Yelemia

32 Kinenwa kya Yehova kyaile kudi Yelemia mu mwaka wa 10 wa Zedekia mulopwe wa Yuda, ko kunena’mba, mwaka wa 18 wa Nebukaneza.*+ 2 Mu kine kitatyi’kya, bibumbo bya divita bya mulopwe wa Babiloni byadi bitekēle Yelusalema kasāla, papo mupolofeto Yelemia wadi mushityilwe mu Kipango kya Balami+ mu njibo* ya mulopwe wa Yuda. 3 Mwanda Zedekia mulopwe wa Yuda wamushityile’mo,+ kanena’mba, “I kika kyonenena bupolofeto bwa uno muswelo? Unena’mba, ‘Yehova wanena namino amba: “Nkapāna kino kibundi mu kuboko kwa mulopwe wa Babiloni, nandi ukekikwata,+ 4 kadi Zedekia mulopwe wa Yuda kakapandepo ku bene Kaladea, mwanda bine ukapānwa mu kuboko kwa mulopwe wa Babiloni, kadi ukesamba nandi mpala na mpala ne kwimona nandi meso kwa meso.”’+ 5 ‘Ukaselela Zedekia ku Babiloni, nandi ukekala nyeke kwine’kwa kufika ne byonkamuta mutyima,’ i Yehova unena. ‘Nansha byomulwa’nka kulwa na bene Kaladea, kemukanekenyapo.’”+

6 Yelemia wanena’mba: “Kinenwa kya Yehova kibaiya kondi amba, 7 ‘Hanamela mwanā Shalumu mwanabo na shobe, usa kwiya kodi akunene amba: “Pota budimi bwami budi mu Anatote,+ mwanda abe ye umbajinji udi na lupusa lwa kwibukūla.”’”+

8 Hanamela mwanā mwanabo na tata waiya kondi, monka mwanenene’kyo Yehova, mu Kipango kya Balami, waunena’mba: “Nakwisāshila pota budimi bwami budi mu Anatote, mu ntanda ya Benjemani, mwanda abe ye udi na lupusa lwa kwibuyata ne kwibukūla. Pota’bo.” Ponkapo nayuka’mba, kino kyadi kinenwa kya Yehova.

9 Penepo napota budimi mu Anatote kudi Hanamela mwanā mwanabo na tata. Namupimina lupeto,+ mashekele* asamba-abidi ne bibese dikumi bya ndalama. 10 Penepa nalemba’byo mu mukanda,+ nakoma’po ne kashé, naita batumoni,+ napima ne lupeto pa kipimo kya bulēmi. 11 Nayata mukanda wa lupoto, owa wadi mukome’po kashé mwendele lubila ne bisaka bijila, ne owa wampikwa kukoma’po kashé, 12 mukanda wa lupoto’wa napa’o Baluki+ mwanā Nedia+ mwanā Maseya ku meso a Hanamela mwanā mwanabo na tata, ne a batumoni balembele mu mukanda wa lupoto, ne a Bayuda bonso badi bashikete mu Kipango kya Balami.+

13 Penepo nasoñanya Baluki ku meso abo amba: 14 “Yehova wa bibumbo, Leza wa Isalela wanena namino amba, ‘Yata ino mikanda, uno mukanda wa lupoto, mukome’po kashé ne mukanda mukwabo wampikwa kukoma’po kashé, wiitūle mu kipungwa kya dilongo, amba ilamwe kitatyi kilampe.’ 15 Mwanda Yehova wa bibumbo, Leza wa Isalela wanena namino amba, ‘Mobo ne madimi ne madimi a mañanza bikapotwa monka mu ino ntanda.’”+

16 Ebiya ami pa kupwa kupa Baluki mwanā Nedia mukanda wa lupoto, nalombela kudi Yehova amba: 17 “Yō, a Mfumu Mwinē Lupusa Lonso Yehova! Tala! Abe walongele madiulu ne ntanda na bukomo bobe bukatampe+ ne na kuboko kobe kōlole. Kodi i kutupu kya kutendelwa bininge, 18 abe ulombolanga buswe bwa ndamatyidile ku tununu ne tununu, ino ulubwilanga bana* kilubo kya bashabo,+ Leza wa bine, mukatampe kadi mukomokomo, wa dijina dya bu Yehova wa bibumbo. 19 Wi mukatampe mu madingi* kadi mukomokomo mu bilongwa,+ abe wa meso atala mashinda onso a bantu,+ mwanda wa kupa muntu ne muntu mwendele mashinda andi ne mwendele byalonga.+ 20 Walongele biyukeno ne bingelengele mu ntanda ya Edipito, biyukene kufika ne dyalelo, enka nenki welongela dijina mu Isalela ne mu bantu,+ monka mobikadile dyalelo. 21 Kadi watambije bantu bobe bene Isalela mu ntanda ya Edipito, na biyukeno, ne bingelengele, ne kuboko kwa bukomo, ne kuboko kōlole, ne na bilongwa bilenga luzakalo.+

22 “Mwenda mafuku, webapele ino ntanda yowatyipile kupa bakulutuba babo,+ ntanda ikuka mabele ne būki.+ 23 Batwela’mo beiyata ke yabo, ino kebakōkelepo diwi dyobe nansha kunangila mu bijila byobe. Kebalongelepo kintu nansha kimo kyowebasoñenye kulonga, o mwanda webaponeneje kino kyamalwa kyonso.+ 24 Tala! Bantu abaiya na mabunda a kasāla mwanda wa kukwata kibundi,+ kadi pa mwanda wa kipete,+ ne kipupo kya nzala, ne kipupo kya misongo,*+ bine kibundi kisa kupona mu makasa a bene Kaladea bekilwa; byowanenene bibalongeka byonso, monka mowekimwena. 25 Ino abe, Mfumu Mwinē Lupusa Lonso Yehova ubanombola’mba, ‘Pota budimi na lupeto, wite ne batumoni,’ nansha kino kibundi byokisa kupānwa bine mu kuboko kwa bene Kaladea.”

26 Ponkapo kinenwa kya Yehova kyaiya kudi Yelemia amba: 27 “Ami ne Yehova, Leza wa bantu bonso.* Le kondi kudi kintu kya kutendelwa bininge? 28 O mwanda Yehova wanena namino amba, ‘Nsa kupāna kino kibundi ku bene Kaladea ne mu kuboko kwa Nebukaneza* mulopwe wa Babiloni, nandi usa kwikikwata.+ 29 Kadi bene Kaladea balwa na kino kibundi, bakatwela’mo ne kusōka kino kibundi na mudilo ne kwikiloteja+ pamo ne mobo a misaka palambwidile bantu bitapwa kudi Bāla, ne pobapungulwidile baleza bakwabo byamulambu bya bitomibwa mwanda wa kunsanshija.’+

30 “‘Mwanda bantu ba Isalela ne ba Yuda baloñanga’nka bibi ku meso ami, tamba pa bunkasampe bwabo;+ bantu ba Isalela bansanshijanga’nka kunsanshija na mingilo ya makasa abo,’ i Yehova unena. 31 ‘Mwanda kino kibundi, tamba difuku dyobaubakile’kyo kutūla ne dyalelo, kekiloñangapo kintu kikwabo poso’nka kundobeja ne kunkalabaja,+ mwanda wa nekitalule ku meso a mpala yami,+ 32 pa mwanda wa bilongwa byonso bibi bilonga bantu ba Isalela ne ba Yuda mwanda wa kunsanshija—abo, balopwe babo,+ ne bamfumu babo,+ ne babitobo babo, ne bapolofeto babo,+ ne bantu ba Yuda ne bekadi ba Yelusalema. 33 Badi bamvundamina nyeke, kuntala mpika;+ nansha byonatompele kwibafundija kyaba ne kyaba,* i kutupu nansha umo wadi wivwana mwanda wa kulemununwa.+ 34 Kadi batūdile bilezaleza byabo bya mukenye mu njibo iselele dijina dyami, mwanda wa kwiisubija.+ 35 Ne kadi, baubakile mitenta ya Bāla mu Musanza wa Mwanā Hinome,*+ mwanda wa kupityija babo bana bana-balume ne bana-bakaji mu mudilo kudi Moleke,+ kintu kyonkyebasoñenyepo+ kadi kekyailepo nansha dimo ku mutyima wami,* kulonga kintu kya munyanji uno muswelo, mwanda wa kulongeja Yuda bubi.’

36 “O mwanda Yehova Leza wa Isalela wanena pa mwanda wa kino kibundi kyomunena’mba kikapānwa mu kuboko kwa mulopwe wa Babiloni na kipete, ne kipupo kya nzala, ne kipupo kya misongo namino amba, 37 ‘Nsa kwibakongakenya pamo tamba ku matanda konebapalakeninye na bulobo ne bukalabale ne kufītwa mutyima kukatampe,+ kadi nkebajokeja mu kino kifuko ne kwibashikatyija na mutyima-ntenke.+ 38 Bakekalanga bantu bami, nami nkekalanga Leza wabo.+ 39 Nkebapanga mutyima+ umo ne dishinda dimo amba bantyine nyeke, mwanda wa biyampe byabo ne biyampe bya babo bana bakalonda’ko.+ 40 Kadi nkasamba nabo kipwano kya nyeke,+ amba nkikalekapo kwibalongela biyampe;+ kadi nkatūla moyo wa kuntyina mu mityima yabo, amba bakaleke kumvundamina.+ 41 Nkebasangela mwanda wa kwibalongela biyampe,+ kadi nkebakuna bya binebine mu ino ntanda+ na mutyima wami onso ne na muya* wami onso.’”

42 “Mwanda Yehova wanena namino amba, ‘Monka monaletela kino kyamalwa kyonso kikatampe pa bano bantu, e monka monkebaletela buyampe* bonso bonebalaa.+ 43 Madimi akapotwa monka mu ino ntanda,+ nansha byomunena’mba: “I mu ntanda mutuputupu mwambulwa bantu ne banyema, kadi ibapānwa ku bene Kaladea.”’

44 “‘Madimi akapotwa na lupeto, mikanda ya lupoto ikalembwa ne kukomwa’po kashé, kadi batumoni baketwa mu ntanda ya Benjemani,+ ne mu bifuko bijokolokele Yelusalema, ne mu bibundi bya Yuda,+ ne mu bibundi bya ntanda ya ngulu, ne mu bibundi bya kitabataba,+ ne mu bibundi bya kunshi, mwanda nkajokeja misungi yabo,’+ i Yehova unena.”