Bene Levi

13 Yehova wanena ba Mosesa ne Alone monka’mba: 2 “Shi muntu watambwe pa lukoba* lwandi na kimenwa, kitāto, nansha dikeme bikokeja kwikala bu musongo wa makopo*+ pa lukoba lwandi, ufwaninwe kuselelwa kudi Alone kitobo nansha kudi umo wa mu bandi bana babitobo.+ 3 Kitobo ukabandaula luba ludi pa lukoba lwandi. Shi myoya idi’po keitōka ne shi luba lumweka bu lubakola kutabuka ne lukoba, nabya i musongo wa makopo. Kitobo ukabandaula’lo ne kumutela bu wa disubi. 4 Ino shi dikeme didi pa lukoba lwandi i ditōka ino dimweka bu kedikolelepo kutabuka ne lukoba ne myoya nayo kutōka mpika, nabya kitobo ukasonsolola yao muntu wa luba mafuku asamba-abidi.+ 5 Penepa kitobo ukamubandaula difuku dya busamba-bubidi, kadi shi bibamweka’mba luba lwimene’nka pamo ne kwandabila pa lukoba mpika, kitobo ukamusonsolola mafuku asamba-abidi makwabo.

6 “Kitobo ukamubandaula monka difuku dya busamba-bubidi, ino shi luba’lwa lubajimankana ne kelusambakenepo pa lukoba, kitobo ukamutela bu wampikwa disubi;+ kyadi kitāto bitupu. Ebiya muntu’wa ukakenda bivwalwa byandi ne kwikala wampikwa disubi. 7 Ino shi ku mfulo kitāto* kibaandabila pa lukoba aye pa kupwa kumweka ku meso a kitobo wa kujingulula kwandi kutōkejibwa, ukamweka monka* ku meso a kitobo. 8 Kitobo ukabandaula’kyo, kadi shi kitāto kibaandabila pa lukoba, kitobo ukamutela bu wa disubi. I makopo.+

9 “Shi musongo wa makopo ubakwata muntu, nabya ufwaninwe kuselelwa kudi kitobo, 10 kitobo nandi ukamubandaula.+ Shi kudi kimenwa kitōka pa lukoba lwandi kadi kibatōkeja myoya ne pa kimenwa’pa pabaikala kilonda kitutumuke,+ 11 i makopo a nyeke adi pa lwandi lukoba, kitobo ukamutela bu wa disubi. Kakamusonsololapo+ mwanda i wa disubi. 12 Ino shi makopo abamutambe pa lukoba ponso kadi makopo’a abasambakanya muntu misongo tamba ku mutwe kutūla ne ku kulu, bibwanya kumona kitobo, 13 kadi kitobo wamubandaula wamone amba makopo abasambakana pa lukoba lwandi ponso, nabya ukamutela muntu wa luba’wa bu wampikwa disubi.* Alo lonso ke lutōka, ino aye i wampikwa disubi. 14 Ino kitatyi kyonso kimweka’po kilonda kitutumuke, ukekala wa disubi. 15 Shi kitobo wamone kilonda kitutumuke’kya, ukamutela bu wa disubi.+ Kilonda i kya disubi. I makopo.+ 16 Ino shi kilonda kitutumuke kibatōka monka, nabya ukāya kudi kitobo. 17 Kitobo ukamubandaula,+ kadi shi luba’lwa ke lutōka, nabya kitobo ukatela muntu wa luba’wa bu wampikwa disubi. I wampikwa disubi.

18 “Shi muntu wamenwa kipote pa lukoba lwandi kupwa kibakoma, 19 ino ponka padi kipote pabatambe kimenwa nansha dikeme ditōka na dityilakana, ufwaninwe kukelombola kudi kitobo. 20 Kitobo ukabandaula’kyo,+ ne shi kimweka’mba i kikole kutabuka ne lukoba kadi myoya idi’po nayo keitōka, nabya kitobo ukamutela bu wa disubi. I musongo wa makopo wamutamba bu kipote. 21 Ino shi kitobo wekibandaula wamone amba kepadipo myoya itōka, kekikolelepo kutabuka ne lukoba kadi kimweka bu kyenda kijimankana, nabya kitobo ukamusonsolola mu mafuku asamba-abidi.+ 22 Kadi shi bibamweka patōkelela’mba kibaandabila pa lukoba, nabya kitobo ukamutela bu wa disubi. I musongo. 23 Ino shi dikeme dibashala pantu pamo ne kwandabila mpika, i kuyula kwa kipote, kitobo ukamutela bu wampikwa disubi.+

24 “Nansha kadi shi muntu udi na mukovu wa mudilo ino musunya wa pa mukovu ubaalamuka ke dikeme ditōka na dityilakana nansha ditōka tō, 25 nabya kitobo ukedibandaula. Shi myoya idi pa dikeme keitōka ne bimweka’mba i dikole kutabuka ne lukoba, i makopo atamba mu mukovu, kitobo ukamutela bu wa disubi. I musongo wa makopo. 26 Ino shi kitobo wedibandaula wamone amba pa dikeme kepadipo myoya itōka kadi kedikolelepo kutabuka ne lukoba ino ke dyenda dijimankana, nabya kitobo ukamusonsolola mafuku asamba-abidi.+ 27 Kitobo ukamubandaula difuku dya busamba-bubidi, shi bimweka patōkelela’mba dibaandabila pa lukoba, nabya kitobo ukamutela bu wa disubi. I musongo wa makopo. 28 Ino shi dikeme’dya dikele pantu pamo ne kedyandabilepo pa lukoba inoko dibajimankana, i kimenwa’tu kya pa mukovu, kitobo ukamutela bu wampikwa disubi, mwanda i mukovu wayula.

29 “Shi mwana-mulume nansha mwana-mukaji ekale na luba ku mutwe nansha ku kabanga, 30 kitobo ukabandaula luba’lwa.+ Shi bimweka’mba i lukole kutabuka ne lukoba kadi myoya keidi na musombelo wa mandyano kadi i mityetye, nabya kitobo ukatela yao muntu bu wa disubi; i luba lwa ku mutwe ne ku myevu. I makopo a ku mutwe nansha ku kabanga. 31 Ino shi kitobo wajingulula’mba luba kelumwekapo amba i lukole kutabuka ne lukoba kadi i patupu myoya ifīta, kitobo ufwaninwe kusonsolola muntu wa luba’wa mafuku asamba-abidi.+ 32 Kitobo ukabandaula luba difuku dya busamba-bubidi, kadi shi popa padi luba kepabailepo, ne myoya ya musombelo wa mandyano keimenene’popo ne kadi popa padi luba kepakolelepo kutabuka ne lukoba, 33 muntu’wa uketenda myoya, ino kakatendapo popa padi luba. Kupwa kitobo ukasonsolola yao muntu wa luba mafuku asamba-abidi.

34 “Kitobo ukabandaula monka popa padi luba difuku dya busamba-bubidi, kadi shi luba lwa mu mutwe nansha ku myevu kelwandabilepo pa lukoba kadi kelukolelepo kutabuka ne lukoba, nabya kitobo ufwaninwe kumutela bu wampikwa disubi, nandi ufwaninwe kukenda bivwalwa byandi ne kwikala bu wampikwa disubi. 35 Ino shi bimweka patōka’mba luba lubaandabila pa lukoba pa kupwa kutōkejibwa, 36 kitobo ukamubandaula, shi luba i lwandabile pa lukoba, kitobo kadipo kyatadila shi myoya i ya musombelo wa mandyano; yao muntu i wa disubi. 37 Ino shi pa kubandaula wamone amba luba kelwandabilepo ne kadi pabamena myoya ifīta, luba lubakoma. I wampikwa disubi, kadi kitobo ukamutela bu wampikwa disubi.+

38 “Shi mwana-mulume nansha mwana-mukaji waikala na makeme pa lukoba* kadi makeme’a i atōka, 39 kitobo ukabandaula’o.+ Shi makeme a pa lukoba i atōkoloka, i bipusu bitupu byatamba pa lukoba. Yao muntu i wampikwa disubi.

40 “Shi muntu wasesukwa nywene ya ku mutwe wandi kadi na dibala, i wampikwa disubi. 41 Shi wasesukwa nywene ya ku mpala kwa mutwe wandi kekudi dibala, i wampikwa disubi. 42 Ino shi kilonda kitōka na kityilakana kibatambe mu dibala dya ku mutwe nansha pa mpala yandi, i makopo atamba mu mutwe wandi nansha mu mpala yandi. 43 Kitobo ukamubandaula, shi kimenwa kya luba’kya i kitōka na kityilakana mu dibala pa bukata bwa mutwe wandi nansha ku mpala kadi kimweka bwa makopo pa lukoba lwandi, 44 i wa makopo. I wa disubi, kadi kitobo ukamutela bu wa disubi mwanda wa musongo udi ku mutwe wandi. 45 Ino wa makopo udi na musongo’wa, bivwalwa byandi bikasanwa kadi mutwe wandi ukashala musalakane ne ukapūta mwevu wandi wa pa mulomo wa kūlu kaela lubila’mba, ‘Ne wa disubi, ne wa disubi!’ 46 Ukekalanga wa disubi kitatyi kyonso kyadi na musongo’wa. Byadi wa disubi, ufwaninwe kwikala kwa bunka. Kīkalo kyandi kikekala panja pa nkambi.+

47 “Shi musongo wa makopo ubasambukila ku kivwalwa, kikale kivwalwa kya myoya nansha kivwalwa kya bukonge, 48 shi ku nyushi ya mu bula nansha mu nyushi ya mu bunkimbwa ya bukonge nansha ya moya, nansha mu kiseba nansha mu kintu kyo-kyonso kilongelwe na kiseba, 49 ne matonye a musombelo wa mani masābuke nansha atyilakana a musongo’wa abasambukila kivwalwa, kiseba, nyushi ya mu bula, nyushi ya mu bunkimbwa, nansha kintu kyo-kyonso kya kiseba, i makopo asambuka, kadi bifwaninwe kulombolwa kudi kitobo. 50 Kitobo ukabandaula musongo’wa, kadi ufwaninwe kusonsolola kintu kidi’ko musongo mafuku asamba-abidi.+ 51 Shi wabandaula musongo mu difuku dya busamba-bubidi kupwa wamone amba ubaandabila mu kivwalwa, mu nyushi ya mu bula, mu nyushi ya mu bunkimbwa, nansha mu kiseba (kikale kiseba kingidijibwa shi ku bika shi ku bika), musongo’wa i makopo mabimabi, i kya disubi.+ 52 Ukasōka kivwalwa’kya nansha nyushi ya mu bula nansha nyushi ya mu bunkimbwa ya bukonge nansha ya myoya nansha mu kintu kyo-kyonso kya kiseba mwaikala musongo, mwanda i makopo mabimabi. Kifwaninwe kusōkwa mu mudilo.

53 “Ino shi kitobo wekibandaula kadi musongo kewandabilepo mu kivwalwa nansha mu nyushi ya mu bula nansha nyushi ya mu bunkimbwa nansha mu kintu kyo-kyonso kya kiseba, 54 nabya kitobo ukasoñanya bakende kintu kisambukilwe na musongo, kadi ukekisonsolola mafuku asamba-abidi makwabo. 55 Penepo kitobo ukabandaula kintu kisambukilwe na musongo pa kupwa kukendwa’kyo biyampe. Shi kimweka’mba musongo keushintyilepo, nansha shi musongo’wa kewandabilepo, i kya disubi. Ufwaninwe kwikisōka mu mudilo mwanda i kidibwe, munda nansha pangala.

56 “Inoko shi kitobo wekibandaula ne kadi kipindi kisambukilwe musongo kibajimankana akyo pa kupwa kukendwa biyampe, nabya ukekisana ku kivwalwa nansha ku kiseba nansha ku nyushi ya mu bula nansha ku nyushi ya mu bunkimbwa. 57 Inoko, shi ukimwekele mu kipindi kikwabo kya kivwalwa nansha mu nyushi ya mu bula nansha mu nyushi ya mu bunkimbwa nansha mu kintu kyo-kyonso kya kiseba, ubaandabila, ufwaninwe kusōka kintu kyo-kyonso kisambukilwe na musongo mu mudilo.+ 58 Ino shi musongo ubataluka ku kivwalwa nansha ku nyushi ya mu bula nansha ku nyushi ya mu bunkimbwa nansha ku kintu kyo-kyonso kya kiseba kyowakenda, nabya kikakendwa musungu wa bubidi, kadi kikekala kyampikwa disubi.

59 “Kino’ki kyo kijila kya musongo wa makopo mu kivwalwa kya myoya nansha kya bukonge, nansha mu nyushi ya mu bula nansha mu nyushi ya mu bunkimbwa nansha mu kintu kyo-kyonso kya kiseba, pa kwikitela bu kyampikwa disubi nansha bu kya disubi.”