Yuvu Y’atangi

Vitila kafwa, ekuma Yesu kayikila e mvovo mia Davidi miasonama muna Nkunga 22:1?

Vitila kafwa, Yesu wayika e mvovo miasonama muna Matai 27:46: “E Nzambi ame, e Nzambi ame, ekuma ungiambulwidi?” Muna yika e mvovo miami, Yesu walunganesa e mvovo mia Davidi wa ntozi a nkunga miasonama muna Nkunga 22:1. (Maku 15:34) Ke diansongi ko mu yindula vo Yesu wayika e mvovo miami kadi wakendalala kakala yovo wavidisa o lukwikilu lwandi muna Nzambi mu fikolo. Kadi Yesu watoma bakula e kuma diavavilanga vo kafwa ye wakubama kakala mu vanga wo. (Mat. 16:21; 20:28) Wazaya wo mpe vo, muna kolo kia lufwa lwandi, Yave oyambula kuntanina. (Yobi 1:10) Yave wayambula kuntanina kadi wazola vo Yesu kasonga vo osikila ye kwikizi muna yandi kana nkutu nkia mpila lufwa kefwa.—Maku 14:35, 36.

Ozevo, ekuma Yesu kayikila e mvovo mia Nkunga wau? Kana una vo ke tuna ye ziku ko, yambula twafimpa e kuma yankaka.a

Muna yika e mvovo miami, nanga Yesu wazola kiesesa vo Yave ke kuntanina ko muna lufwa lwandi. Diavava vo Yesu katukula kondwa kwa lusadisu lwa Yave. Muntu kikilu kakala nze yeto. Diavava mpe vo kafwa kimana “kayeleka lufwa mu kuma kia wantu awonso.”—Ayib. 2:9.

Nanga Yesu wayika e mvovo mia nkunga wau muna fila o wantu basia e sungididi muna nkunga wawonso. Muna lumbu yayina, Ayuda bakala ye fu kia lunda muna ntu e tini yayingi ya nkand’a Nkunga. Vava bawanga tini kimosi kia nkand’a nkunga, vana vau basungamenanga nkunga wawonso. Avo i diau Yesu kayindula, ozevo wazola sadisa alandi andi ana bakala vo Ayuda mu sungamena ulolo wa ungunza wasonama muna nkunga wau mu kuma kia lufwa lwandi. (Nku. 22:7, 8, 15, 16, 18, 24) Vana tandu, e tini yansuka ya nkunga wau ikembelelanga Yave yo kunyikila vo ntinu ona oyalanga nza yawonso.—Nku. 22:27-31.

Muna yika e mvovo miami mia Davidi, nanga Yesu wazola songa vo kavanga diambu diambi ko. Vitila Yesu kavondwa, e Mbazi a Nkanu yamvunina e mambu yo kumfundisa vo ntianguni kakala. (Mat. 26:65, 66) E Mbazi a Nkanu yalungana vana vau muna fuku lembi zitisa e nsiku miasikidiswa muna kolo kiakina. (Mat. 26:59; Maku 14:56-59) Vava Yesu kayuvula vo: “E Nzambi ame, e Nzambi ame, ekuma ungiambulwidi?” nanga wazola tunta e sungididi kia wantu kimana bazaya vo kavanga diambu ko diamfwanukina e tumbu kia lufwa.

Nanga Yesu wazola sungamesa mpe kwa akaka vo kana nkutu Davidi wa nsoneki a nkunga wau wamona e mpasi. Kansi, ediadi ke disongele ko vo Davidi kakala ye dienga dia Yave ko. E kiuvu kia Davidi ke kiasonga ko vo wavidisa lukwikilu lwandi muna Nzambi. Vava kavanga e kiuvu kiaki, Davidi wavova vo wabundanga e vuvu muna Yave wau kavuluza o nkangu andi. O Yave wakwamanana kunsambula. (Nku. 22:23, 24, 27) Diau dimosi mpe kana una vo Yesu, i sia vo, “Mwan’a Davidi” wamona e mpasi vana nti ampasi, ediadi ke disongele ko vo kakala ye dienga dia Yave ko.—Mat. 21:9.

Nanga Yesu wasonga lukendalalu lwandi wau vo Yave wayambula kuntanina kimana kasonga e kwikizi kiandi yamuna lufwa. Kuna lubantiku lwa nsema, ke diakala kani dia Yave ko vo Mwan’andi kamona e mpasi yo fwa. Vava kaka Adami yo Eva bakolamena Nzambi i diavavila vo Yesu kafwa. Yesu kavanga diambu diambi ko. Kansi, diavava vo kamona e mpasi yo fwa muna vana e mvutu za yuvu ina Satana kavaikisa yo futa e ntalu yavavuanga muna kutukula. (Maku 8:31; 1 Pet. 2:21-24) Muna lunganesa e mambu mama, diavava vo Yave kayambula tanina Yesu mu fikolo.

Nanga Yesu wazola vo alandi andi bayindula e kuma Yave kayambulwila vo kafwa vana nti ampasi.b Yesu wazaya wo vo lufwa lwandi nze kimpumbulu vana nti ampasi wantu ayingi lutesesa e sakuba. (1 Kor. 1:23) Muna kuma kiaki, avo alandi andi basidi e sungididi muna kuma kiasikila kia lufwa lwandi, bebakula e nsas’a lufwa lwalu. (Ngal. 3:13, 14) Muna mpila yayi, ke bekumbadikila kimpumbulu ko kansi Mvuluzi.

Kiakala nkia kuma Yesu kayikila e mvovo miami, wazaya wo vo muna vanga luzolo lwa Se diandi diavava vo kafwa vana nti ampasi. Ke vavioka kolo ko, vava kayika e mvovo mia nkunga wau, Yesu wavova vo: “Dilunganene!” (Yoa. 19:30; Luka 22:37) Kieleka, wau vo Yave wayambula tanina Yesu mu fikolo, ediadi diansadisa mu lunganesa mawonso kafidilwa ova ntoto mu vanga. Diansadisa mpe mu lunganesa mawonso masonama mu kuma kiandi “muna Nsiku a Mose ye muna Ngunza ye muna Nkunga.”—Luka 24:44.