10. Adieyi diasadisa selo ya Nzambi kuna nz’ankulu mu kala yo unkabu yo sikila ye kwikizi muna Nzambi?

¹⁰ Muna Ayibere kapu kia 11, Paulu wa ntumwa wavova vo: “Akento batambula mafwa mau muna lufuluku, kansi akala ankaka babangikwa yamuna lufwa wau ke batambulwila luvevoko ko, kimana babaka lufuluku lusundidi o wete.” (Ayibere 11:35) Ayingi bazizidila e mpasi yo sikila ye kwikizi muna Nzambi kadi lukwikilu lwasikila bakala lwau muna lufuluku luna Nzambi kasia o nsilu. Bazaya wo vo kuna sentu, Yave osinga kubafula yo zingila yakwele mvu ova ntoto. Yindula dina diabwila Nabote yo Zakariya. Bavondelwa muna matadi mu kuma kia lemvokela Nzambi. (1 Ntinu 21:3, 15; 2 Tusansu 24:20, 21) Daniele watubwa muna wulu dia nkosi. Akundi andi batubwa vana soka dia tiya. Batambulwila o fwa ke mu kolamena Yave ko. Wantu awaya bakala ye lukwikilu vo Yave okubavana mwand’avelela yo kubasadisa mu zizidila e mpasi.—Daniele 3:16-18, 20, 28; 6:13, 16, 21-23; Ayibere 11:33, 34.

12. Nani i mbandu isundidi tulenda tanginina? Adieyi diansadisa mu zizidila e mpasi?

¹² Yesu Kristu yandi waluta mweswa e mpasi, kansi wasikila ye kwikizi muna Yave. Adieyi diansadisa mu zizidila e mpasi zazi? Paulu wavova vo: “Kadi muna kiese kasidilwa i kazizidila nti a mpasi, waveza e nsoni yo vuanda kuna koko kwalunene kwa kunda kia Nzambi.” (Ayibere 12:2) I bosi, Paulu wakasakesa Akristu mu “toma badika” e mbandu a Yesu. (Tanga Ayibere 12:3.) Nze Yesu, Akristu ayingi muna tandu kiantete bafwa mu kuma kia kwikizi kiau muna Yave. Mosi muna yau i Antipa. (Lusengomono 2:13) Akristu awaya batambula kala o nsendo au, nswaswani ye selo yankaka ya Nzambi ana bakala ye vuvu kia zingila ova ntoto. (Ayibere 11:35) Ke vavioka kolo ko vava Yesu kayadikwa se Ntinu, Akristu akuswa ana bafwa bafulwa mu vuila zingu kilembi suka kuna zulu. Besinga yala yo Yesu e nza yawonso.—Lusengomono 20:4.