Pusaná penepene na Nzambe

Alingaka biso tózala na bomoi ya malamu

Yosua 1:6-9

BABOTI oyo balingaka bana na bango, bazalaka na mposa ya komona bango bazali na bomoi ya malamu mpe ya esengo. Yehova, Tata na biso ya likoló alingaka mpe ete biso bana na ye awa na mabele tózala malamu. Mpo na komonisa ete amibanzabanzaka mpo na biso, ayebisaka biso ndenge tokoki kosala mpo na kolonga. Tózwa ndakisa ya maloba oyo alobaki na Yosua, maloba oyo ezali na Yosua 1:6-9.

Talá elilingi oyo ezali na lobɔkɔ ya mobali. Nsima ya liwa ya Moize, Yosua akómaki kokamba ekólo Yisraele oyo ezalaki na bamilio ya bato. Bayisraele bazalaki komibongisa mpo na kokɔta na mokili oyo Nzambe alakaki bankɔkɔ na bango. Nzambe apesaki Yosua mwa batoli. Kolanda toli yango elingaki kosalisa ye alonga. Kasi, toli yango ezalaki kaka mpo na Yosua ye moko te. Soki biso mpe tosaleli yango, tokolonga.​—Baroma 15:4.

Kaka mbala moko te, kasi mbala misato mobimba, Yehova ayebisaki Yosua azala na mpiko mpe makasi. (Vɛrsɛ 6, 7, 9) Emonani polele ete Yosua asengelaki na mpiko mpe makasi mpo na kokamba malamu ekólo yango na Mokili ya Ndaka. Asengelaki kosala nini mpo azala na mpiko mpe makasi?

Yosua akokaki kozwa mpiko mpe makasi yango na nzela ya makomami ya Nzambe. Yehova alobaki ete: “Okeba ete otosa makambo nyonso ndenge ezali na mobeko oyo Moize, mosaleli na ngai, apesaki yo mitindo.” (Vɛrsɛ 7) Emonani ete na ntango wana, Yosua azalaki kaka na mwa mikanda moke ya Biblia.a Kasi, kozala na Liloba ya Nzambe ezalaki ndanga te mpo na kolonga. Mpo na kozwa litomba, Yosua asengelaki kosala makambo mibale.

Ya liboso, Yosua asengelaki kotondisa motema na ye na liloba ya Nzambe. Yehova alobaki boye: “Osengeli kotángaka yango na mongongo ya nse butu moi.” (Vɛrsɛ 8) Buku moko elobi ete: “Nzambe apesaki Yosua etinda ete akanisaka Mobeko na Ye; alobaka yango ye moko na ‘nse ya motema,’ ‘akanisaka yango,’ to ‘amanyolaka yango.’” Kotánga mpe kokanisa Liloba ya Nzambe mokolo na mokolo esengelaki kosalisa Yosua alonga mikakatano oyo ezalaki liboso na ye.

Ya mibale, Yosua asengelaki kosalelaka makambo oyo azali koyekola na Liloba ya Nzambe. Yehova ayebisaki ye boye: “Okeba ete otosa makambo nyonso ndenge ekomami na kati na yango; mpo, na ndenge yango nde okolongisa nzela na yo.” (Vɛrsɛ 8) Mpo Yosua alonga na nzela na ye asengelaki kosala mokano ya Nzambe. Ezali mpenza bongo! Mokano ya Nzambe elongaka ntango nyonso.​—Yisaya 55:10, 11.

Yosua alandaki toli wana ya Yehova. Mpo na yango, azalaki na bomoi ya malamu mpe ya esengo mpe asalelaki Yehova na bosembo.​—Yosua 23:14; 24:15.

Yo mpe olingi kozala na bomoi ya malamu lokola Yosua? Yehova alingaka mpenza ete olonga. Kasi, yebá ete kozala kaka na Liloba na ye Biblia ekoki te. Mokristo moko ya sembo oyo asaleli Yehova bambula ebele, apesi toli oyo: “Tángáká Biblia mpe saleláká makambo oyo ozali kotánga.” Soki ozali ntango nyonso kotondisa motema na yo na Liloba ya Nzambe mpe ozali kosalela makambo oyo ozali koyekola, na ntembe te lokola Yosua yo mpe “okolongisa nzela na yo.”

[Maloba na nse ya lokasa]