Mokanda ya liboso ya Samwele

4 Yisraele mobimba ekómaki koyoka nsango oyo euti epai ya Nzambe na nzela ya Samwele.

Bongo, Bayisraele babimaki mpo na kobunda na Bafilistia. Batyaki kaa pembeni ya Ebenezere, kasi Bafilistia batyaki kaa na bango na Afeke. 2 Bafilistia batandamaki na molɔngɔ lokola basoda mpo na kobundisa Yisraele, kasi etumba ebebelaki Yisraele. Bafilistia balongaki Yisraele mpe babomaki mibali soki 4 000 na esika oyo etumba ekómaki makasi, na libándá ya engumba. 3 Ntango basoda ya Yisraele bazongaki na kaa, bankulutu ya Yisraele balobaki boye: “Mpo na nini Yehova atiki ete Bafilistia bálonga biso lelo?*+ Tókende kozwa sanduku ya kondimana ya Yehova na Shilo,+ mpo ezala elongo na biso mpe ebikisa biso na lobɔkɔ ya banguna na biso.” 4 Na yango, batindaki mibali na Shilo, mpe kuna, bazwaki sanduku ya kondimana ya Yehova ya mampinga, oyo afandi na kiti na ye ya bokonzi likoló* ya bakeruba.+ Hofini ná Finehase,+ bana mibali mibale ya Eli, bazalaki mpe wana ntango sanduku ya kondimana ya Nzambe ya solo ezalaki kokende.

5 Ntango kaka sanduku ya kondimana ya Yehova ekɔtaki na kaa, Bayisraele nyonso bagangaki makasi mpe mabele eninganaki mpo na lokito ya koganga na bango. 6 Ntango Bafilistia bayokaki makɛlɛlɛ ya bato bazali koganga, balobaki ete: “Mpo na nini bato bazali koganga makasi boye na kaa ya Baebre?” Nsukansuka, bayaki koyeba ete Sanduku ya Yehova ekɔti na kaa. 7 Bafilistia bakómaki kobanga, mpo balobaki: “Nzambe akɔti na kaa!”+ Bongo bagangaki ete: “Mawa mingi mpo na biso, mpo naino tomoná likambo ya boye te! 8 Mawa mingi mpo na biso! Nani akobikisa biso na lobɔkɔ ya Nzambe monene oyo? Ye nde Nzambe oyo abɛtaki Ezipito na esobe,+ na ndenge abomaki ebele ya bato na bampasi ya ndenge na ndenge. 9 Bózala na mpiko, bino Bafilistia, mpe bólakisa ete bozali mibali, mpo bósalela Baebre te ndenge bango basalelaki bino.+ Bólakisa ete bozali mibali mpe bóbunda!” 10 Na yango, Bafilistia babundaki mpe balongaki Yisraele.+ Bayisraele bakimaki, moto na moto na hema na ye. Ebele mpenza ya bato babomamaki; basoda 30 000 ya Yisraele oyo batambolaka na makolo bakufaki. 11 Lisusu, babɔtɔlaki Sanduku ya Nzambe, mpe bana mibale ya Eli, Hofini ná Finehase, bakufaki.+

12 Mobali moko ya Benyamina alongwaki na esika ya etumba na mbangu mpe akómaki na Shilo na mokolo yango, ná bilamba epasukapasuká mpe mabele na motó na ye.+ 13 Ntango mobali yango akómaki, Eli afandaki na kiti pembeni na nzela, azalaki kotalatala, mpo motema na ye ezalaki kobɛta mpo na Sanduku ya Nzambe ya solo.+ Mobali yango akɔtaki na engumba mpo na kopesa nsango, mpe bato nyonso ya engumba bagangaki na kolela. 14 Ntango Eli ayokaki makɛlɛlɛ ya bato bazali kolela, atunaki boye: “Makɛlɛlɛ ya yikiyiki wana elakisi nini?” Mobali yango akendaki nokinoki kopesa Eli nsango. 15 (Nzokande, Eli azalaki na mbula 98, miso na ye ezalaki koningana te, mpe azalaki komona lisusu te.)+ 16 Bongo mobali yango alobaki na Eli boye: “Ngai moto nauti na esika ya etumba! Nalongwe na esika ya etumba kaka lelo, mpe nakimi.” Na yango, Eli atunaki ye ete: “Mwana na ngai, likambo nini esalemi?” 17 Bongo momemi-nsango yango alobaki: “Yisraele ekimi liboso ya Bafilistia, mpe ebele mpenza ya bato bakufi;+ lisusu, bana na yo mibale Hofini ná Finehase bakufi,+ mpe Bafilistia babɔtɔli Sanduku ya Nzambe ya solo.”+

18 Ntango kaka alobaki likambo ya Sanduku ya Nzambe ya solo, Eli akweaki makalekale na kiti na ye pembeni ya porte, mpe nkingo na ye ebukanaki, bongo akufaki, mpo akómaki mobange mpe azalaki kilo mingi. Asambisaki Yisraele mbula 40. 19 Bokilo na ye, mwasi ya Finehase, azalaki na zemi mpe akómaki pene na kobota. Ntango ayokaki nsango ete babɔtɔli Sanduku ya Nzambe ya solo mpe ete tata-bokilo na ye ná mobali na ye bakufi, na mbala moko mpasi ya kobota eyelaki ye na pwasa mpe abotaki. 20 Liboso ete akata motema, basi oyo batɛlɛmaki pene na ye balobaki na ye: “Kobanga te, mpo oboti mwana mobali.” Kasi apesaki bango eyano te mpe atyelaki yango likebi te.* 21 Kasi apesaki mwana yango nkombo Ikabode,*+ mpe alobaki ete: “Nkembo elongwe na Yisraele mpe ekei na mboka mopaya.”+ Alobaki bongo mpo babɔtɔlaki Sanduku ya Nzambe ya solo mpe mpo na likambo oyo ekómelaki tata-bokilo na ye ná mobali na ye.+ 22 Alobaki ete: “Nkembo elongwe na Yisraele mpe ekei na mboka mopaya, mpo babɔtɔli Sanduku ya Nzambe ya solo.”+