Yesu ateyi biso

Na ntina na elikya mpo na bakufi

Ntango Yesu azalaki awa na mabelé, asekwisaki bato soki misato; na ndenge yango amonisaki ete elikya ezali mpo na bakufi. (Luka 7:11-17; 8:49-56; Yoane 11:1-45) Mpo na kokanga ntina ya elikya yango, tosengeli libosoliboso koyeba ntina oyo moto akufaka mpe soki liwa eutá wapi.

Mpo na nini moto abɛlaka mpe akufaka?

Ntango Yesu azalaki kolimbisa masumu ya bato oyo bazalaki na maladi, bato yango bazalaki kobika. Na ndakisa, ntango bamemelaki ye mokatatali moko, Yesu alobaki boye: “‘Nini eleki pɛtɛɛ, koloba, Masumu na yo elimbisami, to koloba, Tɛlɛmá mpe tambolá? Nzokande, mpo bóyeba ete Mwana ya moto azali na bokonzi ya kolimbisa masumu awa na mabelé​—’ bongo alobaki na mokatatali yango ete: ‘Tɛlɛmá, lɔkɔtá mbeto na yo, mpe kende epai na yo.’” (Matai 9:2-6) Na yango, moto abɛlaka mpe akufaka mpo na lisumu. Lisumu eutá na moto ya liboso, Adama.​—Luka 3:38; Baloma 5:12.

Mpo na nini Yesu akufaki?

Yesu asalaki lisumu ata moko te. Na yango, Yesu asengelaki kokufa te. Kasi, akufaki mpo masumu na biso elimbisama. Alobaki ete makila na ye “ekosopama mpo na bato mingi mpo na bolimbisi ya masumu.”​—Matai 26:28.

Yesu alobaki mpe ete: “Mwana ya moto ayaki, mpo básalela ye te, kasi mpo na kosalela mpe kopesa molimo na ye lisiko na esika ya bato mingi.” (Matai 20:28) Yesu alobaki ete motuya oyo afutaki ezali “lisiko” mpamba te esikolaki bato na liwa. Yesu alobaki lisusu boye: “Ngai nayei mpo bázwa bomoi mpe bázwa yango mingi.” (Yoane 10:10) Mpo na kokanga malamumalamu ntina ya elikya mpo na bakufi, tosengeli mpe koyeba soki bakufi bakendaka wapi.

Nini ekómelaka moto ntango akufi?

Ntango Lazalo, moninga ya Yesu akufaki, Yesu amonisaki polele oyo ekómelaka moto ntango akufi. Alobaki na bayekoli na ye ete: “‘Lazalo moninga na biso akei kopema, kasi nazali kokende kuna [na Betania] mpo na kolamwisa ye na mpɔngi’ . . . Bakanisaki ete azali kolobela kopema na mpɔngi. Bongo, na ntango wana Yesu alobaki na bango polelepolele ete: ‘Lazalo akufi.’” Na ndenge yango, Yesu amonisaki polele ete bakufi bazali lokola bato oyo balali mpɔngi, bayebi likambo moko te.​—Yoane 11:1-14.

Lazalo asilaki kokufa elekaki mikolo minei ntango Yesu asekwisaki ye. Nzokande, Lazalo alobaki te ete amonaki makambo ntango akufaki. Lazalo azalaki koyeba ata eloko moko te ntango akufaki.​—Mosakoli 9:5, 10; Yoane 11:17-44.

Elikya nini ezali mpo na bakufi?

Bakufi bakosekwa mpe bakozwa elikya ya kozala na bomoi ya seko. Yesu alobaki boye: “Ngonga ezali koya wana baoyo nyonso bazali na kati ya malita ya kokanisama bakoyoka mongongo na ye [Yesu] mpe bakobima.”​—Yoane 5:28, 29.

Elikya yango ezali komonisa ete Nzambe azali na bolingo. Yesu alobaki boye: “Nzambe alingaki mokili mingi na boye ete apesaki Mwana na ye mobotami-se-moko, mpo moto nyonso oyo azali komonisa kondima na kati na ye abomama te kasi azala na bomoi ya seko.”​—Yoane 3:16; Emoniseli 21:4, 5.

Mpo na koyeba makambo mosusu, talá buku Biblia eteyaka mpenza nini? mokapo 6a.

[Maloba na nse ya lokasa 17]