Mpila ya Kadila yo Muntu Wavaikiswa mu Nkutakani

Ntantu zayingi tumonanga vava yitu yovo nkundi eto kevaikiswanga mu nkutakani, muna lembi viluka e ntima mun’esumu diandi. E mpila tubadikilanga elongi dia Nkand’a Nzambi muna diambu diadi, ilenda songa o zola kweto muna Nzambi ye kwikizi muna nkubik’andi.a Tala e yuvu yakaka iyuvulwanga muna diambu diadi.

Aweyi tufwete kadila yo muntu wavaikiswa mu nkutakani? Nkand’a Nzambi uvovanga vo: ‘Ke nukadi ntwadi ko yo muntu oyikilwanga vo mpangi, ona wina vo munta-zumba, ovo nkw’eloko, ovo nsambidi a teke, ovo nkwa malevo, ovo nduvu a vinyo, ovo mundia-nzimbu; o muntu wina wau, ke nudie yandi nkutu ko.’ (1 Korinto 5:11) Muna kuma ki’awana ‘ke besikilanga mun’elongi dia Kristu ko,’ tutanganga vo: “Ke nuntambula mu nzo nkutu ko, ngatu kunkayisa kadi on’okunkayisa, untwadi kena yandi muna salu yandi yambi.” (2 Yoane 9-11) Ke tukadinge kikundi ko y’awana bavaikiswa mu nkutakani yovo mokena yau mambu ma mwanda. Mun’Eyingidilu dia 15 dia ngonde a Desemba ya mvu a 1981, lukaya lwa 21 tutanganga vo: “O kayisa muntu i lau diantete muna mokena yandi, dilenda kala se lubantiku lwa kikundi. Nga tuzolele vana elau diadi kwa muntu wavaikiswa mu nkutakani?”

Olembi sangalakana yandi nga mfunu kikilu dina? Elo, vena ye kuma yayingi tufwete wo vangila. Diantete, i mpila ya songela kwikizi kwa Nzambi ye Diambu diandi. Tufwete lemvokela Yave, kana nkutu vava dikalanga diampasi mu vanga wo. O zola muna Nzambi kufwete kutufila mu lemvokela nsiku miandi miawonso, kadi tuzeye wo vo muna kuma kia zola kwandi e nsiku miandi nluta kaka mitwasanga. (Yesaya 48:17; 1 Yoane 5:3) Diazole, o lembi kala e ntwadi yo nsumuki walembi viluka o ntima, ditanina kimwanda ki’ampangi muna nkutakani yo tatidila e nkumbu ambote ya nkutakani. (1 Korinto 5:6, 7) Diatatu, o lemvokela e nkanikinu mia Nkand’a Nzambi dilenda sadisa muntu wavaikiswa mu nkutakani. Muna zitisa nzengo za buka kia afundisi, tulenda vilul’o ntima wa nsumuki ona walembi tambulwila lusadisu lwa akuluntu. O lembi kala diaka vamosi y’azolwa andi dilenda kunsadisa ‘mu vungukilwa o zayi,’ yo bakula esumu diandi yo sia ngolo mu vutuka kwa Yave.—Luka 15:17.

Adieyi tuvova kele vo yitu ovaikisu mu nkutakani? Muna kuma kia zola kukalanga vana vena yitu, e diambu diadi dilenda kala se ntonta za kwikizi. Aweyi tufwete kadila ye yitu wavaikiswa mu nkutakani? Katulendi yika mambu mawonso ko malenda bwa, kansi yambula twafimpa mambu mole mamfunu.

Ezak’e ntangwa, dilenda kala vo e yitu wavaikiswa mu nkutakani nzo mosi kezingilanga ye yitu yandi. Wau vo ovaikiswa mu nkutakani ke kuvondanga ungudi ko, nulenda zinga kumosi yo sala e salu ya nzo ya lumbu ke lumbu. Kansi, muna kuma ki’esumu diandi, wafwasa e ngwizani a kimwanda ye yitu yandi ya minkwikizi. Muna songa e kwikizi kiau, esi nzo ka bafwete mokenanga yandi mambu ma mwanda ko. Kasikil’owu, o muntu wavaikiswa mu nkutakani kafwete kala diaka mu nsambila ya esi nzo ko. Kansi, avo mwan’akete wavaikiswa mu nkutakani, mase bakinu ye mbebe ya kunlonga yo kunsingika. Muna kuma kiaki, mase manzodi balenda vanga e nkubika mu longokanga yandi o Nkand’a Nzambi.b—Ngana 6:20-22; 29:17.

Kuna diak’esambu, dilenda kala vo e yitu wavaikiswa mu nkutakani ke nuzingilanga nzo mosi ko. Kana una vo ezak’e ntangwa divavanga vo lwawawana mu tala mambu ma kanda, ediadi ka difwete vangamanga ntangwa zawonso ko. Akristu bena ye kwikizi ke bevavanga kuma ko kia kala entwadi ntangwa zawonso ye yitu kiau wavaikiswa mu nkutakani una vo ke bezingilanga nzo mosi ko. Kansi, e kwikizi kiau muna Yave ye nkubik’andi kikubafila mu lemvokela e nkanikinu a Nkand’a Nzambi mu kuma ki’awana bavaikiswa mu nkutakani. Besonganga kwikizi muna wete dia nsumuki, ediadi dilenda kunsadisa mu baka nluta mia tumbu kavewa.c—Ayibere 12:11.