Waebrania ngʉe ná Wakristo tsotso ká addu ka ndi kóe ndiro kpa ve ndrŭ ndima nzá nari tso d’e? Mutume Paulo jingʉeri fø Wakristo li ndima thí nzadha tso le ve nari nǎ ro adi si ná faida djo. Ke tungʉe ri nanga kpa dho nari kʉ, Mungu adi ribba kpadhó udha mbuni ndiri chulu ndi bbʉ formasio kpa dho d’e. Fø formasio ka ndi ddie longa kpa dho inga ndi liri kpa rá anzi Yova dho ndima hwè bbʉ nari na. Nzadha nǎ ro adi si ná bblolo djo kpa ndima thí li ná føri ka ndi lieri rie sʉsʉ kpa ve ngatso. (Ebr. 12:11) Paulo jangʉeri Waebrania ngʉe ná Wakristo dho kpa di nga nǎ do ro ndirigoti nzɨ kpa d’i ji kpakpalo na ndima bani ná saa djo. Mutume Paulo ka ndi bbʉe bblo kʉ ná shauri ngbaribbai ma le ka le ve nzadha tso nari djo. Dhonalo nzá ke d’e ngʉ Mukristo nari njí ke nzangʉe Wakristo bbo ndirigoti ke njangʉe ngbaribbai ma ndrŭ ngʉ adi njini kpa na nari nja. Føri kina, ke chungʉe ngbaribbai ma le ka le ve nzadha tso nari chu. Godhé, b’lo ke ngʉ Mukristo nari goti ma ke nzangʉeni njonjo chu lu ddi.—2 Ko. 11:23-25. w24.09 12-13 §16-17

Ddo da nari bbai kodhó lod’radha dhi njí na mana adi ngʉ bbo pli. Ká addudho? Dhonalo i dz’ tso si d’ø ná ddo gʉ di sese. Addinga ngbaribbai ma Yesu pongʉe lod’radha dhi njí si njini ngasini ná saa na nari djo Marko 13:10 ripo nari bbai. Matayo ndingʉe ná Enjili nǎ Yesu pongʉeri nari kʉ, hwè lo-i ka ndi d’raeni d’z djó ndrŭ di ná ngalu krʉ “mwisho” si nari njí. (Mt. 24:14) Mwisho na mana kʉ, Shetani dhó i dz’ dzá mwisho. I dz’ si sani ná “saa ma, ddo” ma na Yova li b’lo ndirigoti fø ddo kʉ chøchø. (Mt. 24:36; Mdo. 1:7) Krʉ da ná ddo adi rili ko ndrini chøchø fø saa ro. (Ro. 13:11) Fø ddo si nari njí, ringani ko rá anzi lo ko d’ra nari na. Ringani ko ddinga bbo na mana kʉ ná i ngadhudha djo: Hwè lo-i ká ko adi d’ra addudho? Jidha adi ko ronga cho ko d’ralo. Hwè lo-i ko ji nari ma, ndrŭ ko ji nari ma na adi rili ko d’ralo. Ndirigoti bbo pli adi ko ronga cho nari kʉ, Yova ma, ke ró dho ma na ko ji nari. w24.05 14-15 §2-3

Gø dhi ndrŭ anili nidhi nzø kpakpa ndiro nzø di ngaddi d’z djó nononi ná ritsi djo d’e. Park lu inga nza gʉ lu ni bbí ná saa na, ako nidhó ngba tsotso ke nja nononi ná ritsi kana bbo ka ndi tho le nyǒ ná ri. Ká addudho? Dhonalo føri ka ndi kó ngba tsotso ngba famu ri nari kʉ, fø ritsi no ná ke kʉ akili na ndirigoti nyod’yu na. Loroji na, nononi ná ritsi kana bí kʉ nari d’erieni lʉrʉ, na føri djo darasa nji ná kpa zørie nga bbo b’lo. Bbo nji darasa ná ddikpa ke, Nicola Fameli turinga nari kʉ, ni di nononi ná ritsi kana lʉrʉ d’eni nari nanga zø ná saa na, ni adi bí kʉ ná nja ri ki utso d’i bí ndidhó hesabu kʉ ro. Ná fø hesabu le adi nzi Fibo nacci. Lʉrʉ d’eni ná ritsi dhó aina le ka le nja bí kʉ ná nja ritsi nǎ, loroji na dyødyø kpari (galaxie) ma, dolo dza ma, tsúbi ma, nyokpa (tournesols) djǒ ma na nǎ. w24.12 16 §7