E Nsambila Aludi Ilenda Kutwasila Nsambu Zakwele Mvu!

 1. Adieyi dikutubwila kele vo “tufinamene Nzambi?”

YAVE ozolanga awana bekunsadilanga. Avo osambila Yave, okusambula owau ye kuna ntwala. Nkand’a Nzambi uvovanga vo: “Nufinama Nzambi, oyandi mpe okunufinama.”— Yakobo 4:8.

 2. Aweyi tulenda finamena Nzambi, ediadi aweyi dilenda sadisila e sambu yeto?

² Muna finama Nzambi, ofwete longoka yo lemvokela e Diambu diandi. Vava osamba muna luzolo lwandi, o Yave owa e sambu yaku yo kuvan’e mvutu. O ntumwa Yoane wa Nkristu wasoneka vo: ‘E kiaki i vuvu twina kiau oku kwa [Nzambi], ovo, konso una tulombela muna luzolo luandi, wa kekutuwá: ovo tuzeye wo vo wa kekutuwá, konso una tulomba, tuzeye wo vo e ndomba zina tunlombele, vwa tu vwa zo.’—1 Yoane 5:14, 15.

3-7. Nkia mpila tulenda vwila ngangu za Nzambi ye aweyi zilenda kutusadisila?

³ Vana ntandu, ekolo ofinama Nzambi, okuvana e ngangu za nwana ye mambu ma zingu kia lumbu ke lumbu. Nkand’a Nzambi uvovanga vo: “Ovo muntu vovo nwina wakondwa ngangu, mbula kalombà kwa Nzambi.”— Yakobo 1:5.

⁴ E ngangu za Nzambi aweyi zilenda kutusadisila? Va fulu kiantete, zikusadisa mu zaya mambu mekendelekanga Yave. Ozaya mpe ekuma mambu mama menena mambi ye aweyi ofwete vanga muna venga mo. O zayi wau ukutanina mu ulolo wa mambu metwasang’e mpasi. Kasikil’owu, lemvokela elongi dia Nzambi dia veng’e zumba kusadisanga nkangu a Nzambi yo kubatanina mu lembi nat’e vumu kia konda luzolo, yovo baka yimbevo yisambukilwanga muna zumba, ngatu kota mu longo lwakondw’e kiese yovo vambana lo.

⁵ E ngangu za Nzambi nki diaka zilenda vanga oku kwa ngeye? Zilenda kusadisa mu bak’e ndandu zambote muna zingu. Zilenda kusadisa mu baka nzengo za ngangu muna mambu mamfunu, nze i mpila olenda sadila e nzimbu zaku. Okala y’etima diambote dia mambu ma mwanda yo menga mambu mena vo ke mamfunu beni ko.

⁶ E ngangu za Nzambi zilenda kusadisa mpe muna nkal’aku y’akaka. Olenda vwa zingu kia nzo ya kiese. Olenda vanga kikundi kiakieleka kianzingi y’akaka yo zitiswa nkutu kw’awana balembi sadilanga Nzambi.

⁷ Vana ntandu, e ngangu za Nzambi zisoba mpil’aku ya badikila mambu. Zikusadisa mu sunda e mpasi ye ntangwa za nkenda. Okala mpe ye vuvu kiasikila kia kusentu. E vuvu kiaki kikusadisa mu vwa vimpi wambote wa ngindu ye wa nitu.— Ngana 14:30; Yesaya 48:17.

 8. Nkia wonga kumona ko avo Nzambi osadilanga?

⁸ Avo Nzambi aludi osadilanga ovevoka muna wonga ubangikanga awana balembi kunsadila. Wau ozeye wo vo amafwa muna ziami ke bena moyo ko, kumona wonga wa wantu afwa ko. Wau vo obundang’e vuvu muna nsilu wa Nzambi wa fula amafwa kumwena lufwa wonga ko. Wau ozeye wo vo o Nzambi i mpungu-ngolo, kumwena mavangu ma nkisi wonga ko.— Yoane 8:32.

9-11. Aki nani bezinga muna Paradiso, ye aki nani ke bezingila mo ko?

⁹ Avo ofinamene Nzambi kukala yo wonga wa kuse ntu ko. Nze una tumwene, Nkand’a Nzambi wazayisa ulolo wa mambu tumonang’o unu ova ntoto. O Yave utuvovese vo mambu mama ma kolo kiandwelo; Kintinu kia Nzambi kikitula ntoto wau se paradiso.— Luka 21:10, 11, 31; 23:43.

¹⁰ Awana befinamanga Yave yo kunsadila yau kaka bekala muna Paradiso. O Nkand’a Nzambi uvovanga vo: “Finkolo-kolo kaka, e kimpumbulu, [ke kala diaka ko, NW]: kan’otomene tala fulu kiandi, nkatu kwandi. Alembami bevwa nza; beyangalela muna mawete mayingi.”—Nkunga 37:10, 11.

¹¹ Awana balembi lemvokela nsiku miansongi mia Nzambi bevidisa mioyo miau yakwele mvu. (2 Tesalonika 1:8, 9) Ke bezinga diaka ko. Beyikama Satana ye nkwiya miandi muna lufwa lwa mvu ya mvu. (Lusengomono 20:10, 14) Kansi, awana belongokanga oma ma Yave yo kunsadila beyangalela muna mawete mayingi muna Paradiso ova ntoto.

12. O Nkand’a Nzambi aweyi uvovanga mu kuma kia zingu kia kusentu?

¹² O Yave mambu mayingi mambote kakubikidi kwa awana benkuzolanga! Tala una uvovanga Diambu diandi mu kuma kia Paradiso ova ntoto:

• Mukala yo ulolo wa madia: “O ulolo wa masa ukala muna nsi, yakuna ntandu a miongo.”— Nkunga 72:16.

• Nzo zambote: “Betunga nzo yo kala mo.”— Yesaya 65:21.

• Salu kiambote: “Ana nsolele bekwaminin’o mona wete wa salu ya moko mau. Ke befuntuka nkatu ko.”— Yesaya 65:22, 23.

• Mayela nkatu: “O ntungi kevova ko vo, yela nyela.”— Yesaya 33:24.

• Ke vekala avanguki ko: “O meso ma mpofo metemoka, o matu m’afwa matu mekakuka. O [mvanguki olemuka nze nkai, NW] o lubini lu’ebaba luyimbila.”— Yesaya 35:5, 6.

• Ke vekala mpasi ko, nkenda yovo lufwa: ‘[Nzambi] okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.’— Lusengomono 21:4.

• Ke vekala vita ko: “[Nzambi] osima vita yakuna nsuk’a nza.”— Nkunga 46:9.

• Moyo a mvu ya mvu: “Asongi bevwa nza, besikila vo yakwele mvu.”— Nkunga 37:29.

13. Nani kaka olenda kitula e nza yayi se paradiso ye mu nkia mpila?

¹³ O wantu ke balendi vanga mambu mama ko, kansi o Yave una ye wisa kia vanga konso dina kavovele. Ke vena diambu dilenda kunsimba ko mu vanga konso dina kazolele. Nkand’a Nzambi uvovanga vo: ‘Kuna kwa Nzambi ke vena diambu dilembi lendakana ko.’— Luka 1:37.

14. Aweyi olenda sololwela e nzila yifilanga ku moyo a mvu ya mvu?

¹⁴ Muna Mbangi zandi, o Yave ovananga elau kwa wantu mwawonso “[ba]kotela muna mwelo ambatakani” yo diatila muna nzila yifilanga ku moyo a mvu ya mvu. Mbula wakal’entwadi ye nkangu akiese betambulwilanga e mboka yayi. Mbula wasambila e nsambila yaludi yo vwa nsambu za Yave yakwele mvu!— Matai 7:13, 14.