Batyibi

16 Kitatyi kimo Samishoni waendele ku Ngaza, wamona’ko ndumba, ebiya watwela mwadi. 2 Balombola bene Ngaza amba: “Samishoni i mwiye muno.” Penepo bamujokoloka, bamujikila bufuku bonso pa kibelo kya kibundi. Bashikata nyā bufuku bonso, besapwila’mba: “Shi pabatōka, tusa kumwipaya.”

3 Inoko, Samishoni walāla’mo kufika ne pa bukata bwa bufuku. Kupwa wabūka pa bukata bwa bufuku, watukuna milango ya pa kibelo kya kibundi ne bikomo bya ku mitamba ibidi bine, webibulwila panja ne mukabo mwine kumo. Wetwika’byo pa bipuji webiselela ku nsongo ya lūlu ludi kampalampala na Hebelona.

4 Kupwa papo wasanswa mwana-mukaji wa dijina dya bu Dedila+ mu Musanza* wa Soleke. 5 Penepo bamfumu ba bene Fidishitia bafwena mwana-mukaji’wa kebanena’mba: “Mudimbe*+ uyuke i bika bimupa buno bukomo bukatampe ne i muswelo’ka otubwanya kumukomena, tumukute kadi tumunekenye. Nabya muntu ne muntu ukakupa bibese 1 100 bya ndalama.”

6 Kupwa Dedila wanena Samishoni amba: “Nakwisāshila, nombole bidi kutamba bukomo bobe ne i bika byobabwanya kukukuta nabyo ne kukunekenya.” 7 Samishoni wamutentulula’mba: “Shi bankute na mizelo* isamba-ibidi mibishi ya ku buta bwa miketo keyaumine, nsa kuzoza pamo bwa muntu ense.” 8 Ebiya bamfumu ba bene Fidishitia bamuletela mizelo isamba-ibidi mibishi yadi keyaumine, nandi wamukuta’yo. 9 Penepa bamufyamina mu kyumba kya munda, nandi wamwela lubila’mba: “A Samishoni, bene Fidishitia badi podi!” Ponkapo waketa mizelo’ya bipēla byonka muketekelanga nyushi ya bukonge* shi ibatenga mudilo.+ Enka nenki pene padi pemanine bukomo bwandi kepayukenepo.

10 Kupwa Dedila wanena Samishoni amba: “Tala! Ubañongola* ne kunsapwila bya bubela. Shi ke pano, nombole’po bine byobabwanya kukukuta nabyo.” 11 Nandi wamutentulula’mba: “Shi bankute myonji mipya keyaingidijibwe ku mingilo, nsa kuzoza pamo bwa muntu ense.” 12 Penepa Dedila wasela myonji mipya wamukuta’yo kaela lubila’mba: “A Samishoni, bene Fidishitia badi podi!” (Papo bantu bamufyamīne mu kyumba kya munda.) Ponkapo weiketa ku makasa andi pamo bwa nyushi.+

13 Kupwa Dedila wanena Samishoni amba: “Kufika ne pano ubañongola ne kunsapwila bya bubela.+ Nombole byobabwanya kukukuta nabyo.” Nandi wamutentulula’mba: “Shi ukute bibande bisamba-bibidi bya ku mutwe wami na nyushi ya mu bula.” 14 Penepo webiningisha na musomo kamwela lubila’mba: “A Samishoni, bene Fidishitia badi podi!” Ponkapo wabūka mu tulo watukuna musomo wa basukanga bisandi ne nyushi ya mu bula.

15 Dedila wamunena’mba: “Le ubwanya kunena namani amba, ‘Nkusenswe,’+ mutyima obe byokeudipo nami? Ubañongola pano ke misunsa isatu kadi kunombwelepo kwine kutamba bukomo bobe bukatampe.”+ 16 Ino byaadi umukankamija ne kumuningila difuku ne difuku, nandi* wapungila bya lufu.+ 17 Mfulo mfulō wamulombola byonso bidi ku mutyima wandi kanena’mba: “Bwembe kebwapityile kashā ku wami mutwe, mwanda ne mwine Nazila wa Leza tamba’tu kubutulwa.*+ Shi ntendwe, bukomo busa kuntamba kadi nsa kuzoza ne kwikala pamo bwa bantu bonso.”

18 Dedila pa kumona’mba wamulombola byonso bidi ku mutyima wandi, ponkapo waityija bamfumu bene Fidishitia+ kanena’mba: “Pano’ko iyai, mwanda waunombola byonso bidi ku mutyima wandi.” Penepa bamfumu bene Fidishitia bakanda kwadi koku baselele lupeto. 19 Wamulādika tulo pa manwi; kupwa waita mwana-mulume wamutenda bibande bisamba-bibidi bya ku mutwe wandi. Penepo waanza kumutādila, mwanda bukomo bwandi bwadi bumutamba’mo. 20 Ebiya waela lubila’mba: “A Samishoni, bene Fidishitia badi podi!” Nandi wabūka mu tulo kanena’mba: “Nsa kutamba monatambile misunsa mikwabo’ya+ nenyongolole.” Ino kadipo uyukile amba Yehova kakidipo nandi. 21 Penepo bene Fidishitia bamukwata bamubongotola meso. Ebiya bamusela batūkila nandi ku Ngaza, bamukuta nkano ibidi ya mukuba, waikala ke wa kutwa miseke mu kifungo. 22 Ino nywene ya ku mutwe wandi yashilula kumena monka pa kupwa kumutenda.+

23 Bamfumu bene Fidishitia bebungila pamo mwanda wa kulambula kitapwa kikatampe kudi leza wabo Dakona+ ne kusoba masobo, ke-pantu badi banena’mba: “Wetu leza wapāna Samishoni walwana netu mu kuboko kwetu!” 24 Bantu pa kumumona, batendela leza wabo amba: “Wetu leza wapāna walwana netu mu kuboko kwetu, mwine wadi onakanya ntanda yetu+ ne kwipaya bantu bavule motudi.”+

25 Mityima yabo byoyadi miyule nsangaji, banena’mba: “Itai Samishoni āye etusepeje’ko.” Penepa baityila Samishoni panja pa kifungo mwanda wa ebakaije; bamwimika pa bukata bwa bikomo. 26 Ebiya Samishoni wanena mwanuke wadi umukwete ku kuboko amba: “Ntengeje ku bikomo bikwatyije njibo ngealele’ko.” 27 (Papo njibo yadi miyule bana-balume ne bana-bakaji. Bamfumu bonso bene Fidishitia badi monka, kadi pangala padi bana-balume ne bana-bakaji 3 000 badi batala padi pasepeja Samishoni bantu.)

28 Ebiya Samishoni+ waabija Yehova amba: “A Mfumu Mwinē Lupusa Lonso Yehova, mvuluke’po, nakwisāshila, kadi nkomeje’po,+ enka uno musunsa umo kete, abe Leza, leka ndubwile bene Fidishitia kinongo pangala pa diso dimo dya pa meso ami abidi.”+

29 Penepo Samishoni wedindila ku bikomo bya pa bukata byadi bikwatyije njibo, waeyalela’ko koku kuboko kwa lundyo kukwete ku kikomo kimo ne kuboko kwa lunkuso nako kukwete ku kikwabo. 30 Samishoni waela lubila’mba: “Mfwe* pamo na bene Fidishitia!” Ponkapo wetonona na bukomo bwandi bonso, penepo njibo yaponena bamfumu ne bantu bonso badi’mo.+ Enka nenki waipaya bantu bavule pa lufu lwandi kupita ne bawaipaile mu būmi bwandi bene.+

31 Kupwa banababo ne kisaka kyonso kya shandi batūka kumusela. Bakanda nandi bamujīka pa bukata bwa Zola+ ne Eshetaole mu kibundu kya shandi Manoa.+ Watyibīle Isalela mambo mu myaka 20.+