Mikka

3 Awo ne ŋŋamba nti: “Muwulire mmwe abakulu ba Yakobo

Nammwe abafuzi b’ennyumba ya Isirayiri.+

 2 Naye mukyawa ebirungi+ ne mwagala ebibi;+

Muyuza eddiba ku bantu bange n’ennyama ku magumba gaabwe.+

 3 Era mulya ennyama y’abantu bange,+

Ne mubabaagako eddiba lyabwe,

Ne mumenyaamenya amagumba gaabwe, ne mugabetenta+

Ne gaba ng’ebifumbibwa mu ntamu,* era ng’ennyama eri mu nsaka.

 4 Mu kiseera ekyo mulikoowoola Yakuwa abayambe,

Naye talibaddamu.

Mu kiseera ekyo alibakweka obwenyi bwe,+

Olw’ebintu ebibi bye mukola.+

 5 Bw’ati Yakuwa bw’ayogera ku bannabbi abakyamya abantu bange,+

Abalangirira nti ‘Mirembe!’+ ng’eno bwe baluma* n’amannyo gaabwe+

Ate ne balangirira olutalo ku oyo atassa kintu mu kamwa kaabwe:

 6 ‘Muliba na kiro;+ tewaliba kwolesebwa;+

Muliba na kizikiza kyokka; tewaliba kulagula.

Eri bannabbi enjuba erigwa,

Era obudde obw’emisana bulibafuukira kizikiza.+

 7 Abo abategeeza abalala okwolesebwa balikwatibwa ensonyi,+

N’abalaguzi baliswala.

Bonna balibikka ku mimwa gyabwe,*

Olw’okuba Katonda aliba tabaddamu.’”

 8 Naye nze omwoyo gwa Yakuwa gunzijuzza amaanyi,

Era nzijudde obwenkanya n’obuvumu

Nsobole okubuulira Yakobo obujeemu bwe ne Isirayiri ekibi kye.

 9 Muwulire kino mmwe abakulu b’ennyumba ya Yakobo

Nammwe abafuzi b’ennyumba ya Isirayiri,+

Abakyawa obwenkanya era abakyamya buli kintu ekitereevu,+

10 Abazimbisa Sayuuni ebikolwa eby’okuyiwa omusaayi era abazimbisa Yerusaalemi obutali butuukirivu.+

11 Abakulembeze* be balamulira nguzi,+

Bakabona be bayigiriza babeeko kye basasulwa,+

Ne bannabbi be balagulira ssente.*+

12 Kale mmwe muliviirako

Sayuuni okukabalwa ng’ennimiro,

Yerusaalemi okufuuka entuumu y’ebifunfugu,+

N’olusozi lw’Ennyumba ya Katonda* okufuuka ng’ebifo ebigulumivu ebiri mu kibira.+