Okugamba obugambi abaana bo ekituufu n’ekikyamu ku bw’akyo tekimala. Kiba kirungi n’obayamba okufumiitiriza ne ku bibuuzo nga bino: ‘Lwaki Bayibuli etugaana okukola ebintu ebimu emibiri gyaffe bye gyegomba? Kiki ekikakasa nti emisingi gya Bayibuli giriwo ku lwa bulungi bwaffe?’ (Is. 48:17, 18) Omwana bw’akiraga nti ayagala okubatizibwa kiba kirungi n’ayambibwa okufumiitiriza ku buvunaanyizibwa obuzingirwa mu kuba Omukristaayo. Miganyulo ki egiri mu kuba Omukristaayo? Kusoomooza ki okulimu? Lwaki emiganyulo egirimu gisinga okusoomooza okulimu? (Mak. 10:29, 30) Kikulu omwana okufumiitiriza ku bintu ng’ebyo nga tannabatizibwa. Abaana bwe bayambibwa okufumiitiriza ennyo ku bintu ebyo, kisobola okubayamba okwongera okukkiririza mu ebyo bye bayiga mu Bayibuli. Beeyongera okukiraba nti emitindo gya Bayibuli giriwo ku lwa bulungi bwabwe. w17.12 21 ¶14-15

Bangi ku baganda baffe ne bannyinaffe batawaanyizibwa obulwadde obw’amaanyi. Abalala wadde nga nabo bakuze mu myaka, balina okulabirira ab’eŋŋanda zaabwe abakaddiye. Ate abalala bategana nnyo okufunira ab’omu maka gaabwe ebyetaago by’omubiri. Abamu ebizibu ebyo byonna bibajjira mu kiseera kye kimu! Bwe kiba nti Yakuwa afaayo ku bitonde bye ebitategeera, olowooza ggwe amuweereza olw’okuba omwagala akutwala atya? (Zab. 19:1, 3, 14) Kitaffe ow’omu ggulu akumanyi bulungi nnyo. ‘N’omuwendo gw’enviiri eziri ku mutwe gwo agumanyi.’ (Mat. 10:30) Omuwandiisi wa zabbuli yagamba nti: “Yakuwa amanyi ebituuka ku abo abataliiko kya kunenyezebwa.” (Zab. 37:18) Yakuwa amanyi ebizibu by’oyitamu era asobola okukuwa amaanyi okubigumira. w18.01 7 ¶1; 8 ¶4

Peetero bwe yazuukiza Tabbiisa, ekyo kyakwata nnyo ku bantu ne kiviirako ‘bangi okukkiriza Mukama waffe.’ Baali basobola okuwa obujulirwa ku Yesu era n’okukakasa abantu nti ddala Yakuwa asobola okuzuukiza abafu. (Bik. 9:36-42) Waliwo n’ekyamagero ekirala ekikwata ku kuzuukira ekyalabibwa abantu abangi. Lumu omutume Pawulo yali mu lukuŋŋaana olwali mu kisenge ekya waggulu mu Tulowa. Pawulo yayogera okutuusiza ddala mu ttumbi. Waaliwo omuvubuka ayitibwa Yutuko eyali atudde mu ddirisa ng’awuliriza. Naye yatandika okusumagira era n’awanuka ku mwaliiro ogw’okusatu n’agwa wansi. Oboolyawo Lukka eyali omusawo ye yasooka okumutuukako n’amukebera era n’akakasa nti yali tazirise buzirisi, wabula yali afudde! Pawulo yakka wansi n’awambaatira omulambo era n’agamba abaaliwo nti: “Mulamu.” Ng’abaaliwo bateeka okuba nga baakwatibwako nnyo! Oluvannyuma lw’okulaba ekyamagero ekyo eky’okuzuukira abaaliwo ‘baasanyuka nnyo.’​—Bik. 20:7-12. w17.12 5 ¶10-11