Divilu

16 Abo pa kupwa kutamba ku Edime, kitango kyonso kya bene Isalela kyaiya mu ntanda mutuputupu ya Shina,+ idi pa bukata bwa Edime ne Shinai, mu difuku dya 15 dya kweji wa bubidi pa kupwa kutamba mu ntanda ya Edipito.

2 Penepo kitango kyonso kya bene Isalela kyashilula kwiuningila ba Mosesa ne Alone mu ntanda mutuputupu.+ 3 Bene Isalela kebebanena’mba: “Shi twafwile ku kuboko kwa Yehova mu ntanda ya Edipito potwadi tushikete pa bisuku bya mwita wa ntanda,+ potwadi tudya mikate twikuta. Pano mubetuselela muno mu ntanda mutuputupu mwanda wa kwipaya kino kipwilo kyonso na kipupo kya nzala.+

4 Ebiya Yehova wanena Mosesa amba: “Nsa kwimunokejeja mikate mūlu,+ kadi muntu ense ufwaninwe kutamba kukakongakanya bungi bwa mikate yandi difuku ne difuku,+ mwanda wa nebatompe ndyuke shi bakanangila mu bijila byami nansha shi kebakanangila’mopo.+ 5 Ino pobakatēka byobaboile mu difuku dya busamba,+ bifwaninwe kwikala bingi misunsa ibidi kupita byobaboyanga mafuku makwabo.”+

6 Penepo ba Mosesa ne Alone balombola bene Isalela bonso amba: “Kyolwa musa kuyuka binebine amba i Yehova wemulupwile mu ntanda ya Edipito.+ 7 Lubanga musa kumona ntumbo ya Yehova, mwanda waivwana miuningo yomwiuningila Yehova. Le batwe bomwiuningila twi bāni?” 8 Mosesa wabweja’ko amba: “Yehova pasa kwimupa mwita wa ntanda wa kudya kyolwa, lubanga nalo mikate ya kwikuta, musa kumona’mba Yehova waivwana miuningo yenu yomumwiuningila. Ino le batwe twi bāni? Ke batwepo bomwiuningila, ino i Yehova.”+

9 Ebiya Mosesa wanena Alone amba: “Lombola kitango kyonso kya bene Isalela amba, ‘Fwenai ku meso a Yehova, mwanda waivwana miuningo yenu.’”+ 10 Aye Alone upwa’tu kwisamba na kitango kyonso kya bene Isalela, bavundamuka batadidila dya mu ntanda mutuputupu, kadi tala’po! ntumbo ya Yehova yamweka mu dikumbi.+

11 Yehova wasapwila Mosesa monka’mba: 12 “Naivwana miuningo ya bene Isalela.+ Wibalombole amba, ‘Mukadya mwita wa ntanda kapita i kāni,* ino lubanga mukekuta mikate,+ kadi bine mukayuka’mba amiwa ne Yehova Leza wenu.’”+

13 Penepo kyolwa’kya bisesekwadi byaiya byapūta nkambi,+ kadi lubanga lumé lwadi lujokoloke nkambi yonso. 14 Lolwa lumé pa kūma, kwadi mu ntanda mutuputupu+ tubintu tutyetutye pa nshi, twa mabulukusu, tutyetutye pamo bwa mashika mekwate. 15 Bene Isalela pa kwitumona, kebenena abo bene na bene amba, “I bika byobi?” mwanda kebadipo bebiyukile. Mosesa webanena’mba: “I mikate yemupa Yehova bu byakudya.+ 16 E mwasoñenya Yehova namino amba, ‘Muntu ne muntu ukakongakanya mwendele bungi bwakokeja kudya. Mufwaninwe kusela kipimo kimo kya oma*+ ku muntu ku muntu mwendele bungi bwa bantu* badi na muntu ne muntu mu pema wandi.’” 17 Bene Isalela baanza kulongela monka; bakongakanya’yo, aba bakongakanya mingi bakwabo nabo bakongakanya mityetye. 18 Pobadi bapima’yo na oma, yewa wakongakenye mingi kadipo na ya musubu kadi yewa wakongakenye mityetye nandi kadipo ne kyabudilwe.+ Bakongakenye muntu ne muntu mungya byobabwanya kudya.

19 Penepo Mosesa webalombola’mba: “Kekwakekala muntu ukashiya’ko imo kufika ne lubanga.”+ 20 Ino abo kebaivwenepo Mosesa. Bantu bamo pobashile’ko imo kufika ne lubanga, yatambije byolo keinunka luvumba lubi, Mosesa webafītyilwa mutyima. 21 Badi beiboya lubanga ne lubanga, muntu ne muntu mwendele yabwanya kudya. Shi dyuba dibakabe, yasunguluka.

22 Mu difuku dya busamba, baboile mikate misunsa ibidi,+ bipimo bibidi bya oma ku muntu. Ponkapo bamfumu bonso ba kitango baiya basapwila’mo Mosesa. 23 Nandi webanena’mba: “E mwanenene Yehova. Kesha kudi kukōkolokwa ku byonso,* i sabato ujila kudi Yehova.+ Byobya byomubwanya kulonga mikate, longai’byo mikate, mutēke ne byobya bifwaninwe kutēka;+ kupwa mubike byonso byakashala’ko mulame’byo kufika ne lubanga.” 24 Ebiya babīka’byo kufika ne lubanga, monka mwasoñaninye Mosesa, kadi kebyanunkilepo luvumba lubi nansha kutambija bivinyu. 25 Penepa Mosesa wanena’mba: “Dyai’byo dyalelo, mwanda dyalelo i sabato kudi Yehova. Dyalelo kemusapo kwibitana pa nshi. 26 Mukaboya’byo mafuku asamba, ino mu difuku dya busamba-bubidi, dya Sabato,+ kebikekala’kopo.” 27 Inoko, bantu bamo batamba kukaboya’byo mu difuku dya busamba-bubidi, ino kebatene’kopo kintu.

28 Penepo Yehova wanena Mosesa amba: “Lelo mukapela kulama mbila yami ne bijila byami kufika ne kitatyi’ka?+ 29 Yukai amba Yehova i mwimupe Sabato.+ O mwanda wimupanga mikate ya mafuku abidi mu difuku dya busamba. Muntu ne muntu ufwaninwe kwikala kwashikete, kekudipo muntu ufwaninwe kutaluka kwandi mu difuku dya busamba-bubidi.” 30 Penepo bantu balama Sabato* mu difuku dya busamba-bubidi.+

31 Njibo ya Isalela yainika mikate’ya bu “māna.”* Adi atōka pamo bwa miseke ya kodiandele, kadi adi atobala bwa mikate mipapakane myele būki.+ 32 Ebiya Mosesa wanena’mba: “E mwasoñenya Yehova namino amba, ‘Dingai oma umo wa māna bu kintu kya kulama ku nkongo yenu yonsololo,+ amba bamone mikate yonemupele kudya mu ntanda mutuputupu ponemutambije mu ntanda ya Edipito.’” 33 Penepo Mosesa wanena Alone amba: “Yata mulondo wele’mo oma umo wa māna, wiutūle ku meso a Yehova bu kintu kya kulama ku nkongo yenu yonsololo.”+ 34 Monka mobasoñaninye Mosesa kudi Yehova, Alone weutūla ku meso a Bukamoni+ mwanda wa ulamibwe. 35 Bene Isalela badīle māna myaka 40,+ enka ne byobafikile mu ntanda yadi ikelwe’mo.+ Badīle māna enka ne byobafikile ku mukalo wa ntanda ya Kenani.+ 36 Oma umo i kipindi kimo kya pa bipindi dikumi bya efa.*