Ezela

8 Ino’i yo mitwe ya mobo a bashabo ne boba balembelwe mungya misuku bakandile nami kutamba ku Babiloni mu bulopwe bwa Mulopwe Alatazelekishishi:+ 2 ku bana ba Finease,+ Ngelashoma; ku bana ba Itamala,+ Danyele; ku bana ba Davida, Hatushe; 3 ku bana ba Shekania, wa ku bana ba Paloshi, Zekadia, ne bana-balume 150 balembelwe pamo nandi; 4 ku bana ba Pahata-Moabu,+ Edieho-Enai mwanā Zelahia, ne bana-balume 200 pamo nandi; 5 ku bana ba Zatu,+ Shekania mwanā Yahaziele, ne bana-balume 300 pamo nandi; 6 ku bana ba Adine,+ Ebede mwanā Yonafane, ne bana-balume 50 pamo nandi; 7 ku bana ba Elama,+ Yeshaia mwanā Atadia, ne bana-balume 70 pamo nandi; 8 ku bana ba Shefatia,+ Zebadia mwanā Mikaele, ne bana-balume 80 pamo nandi; 9 ku bana ba Yoabe, Obadia mwanā Yehiele, ne bana-balume 218 pamo nandi; 10 ku bana ba Bani, Shelomite mwanā Yoshifia, ne bana-balume 160 pamo nandi; 11 ku bana ba Bebai,+ Zekadia mwanā Bebai, ne bana-balume 28 pamo nandi; 12 ku bana ba Azakade,+ Yohanana mwanā Hakatana, ne bana-balume 110 pamo nandi; 13 ku bana ba Adonikama,+ ba mfulo, ano’a o majina abo: Edifelete, ne Yeiele, ne Shemaia, ne bana-balume 60 pamo nabo; 14 ku bana ba Bikivai+ nako, Utai ne Zabudi, ne bana-balume 70 pamo nabo.

15 Nebabungila ku munonga wiya ku Ahava,+ twatūla’ko nkambi mafuku asatu, ino ponabandawile bantu ne babitobo, nkyatene’mopo mwine Levi nansha umo. 16 Penepo natumanya bakete Ediezela, ne Adiele, ne Shemaia, ne Elenatana, ne Yadibe, ne Elenatana, ne Natana, ne Zekadia, ne Meshulama, batangidiji, ne Yoyadibi ne Elenatana, bafundiji. 17 Ebiya nebapa musoñanya pa mwanda wa Ido mutangidiji wa mu kifuko kitwa bu Kashifia. Nebalombola bakasapwile Ido ne banababo, bengidi ba ku tempelo* badi mu Kashifia, betuletele bengidi ba njibo ya Leza wetu. 18 Kuboko kuyampe kwa Leza wetu byokwadi potudi, baselele muntu mudyumuke mu bana ba Maheli+ munkanā Levi mwanā Isalela, ko kunena’mba, Shelebia,+ ne bandi bana ne banababo, bana-balume 18; 19 ne Hashabia, pamo ne Yeshaia wa ku bene Meladi,+ ne banababo ne babo bana, bana-balume 20. 20 Kadi kwadi bengidi ba ku tempelo* 220, bobapēle mingilo ya bene Levi kudi Davida ne bamfumu, abo bonso batelelwe pa majina.

21 Penepo naela lubila lwa kushikilwa na nzala kwine’kwa ku munonga wa Ahava, mwanda wa twityepeje ku meso a Leza wetu, tukimbe buludiki butamba kwadi pa lwendo lwetu, batwe ne betu bana ne bintu byetu byonso. 22 Naivwene bumvu bwa kulomba mulopwe basola ne bakandanga pa tubalwe ba kwitukinga ku balwana netu mu dishinda, mwanda twalombwele mulopwe amba: “Kuboko kuyampe kwa Leza wetu kudi pa boba bonso bamukimba,+ ino bukomo bwandi ne bulobo bwandi bidi pa boba bonso bamuleka.”+ 23 Penepo twashikilwa na nzala ne kulomba Leza wetu pa uno mwanda, nandi waivwana kuzenza kwetu.+

24 Ebiya natūla pafula bakata ba babitobo 12, ko kunena’mba, ba Shelebia ne Hashabia,+ ne banababo dikumi. 25 Penepo nebapimina ndalama ne olo ne bipungwa, kyabuntu kyobaletele ku njibo ya Leza wetu kudi mulopwe ne badingidi bandi ne bamfumu bandi ne bene Isalela bonso badi kwine’kwa.+ 26 Enka nenki nebapimina mu kuboko kwabo talenta* 650 ya ndalama, ne bipungwa 100 bya ndalama bya bulēme bwa talenta 2, ne talenta 100 ya olo, 27 ne ngeso mityemitye 20 ya olo ya bulēme bwa ndadiki* 1 000, ne bipungwa 2 bya mukuba mulumbuluke, utyila ujimuka, bilumbuluke pamo bwa olo.

28 Penepo nebanena’mba: “Banwe mwi bajila kudi Yehova,+ ne bipungwa nabyo i bijila, kadi ndalama ne olo i kyamulambu kya kwilanga kudi Yehova Leza wa bakulutuba benu. 29 Mwibilamei senene kufika ne byomwibipima ku meso a bakata ba babitobo ne bene Levi ne bamfumu ba mobo a bashandya Isalela mu Yelusalema,+ mu byumba* bya njibo ya Yehova.” 30 Ebiya babitobo ne bene Levi basela ndalama ne olo ne bipungwa byebapimīnwe, mwanda wa kwibileta ku Yelusalema ku njibo ya Leza wetu.

31 Ku mfulo twataluka ku munonga wa Ahava+ mu difuku dya 12 dya kweji mubajinji,+ twaenda ku Yelusalema, kadi kuboko kwa Leza wetu kwadi potudi, nandi wetukūla ku kuboko kwa walwana ne ku kujikilwa mu dishinda. 32 Penepo twaiya ku Yelusalema+ twashikata’ko mafuku asatu. 33 Mu difuku dya buná, twapima ndalama ne olo ne bipungwa mu njibo ya Leza wetu,+ twapa’byo Melemote+ mwanā Udiya kitobo, wadi na Eleaza mwanā Finease, kadi badi ne na bene Levi, ba Yozabada+ mwanā Yeshua ne Noadia mwanā Binui.+ 34 Bintu byonso byabadilwe ne kupimwa, kadi bulēmi bonso bwalembwa. 35 Boba batambile mu bu misungi, badi dibajinji bu misungi, baletele bitapwa bisōkwe kudi Leza wa Isalela, bañombe+ 12 mwanda wa Isalela ense, mikōko milume+ 96, twana twa mikōko tulume 77, ne bambuji balume+ 12 bu kyamulambu kya bubi; bino byonso byadi bu kyamulambu kisōkwe kudi Yehova.+

36 Penepo twafikija mbila ya mulopwe+ kudi babilolo* ba mulopwe ne bambikavu ba ntanda ya Bukila bwa Munonga,*+ nabo bakwasha bantu ne njibo ya Leza wa bine.+