Ko ká chu ngbá lo Yova dhó zølo djo? Yova “nzá jiri ndi sa ddikpa le ro maddi ri” nari ká ke dhongʉe ngbaribbai? (2 Pe. 3:9) Akonja bbobbo chenga njingʉe ná nja kpa dho ke dhongʉe zølo ná chu ro di. Pi Daudi njingʉe bbobbo chenga bí. Loroji na, ke njingʉe uzinifu ndirigoti ke hwingʉe ndrŭ. Bbʉbbʉ dhé, Daudi lengʉeni nari goti Yova njingʉe ke zø nji. (2 Sa. 12:​1-​12) Pi Manase njingʉe che kʉ ná lo bí ndidhó maisha nǎ. Ngbà mai ke njingʉe fø bbobbo chenga ro, ke lengʉeni ná saa na Yova dhongʉe ndidhó bbò zølo ke dho ndirigoti ke njingʉe ke zø nji. (2 Ny. 33:​9-​16) Fø lo ri dhǒ nari kʉ, Yova adi zølo dhǒ njati ndi nja fø ndi rinji dho ná sababu ro ngbà ró. Ke si kʉ fø di ná ndrŭ gaga kpa famungʉe ndima nji ná bbobbo chenga ndirigoti kpa lengʉeni le nari dho. w24.05 4 §12

Misri nǎ no tse nǎ ro Yova klongʉe ndidzá ndrŭ nari goti, ke lingʉe bbakuhani ndima di njínji tabenakulo nǎ. Ndirigoti ke lingʉe Walawi ndima di tabenakulo nǎ nja njínji. Nde, tabenakulo nǎ njínji ndirigoti chøchø di ri kuso lu ná ndrŭ ronga ká Yova ngʉ adi b’o nja ndrŭ djolu pli? Nzɨ! Yova nzɨ adi ndrŭ nanga ro krø ri. Waisraeli kana ngʉe ná ndrŭ krʉ ka ndima ngʉe Yova dzá kau ngbà dhé. Loroji na, Yova lingʉe ddù chulu tabenakulo djo ná ndundu ma, kazz dhi tødha ma na Waisraeli krʉ ngʉ adi njanja. (Kut. 40:38) Njati ndundu ngá bbi tso tabenakulo djó ro ró, da kʉ ri kuso ro ná ndrŭ ma ngʉ adi ri njanja dhé. Føro kpa ngʉ adi ndima dhó ritsi tso gbá, ndima dhó hema nanga ko ndirigoti kpa ngʉ adi bbi tso nga nja ndrŭ na. (Hes. 9:15-23) Føri bbai, njati rie ngbaga ma ko di ri ró, Yova jirie ko ji, ke adi ndi d’yu lili ko ro ndirigoti ke adi ko ronga b’ob’o. w24.06 4 §10-12

Daudi dhó maisha ngʉe hatari na. Ke dhi dduna Absalomu vʉngʉeri ndi hwi Daudi hwi ndirigoti ndi ngʉ pi ke rɨngana. (2 Sa. 15:12, 13) Daudi dho ringʉngani ndi tuni Yerusalemu nǎ ro lele! Ra ke ma ngʉ ra ndi unakpa na ná saa na Daudi rangʉe ri utso d’i, rie ngani ndima kana ddikpa ke mae ma ndi ke si Absalomu kpe ná lo d’ra ndi dho d’e. Føro ke chongʉe Sadoki ma nja bbakuhani ma na ndima ra Absalomu kpe ná lo utso d’i. (2 Sa. 15:27-29) Kpadhó lo ungʉeri ndima é krr bbo dhonalo Absalomu kpe ná lo utso le ne le d’ɨ ná føri ngʉe hatari bbo kʉ ná lo. Daudi nzingʉeri Sadoki ma, Hushai ma na tso kpa kó ndi tsotso ndiro ndi chu Absalomu kpe ná lo d’e. (2 Sa. 15:32-37) Hushai njingʉe ndi Absalomu tsotso kó nari bbai ndirigoti ke bbʉngʉe shauri Absalomu dho ngbaribbai ma ke ka ndi tae lɨ Daudi tso ro nari djo. Ná føri bbangʉe saa Daudi dho ndiro ke tayarisha ndi lɨ dho d’e. B’lo Absalomu rr Hushai dhó shauri nari goti, Hushai d’rangʉe ndima kpe ná lo Sadoki ma, Abiatari ma na dho. (2 Sa. 17:8-16) Ndirigoti aro fø kpetsi kpa d’rangʉe Absalomu kpe ná lo Daudi dho ná fø ri b’ongʉe kedhó shinga ronga b’o.—2 Sa. 17:21, 22. w24.07 4-5 §9-10