Omuntu bw’Afa Ebibye Biba Tebikomye!

Bessaniya kyali kyalo kitonotono nga kiri mayiro nga bbiri okuva e Yerusaalemi. (Yokaana 11:18) Ekizibu eky’amaanyi kyagwa ku kyalo ekyo ng’ebula wiiki ntono Yesu attibwe. Laazaalo, omu ku mikwano gya Yesu egy’oku lusegere yalwala nnyo era n’afa.

Yesu bwe yakitegeera, yagamba abayigirizwa be nti Laazaalo yeebase era nti yali agenda kumuzuukusa. (Yokaana 11:11) Naye abayigirizwa be tebaategeera kye yali ategeeza, Yesu kwe kubagamba kaati nti: “Laazaalo afudde.”​—Yokaana 11:14.

Oluvannyuma lw’ennaku nnya nga bamaze okuziika Laazaalo, Yesu yatuuka e Bessaniya okubudaabuda Maliza, mwannyina w’omugenzi. Maliza yagamba Yesu nti: “Singa wali wano mwannyinaze teyandifudde.” (Yokaana 11:17, 21) Yesu yamuddamu nti: “Nze kuzuukira n’obulamu. Oyo anzikiriza ne bw’aliba ng’afudde, aliba mulamu.”​—Yokaana 11:25.

Okumukakasa nti kye yali amugambye kituufu, Yesu yagenda awaali entaana n’ayogera mu ddoboozi ery’omwanguka nti: “Laazaalo, fuluma ojje!” (Yokaana 11:43) Era bonna abaaliwo kyabeewuunyisa nnyo okulaba omusajja eyali afudde ng’ava mu ntaana.

Emabegako, Yesu yali azuukizza abantu babiri. Omu ku abo be yazuukiza yali muwala wa Yayiro. Yesu bwe yali tannamuzuukiza, yagamba nti omuwala oyo yali yeebase.​—Lukka 8:52.

Weetegereze nti Yesu bwe yali ayogera ku kufa kwa Laazaalo n’okwa muwala wa Yayiro, yakugeraageranya ku kwebaka. Lwaki okufa yakugeraageranya ku kwebaka? Okufaananako omuntu eyeebase, oyo aba afudde aba tamanyi kigenda mu maaso, aba tawulira bulumi, era aba tabonaabona. (Omubuulizi 9:5; laba ebiri wansi w’omutwe, “Okufa Kuli ng’Okwebaka.”) Abayigirizwa ba Yesu baali bamanyi embeera abafu gye balimu. Ekitabo ekiyitibwa Encyclopedia of Religion and Ethics kigamba nti: “Abagoberezi ba Yesu baali bakitwala nti okufa kuli ng’okwebaka, era nti entaana kifo kya kuwummuliramu . . . eri abo abaafa nga bakkiriza.”a

Kitubudaabuda okukimanya nti abafu beebase mu ntaana era tebabonaabona. Bwe tumanya embeera omuntu gy’abaamu ng’afudde, tuba tetukyatya kufa.

Ffenna tunyumirwa nnyo okwebaka ekiro. Naye waliwo eyandyagadde okwebakira ddala nga tazuukuka? Waliwo essuubi lyonna nti abafu abeebase mu ntaana bajja kuzuukira, nga Laazaalo ne muwala wa Yayiro bwe baazuukira?

Yobu omuweereza wa Katonda eyali omwesigwa yeebuuza ekibuuzo ekyo kyennyini bwe yalaba ng’anaatera okufa. Yeebuuza nti, “Omuntu bw’afa aliba mulamu nate?”​—Yobu 14:14.

Ng’ayogera ne Katonda Omuyinza w’Ebintu byonna, Yobu yeddiramu ekibuuzo kye ng’agamba nti: “Olimpita, nange ndikuyitaba. “Olyagala nnyo omulimu gw’engalo zo.” (Yobu 14:15, NW) Yobu yali mukakafu nti Yakuwa yeesunga nnyo okumuzuukiza. Kyandiba nti Yobu yali aloota buloosi? Nedda.

Eky’okuba nti Yesu yazuukiza abafu, kitukakasa nti Katonda yamuwa obuyinza ku kufa. Mu butuufu, Bayibuli egamba nti Yesu kati alina “ebisumuluzo by’okufa.” (Okubikkulirwa 1:18) N’olwekyo, nga bwe yazuukiza Laazaalo, ajja okuzuukiza abantu mu biseera eby’omu maaso.

Bayibuli eyogera ku ssuubi ery’okuzuukira enfunda eziwera. Malayika yakakasa nnabbi Danyeri nti: ‘Oliwummula, era oliyimirira oweebwe omugabo gwo, ennaku bwe zirikoma.’ (Danyeri 12:13) Yesu yagamba Abasaddukaayo, abakulembeze b’Abayudaaya abaali batakkiririza mu kuzuukira nti: “Mwakyama kubanga temumanyi Byawandiikibwa wadde amaanyi ga Katonda.” (Matayo 22:23, 29) Omutume Pawulo yagamba nti: “Nnina essuubi eri Katonda . . . nti wajja kubaawo okuzuukira kw’abatuukirivu n’abatali batuukirivu.”​—Ebikolwa 24:15.

Abatuukirivu n’abatali batuukirivu balizuukira ddi? Malayika yagamba Danyeri nti aliyimirira “ennaku bwe zirikoma.” Maliza naye yali akkiriza nti Laazaalo ‘yandizuukidde mu kuzuukira kw’oku lunaku olw’enkomerero.’​—Yokaana 11:24.

Bayibuli eraga nti olunaku luno “olw’enkomerero” lulina akakwate n’obufuzi bwa Yesu Kristo. Pawulo yawandiika nti: “Kubanga [Kristo] alina okufuga nga kabaka okutuusa nga Katonda amaze okussa abalabe be bonna wansi w’ebigere bye. Era omulabe alisembayo okuggibwawo kwe kufa.” (1 Abakkolinso 15:25, 26) Eyo ye nsonga lwaki tusaanidde okusaba Obwakabaka bwa Katonda bujje era ne Katonda by’ayagala bikolebwe ku nsi.b

Nga Yobu bwe yagamba, Katonda ayagala nnyo okuzuukiza abafu. Olunaku olwo bwe lunaatuuka, okufa kujja kuggibwawo. Era wajja kuba tewakyaliwo n’omu yeebuuza nti, ‘Omuntu bw’afa ebibye biba bikomye?’