• Okussa Ekitiibwa mu b’Obuyinza Kwetaagisa Okusobola Okubeera mu Mirembe
    Emirembe n’Obutebenkevu eby’Amazima—Oyinza Kubizuula Otya?

    • 11, 12. (a) Ebyawandiikibwa biraga bitya nga waliwo obufuzi obulala obw’okulowoozebwako? (b) Wandikoze ki singa abafuzi b’ensi bawa ebiragiro ebikontana n’ebyo Katonda bye yeetaaga, era lwaki?

      11 Kyokka, Yesu yalaga nti “Kayisaali,” gavumenti ey’eby’obufuzi, si bwe bufuzi bwokka obulina okulowoozebwako. “Abakulu abafuga” tebali waggulu wa Katonda oba wadde okumwenkana. Ku luuyi olulala, bo ba wansi nnyo gy’ali. Bwe kityo obukulu bwabwe buliko we bukoma, tebwemalirira. Olw’ensonga eno, Abakristaayo emirundi mingi boolekanyiziddwa n’eky’okusalawo ekizibu ddala. Kye ky’okusalawo ggwe naawe ky’oteekwa okwolekera. Abantu abali mu buyinza bwe balagira baweebwe ekyo ekya Katonda, onookola ki? Bwe bagaana ekyo Katonda ky’alagira, onoogondera ani?

      12 Abatume ba Yesu, mu ngeri essaamu ekitiibwa, naye nga banywevu baategeeza ekifo kyabwe eri ab’omu kkooti enkulu mu Yerusaalemi nti: “Tetuyinza kulema kwogeranga bye twalaba bye twawulira. . . . Kigwanira okuwulira Katonda okusinga abantu.” (Ebikolwa 4:​19, 20; 5:29) Oluusi gavumenti zissaawo okukugira mu biseera eby’omutawaana, era kino kitegeerekeka. Naye oluusi okukugira okuteekeddwawo gavumenti kuyinza okuba nti kuteekeddwawo okuyingirira okusinza kwaffe okwa Katonda n’okutulemesa okutuukiriza obuvunaanyizibwa obutuweereddwa Katonda. Olwo kiki? Ekigambo kya Katonda ekyaluŋŋamizibwa kiddamu nti: “Kigwanira okuwulira Katonda okusinga abantu.”

      13, 14. (a) Tusaanidde kwegendereza tutya okujeemera amateeka g’ensi olw’ensonga ezaffe ku bwaffe? (b) Wa ensonga ku kino okuva mu Byawandiikibwa.

      13 Newakubadde nga okukuuma obuvunaanyizibwa buno eri Katonda kiyinza okukontana n’ekyo “Kayisaali” kye yeetaaga, kino kya njawulo nnyo ddala okuva ku kumenya kyeyagalire amateeka ge tutakkiriziganya nago. Kya mazima nti, okusinziira ku ndaba y’omuntu omu, amateeka agamu gayinza okufaanana nga agateetaagisa oba agakugira ekisukkiridde. Naye kino tekiwa bbeetu kulagajjalira mateeka agatakontana na mateeka ga Katonda. Kyandibadde kitya singa abantu bonna bagonderako mateeka ago gokka ge balowooza nti ga mugaso gye bali? Kyandivuddemu buvi mitawaana.