanga Nzambi. Ke tuzolele vanga konso diambu diambi ko muna vua e nzimbu. Avo tutokanenanga e ngwizani eto yo Nzambi, tuyangalela vanga mambu mambote. Vana ntandu, tuvua lusadisu ye dienga dia Nzambi. Nzambi wasia nsilu vo: “Kikuyambula nkutu ko, ngatu kubembola.” (Ayibere 13:5, 6) Nzambi osianga mpe nsilu vo: “O nkwa kwikizi nsambu zayingi ketambula.”—Ngana 28:20.

Sono ya Bibila ivovelanga e nzimbu

Kimpovi 7:12: “Nzimbu zitaninanga.”

Ediadi disongele vo: E nzimbu mfunu zina kadi zikutusadisanga mu lungisa e nsatu zeto za kinitu.

Luka 12:15: “O muntu kana nkutu vo ulolo wa mavua kena mau, o moyo andi ke utukanga muna mavua mandi ko.”

Ediadi disongele vo: E nzimbu ke zau ko zisundidi o mfunu muna zingu ye ke zilendi kutuvuluza ko.

Timoteo 6:10: “O zola nzimbu i tuku dia mambu mawonso mambi, ankaka wau bakivana emvimba muna zola kwaku, bavengomoka muna lukwikilu, yo kukitwasila mpasi zayingi.”

Ediadi disongele vo: O kala ye nzimbu ke diambi ko. Kansi, wantu ankaka bezolanga nzimbu ye bekitulanga nzimbu se diambu disundidi o mfunu muna zingu. Wantu awaya bewanananga ye mpasi zayingi nze lembi kala ye zingu kia nzo kiakiese, lembi kala ye mavimpi mambote mu kuma kia salu yayingi yovo sala muna ola zina vo ke za salu ko.

Ayibere 13:5: “Yambula e zingu kieno kiakondwa zola muna nzimbu, nuyangalelanga ina nuna yau.”

Ediadi disongele vo: Vana fulu kia funtuka kwayingi mu kala ye nzimbu, diambote mu yangalelanga ina tuna yau.

Matai 19:24: “Diasazu kwa samo kaviokela vana vundu dia ntumbu, ke mu mvuama ko kakota muna Kintinu kia Nzambi.”

Ediadi disongele vo: Yesu wavana mboka kwa muntu mosi wakala ye mavua mayingi kimana kakala nlongoki andi. Kansi o muntu ndioyo katambulwila ko kadi watoma zolanga mavua mandi. Ekiaki i kuma Yesu kavanina lulukisu lwalu. Awana besianga mavua vana fulu kiantete ke mu Nzambi ko, ke bevua moyo a mvu ya mvu ko.