Mituna ya batángi

Nini mpenza esalemaki na lisolo oyo ezali na Exode 4:24-26 (NW), mpe bomoi ya nani ezalaki na likama?

Moize azalaki kozonga na Ezipito ná Sipola, mwasi na ye mpe bana na bango mibale, Gelesome ná Eliezele, ntango likambo oyo esalemaki: “Na nzela, ntango bakómaki na esika ya kolala, Yehova akutanaki na ye mpe alukaki ndenge ya koboma ye. Bongo, Sipola azwaki libanga moko ya mopɔtu mpe akataki na yango esute ya mwana na ye mpe atutisaki yango na makolo na ye mpe alobaki: ‘Mpamba te ozali mobali ya makila mpo na ngai.’ Na yango, atikaki ye. Na ntango wana, mwasi alobaki ete: ‘Mobali ya makila,’ na ntina na kokata ngenga.” (Exode 4:20, 24-26, NW) Atako bavɛrsɛ yango ezali mpenza polele te mpe ezali mpasi koyeba mpenzampenza ndimbola na yango, Biblia ezali kosalisa biso tókanga ntina na yango.

Lisolo yango elobi polele te soki bomoi ya nani ezalaki na likama. Kasi, tokoki koloba ete bomoi ya Moize te nde ezalaki na likama, mpamba te Nzambe autaki kopesa ye mokumba ya kobimisa Bayisalaele na Ezipito. (Exode 3:10) Ekokaki kosalema te ete anzelu ya Nzambe aluka koboma Moize kaka na ntango oyo azalaki kokende kokokisa mokumba oyo Nzambe apesaki ye. Na bongo, esengeli kozala bomoi ya mwana na ye moko nde ezalaki na likama. Mobeko oyo Nzambe apesaki Abalayama na ntina etali kokatama ngenga elobaki boye: “Mobali na esute, oyo akatami ngenga kati na mosuni na ye te, akobomama kati na bato na ye mpo ete ye asili koboya kondimana na ngai.” (Genese 17:14) Emonani ete Moize akataki mwana na ye ngenga te, yango wana, anzelu ya Yehova alukaki koboma ye.

Makolo ya nani Sipola atutisaki esute oyo akataki mwana na ye mpo abomama te? Anzelu ya Yehova nde azalaki na nguya ya koboma mwana oyo akatamaki ngenga te. Na bongo, Sipola asengelaki nde kotutisa esute yango na makolo ya anzelu, mpo na komonisa ye ete asali likambo oyo esɛngamaki na kondimana.

Maloba oyo Sipola alobaki ete “ozali mobali ya makila mpo na ngai” ekoki kokamwisa biso. Maloba yango emonisi nini mpo na ye? Lokola Sipola andimaki kokata mwana na ye ngenga ndenge kondimana esɛngaki, yango emonisi ete andimaki kokɔta na kondimana na Yehova. Kondimana ya Mibeko oyo Yehova asalaki na Bayisalaele emonisaki ete na kati ya kondimana moko na Yehova, ye akoki kobengama mobali mpe baoyo asali na bango kondimana, mwasi. (Yilimia 31:32) Na bongo, lokola Sipola abengaki Yehova (na nzela ya anzelu na ye) ete “mobali ya makila,” yango emonisi ete andimaki kotosa masɛngami ya kondimana yango. Ezalaki lokola nde andimaki kozala mwasi na kondimana ya kokatama ngenga, kati na yango Yehova azalaki mobali. Ata soki ezalaki ndenge nini, bomoi ya mwana na ye ezalaki lisusu na likama te mpo akakatanaki te kotosa likambo oyo Nzambe asɛngaki.