Bu twe kanda dia Yehova, kwe bantu bakaka tusamunaka, mu bungu ti Tata’eto die ku mazulu tuzololo, mpe tuzololo mu bakisa bampwana’eto mu mu zaba. Bisamuni biabingi bitomono zolo tisalu tiawu tia samuna. Kâ kwe bakaka musamu wa mpasi wena mu mona nsayi mu tisalu tiawu tia samuna. Mu bungu dia nti? Mu bungu ti bantu bakaka bamonaka ti ka bêna milongi mia mbote ko. Bisamuni biakaka ka bizololo’â ko mu kwenda kwe bantu tala ti ka babatikisi’â ko. Bakaka bunkuta bu bâka nawu ngatu bababakiriri nkesi. Musamu wa mpasi wena kwe mpangi zo mu samuna nsangu za mbote kwe bantu ba balembolo zaba. Ngano ntangu zakaka musamu wa mpasi wubâka kwe nge mu mona nsayi mu tisalu tia samuna mu bungu dia misamu mio? Tala ti ni bo, kunôkandi. Kondo kwa lukwikulu mu nge beni kulendi songela ti wa kuluka wena, mpe kuzololo’â ko ti batala kwa nge. Kusongele mpe ti kuzololo’â ko mu bakana na bantu. Ka kwena muntu ko wuzololo mu fwemesa bantu bakaka, nsungula bu wudingaka mu yirika mbote kwe bakaka. Tata’aku die ku mazulu zebi bwe monaka ku mutima, mpe zololo mu kuhana lubakusu lwe naku nsatu. w24.04 14 par. 1-2

Bâ na makani madelakana. Yêla’eti musamu ewu: Kubika liste za nsobolo zita zolo mu sa mpe sola musamu wumosi peleko miolo mita zolo batikila, mpe sarila miakaka ha manima. Ngano nti ta zolo batikila? Lendi bonga nzengolo ya batikila mu makani mata banza ti ka mena mpasi ko kwe nge mu lungisa peleko lendi sola mu batikila mu musamu wuta mona ti mfunu wena mu tomesa. Bumana sola kani diaku, dinga mu mikanda mieto bu sarila Index des publications des Témoins de Jéhovah peleko Mukanda wa dingila wa Mbangi za Yehova. Sambila mu bungu dia kani diaku bu lomba kwe Yehova kakuhana “nsatu na ngolo za sarila.” (Flp. 2:13) Ha manima, dinga mu sarila mio mi longokele. Bu kwizi mona ti lendele mu sa nsobolo peleko mu tomesa bifu bia Bakristo, musamu wo mbo wukutuma mu tatamana mu sa nsobolo, mpe ka wukwizi’â bâ musamu wa mpasi ko kwe nge mu sa nsobolo zakaka. w24.09 6 par. 13-14

Lendi bâ na lwaka mu bungu dia misamu mi wayirika mialwekesa bantu bakaka. Nti bilendi ku bakisa? Sa miamiansoni mi lenda mu tomesa misamu na bawu mpe balomba mulemvo. Lomba kwe Yehova kabakisa bô babansoni ba walwekesa. Lendi ku bakisa na bô ba walwekesa mu tatamana mu mu sarila na mu bâ mu tidzunu. Baka malongi mu makuba maku ma mu ntama mpe bâ wakubaka mu bîka Yehova kakusarila mu mpila yi kazololo. Taluzula tifwani tia Yonase, kani kenda ku Ninive kûna kwa mu tuma Nzambi, Yonase wadioka kûma kwakaka. Yehova wasemba Yonase, mpe Yonase wabaka malongi mu makuba mandi. (Yon. 1:​1-4, 15-17; 2:​7-10) Yehova ka yambirika Yonase ko. Nzambi wavutu mu hana bweso bwa kwenda ku Ninive, mpe mu mbala yo Yonase watumamana na manzangu mamansoni. Ka bîka ko ti maniongo mandi mu bungu dia makuba mandi ma mu ntama ma mu kabakasa mu tambula tisalu tia môna tia Yehova.—Yon. 3:​1-3. w24.10 8-9 par. 10-11