• Sanyuka olw’Embaga ey’Omwana gw’Endiga!
    Omunaala gw’Omukuumi—2014 | Febwali 15

    •  6. Lwaki Abakristaayo abaafukibwako amafuta bayitibwa “omuwala wa kabaka,” era lwaki bagambibwa ‘okwerabira ekika kyabwe’?

      6 Omugole omukazi era ayitibwa ‘muwala wa kabaka.’ (Zab. 45:13) “Kabaka” oyo yaani? Kabaka oyo ye Yakuwa kubanga Abakristaayo abaafukibwako amafuta bafuuka ‘baana’ be. (Bar. 8:15-17) Okuva bwe kiri nti Abakristaayo abo bagenda kufuuka mugole mu ggulu, balagirwa ‘okwerabira ekika kyabwe, n’ennyumba ya kitaabwe.’ Ebirowoozo byabwe balina ‘kubikuumira ku bintu eby’omu ggulu, so si ku bintu eby’oku nsi.’​—Bak. 3:1-4.

  • Sanyuka olw’Embaga ey’Omwana gw’Endiga!
    Omunaala gw’Omukuumi—2014 | Febwali 15

    • OMUGOLE ‘ALEETEBWA ERI KABAKA’

       8. Lwaki omuwandiisi wa Zabbuli agamba nti omugole omukazi wa “kitiibwa kyereere”?

      8 Soma Zabbuli 45:13, 14a. Omuwandiisi wa Zabbuli yagamba nti omugole omukazi wa “kitiibwa kyereere.” Mu Okubikkulirwa 21:2 walaga nti omugole omukazi “alungiyiziddwa olwa bba” era ayogerwako ng’ekibuga Yerusaalemi Ekiggya. Ekibuga kino eky’omu ggulu kirina “ekitiibwa kya Katonda” era okwakaayakana kwakyo ‘kulinga okw’ejjinja erisingayo okuba ery’omuwendo, ejjinja eriyitibwa yasepi eritemagana.’ (Kub. 21:10, 11) Obulungi bwa Yerusaalemi Ekiggya bwogerwako mu kitabo ky’Okubikkulirwa. (Kub. 21:18-21) N’olwekyo, tekyewuunyisa nti omuwandiisi wa Zabbuli bw’aba ayogera ku mugole omukazi, agamba nti wa “kitiibwa kyereere.” Ate era kikulu okukijjukira nti embaga y’Omwana gw’Endiga egenda kubeera mu ggulu!

       9. “Kabaka” gwe baleetera omugole yaani, era omugole omukazi ayambadde atya?

      9 Omugole omukazi aleetebwa eri Omugole Omusajja, ng’ono ye Kabaka Yesu Kristo. Yesu amaze ekiseera kiwanvu ng’ateekateeka omugole omukazi, ‘ng’amunaaza n’amazzi okuyitira mu kigambo.’ Omugole oyo ‘mutukuvu era taliiko kamogo.’ (Bef. 5:26, 27) Omugole omukazi naye ateekwa okuba ng’ayambadde ebyambalo eby’obugole. Bayibuli egamba nti ebyambalo bye bitonaatoneddwako ‘zzaabu,’ era nti ajja ‘kuleetebwa eri kabaka ng’ayambadde ebyambalo eby’amabala,’ oba ebirukiddwa obulungi. Olw’okuba omugole omukazi agenda kufumbirwa Omwana gw’Endiga, “akkiriziddwa okwambala olugoye oluweweevu, olumasamasa, era oluyonjo, kubanga olugoye oluweweevu lukiikirira ebikolwa eby’obutuukirivu eby’abatukuvu.”​—Kub. 19:8.