Mokanda ya liboso ya Samwele

9 Ezalaki na mobali moko ya Benyamina, nkombo na ye Kishe,+ mwana ya Abiele, mwana ya Zerore, mwana ya Bekorate, mwana ya Afia. Mobali yango azalaki moto ya libota ya Benyamina+ mpe azalaki na bozwi mingi. 2 Azalaki na mwana mobali moko, nkombo na ye Saulo;+ azalaki elenge mpe kitoko. Mobali moko te na Yisraele mobimba alekaki ye na kitoko. Longola yango, banda na mapeka tii na motó, alekaki bato nyonso na molai.

3 Bampunda* ya Kishe, tata ya Saulo, ebungaki. Na yango, Kishe alobaki na mwana na ye Saulo boye: “Nabondeli yo, zwá mosaleli moko mpe bókende koluka bampunda yango.” 4 Bongo Saulo ná mosaleli na ye bakendaki na etúká ya ngombangomba ya Efraime mpe, na nsima, balekaki na mokili ya Shalisha, kasi bamonaki bampunda yango te. Bakendaki na mokili ya Shaalime, kasi kuna mpe ezalaki te. Balekaki na mokili mobimba ya Babenyamina, kasi bamonaki yango te.

5 Ntango bakómaki na mokili ya Zufe, Saulo alobaki na mosaleli na ye ete: “Yaká tózonga, noki tata na ngai akóma komitungisa mpo na biso na esika amitungisa mpo na bampunda.”+ 6 Kasi mosaleli na ye alobaki na ye boye: “Talá! moto moko ya Nzambe azali na engumba oyo, mpe bapesaka moto yango lokumu. Makambo nyonso oyo alobaka ezangaka te kokokisama.+ Tókende kuna sikoyo. Mbala mosusu akoyebisa biso esika oyo tosengeli kokende.” 7 Na yango, Saulo alobaki na mosaleli na ye boye: “Soki tokei kuna, tokopesa moto yango nini? Tozali na mampa te na basaki na biso; tozali mpe te na likabo ya kopesa moto wana ya Nzambe ya solo. Tozali na nini?” 8 Bongo mosaleli yango alobaki na ye lisusu boye: “Talá! Nazali na moko ya bandambo minei ya shekele* ya palata awa. Nakopesa yango moto ya Nzambe ya solo, mpe akoyebisa biso esika oyo tosengeli kokende.” 9 (Na ntango ya kala na Yisraele, soki moto alingi kokende kotuna Nzambe likambo azalaki koloba: “Bóya tókende epai ya momoni-makambo.”+ Mpo na ntango ya kala, bazalaki kobenga mosakoli momoni-makambo.) 10 Na yango, Saulo alobaki na mosaleli na ye ete: “Olobi malamu. Tókende.” Bongo bakendaki na engumba yango, esika moto ya Nzambe ya solo azalaki.

11 Ntango bazalaki komata na engumba yango, bakutanaki na bilenge basi oyo bazalaki kobima mpo na kotoka mai. Na yango, batunaki bango: “Momoni-makambo+ azali na mboka oyo?” 12 Bayanolaki: “Ɛɛ, azali. Talá! Azali liboso na bino. Sikoyo bósala noki, mpo ayei na engumba lelo, mpo bato bazali kopesa mbeka+ lelo na esika oyo etombwaná.+ 13 Ntango kaka bokokɔta na engumba, bokokuta ye liboso ete amata na esika oyo etombwaná mpo na kolya. Bato bakolya te kino ntango akokóma kuna, mpo ye moto apambolaka mbeka. Kaka soki apamboli mbeka nde bato oyo babengisami bakoki kolya. Boye, bómata kaka sikoyo, mpe bokokuta ye.” 14 Na yango, bamataki na engumba. Wana bazalaki kokɔta na engumba, Samwele abimaki kokutana na bango mpo na kokende na esika oyo etombwaná.

15 Mokolo moko liboso ete Saulo aya, Yehova ayebisaki Samwele* boye: 16 “Lobi, pene na ngonga oyo, nakotindela yo mobali moko oyo akouta na mokili ya Benyamina.+ Osengeli kotya ye mafuta mpo akóma mokambi ya bato na ngai Yisraele,+ mpe akobikisa bato na ngai na lobɔkɔ ya Bafilistia. Mpo namoni mpasi ya bato na ngai, mpe kolela na bango ekómi na matoi na ngai.”+ 17 Ntango Samwele amonaki Saulo, Yehova ayebisaki ye ete: “Talá mobali oyo nayebisaki yo ete, ‘Ye moto akokamba bato na ngai.’”*+

18 Bongo Saulo apusanaki pene na Samwele na porte ya engumba mpe alobaki: “Nabondeli yo, yebisá ngai, wapi ndako ya momoni-makambo?” 19 Samwele ayanolaki Saulo: “Ngai nde momoni-makambo. Bómata liboso na ngai na esika oyo etombwaná, mpe bokolya elongo na ngai lelo.+ Na ntɔngɔ, nakotika yo okende, mpe nakoyebisa yo makambo nyonso oyo olingi koyeba.* 20 Mpo na bampunda oyo ebungaki eleki mikolo misato,+ komitungisa te mpo na yango, mpo emonani. Biloko nyonso ya kitoko ya Yisraele ezali ya nani? Ezali ya yo mpe ya ndako mobimba ya tata na yo, boye te?”+ 21 Na yango, Saulo azongisaki: “Ngai nazali moto ya Benyamina, libota oyo eleki moke na mabota ya Yisraele,+ mpe libota na ngai ezangi mpenza ntina na mabota nyonso ya Benyamina, boye te? Sikoyo, mpo na nini olobi na ngai bongo?”

22 Na nsima, Samwele amemaki Saulo mpe mosaleli na ye na esika ya kolya, mpe apesaki bango esika ya lokumu mingi kati na bato soki 30 oyo babengisamaki. 23 Samwele alobaki na molambi ete: “Yaká na eteni oyo napesaki yo, mpe oyo nayebisaki yo: ‘Tyá yango pembeni.’” 24 Na yango, molambi azwaki lokolo ya nyama, mpe atyaki yango liboso ya Saulo. Mpe Samwele alobaki: “Batyeli yo biloko oyo babombelaki yo. Lyá, mpo babombelaki yo yango mpo na libaku oyo. Mpo nalobaki na bango: ‘Nakoyamba bapaya.’” Bongo Saulo alyaki elongo na Samwele na mokolo yango. 25 Na nsima, balongwaki na esika oyo etombwaná+ mpe bakitaki na engumba, mpe akobaki kosolola na Saulo likoló ya ndako. 26 Balamukaki ntɔngɔntɔngɔ, mpe ntango kaka ntɔngɔ ebandaki kotana, Samwele abengaki Saulo na likoló ya ndako, alobi: “Omibongisa, mpo natika yo okende.” Na yango, Saulo atɛlɛmaki mpe ye ná Samwele babimaki libándá. 27 Ntango bazalaki kokita mpo na kokende libándá ya engumba, Samwele alobaki na Saulo boye: “Yebisá mosaleli na yo+ akende liboso na biso, kasi yo, tɛlɛmá sikoyo mpo nayebisa yo liloba ya Nzambe.” Bongo mosaleli yango akendaki liboso na bango.