Divilu

28 “Ufwaninwe kwita mu bene Isalela mwanenu Alone, pamo ne bandi bana bana-balume, amba añingidile bu kitobo+—Alone,+ pamo ne Nadaba ne Abihu,+ Eleaza ne Itamala,+ bana ba Alone bana-balume.+ 2 Ufwaninwe kulongela mwanenu Alone bivwalwa bijila, mwanda wa ntumbo ne buya.+ 3 Abe ufwaninwe kwisamba na boba bonso ba bwino,* bonayuja mushipiditu wa tunangu,+ nabo bakalonga bivwalwa bya Alone mwanda wa kumupandula, amba añingidile bu kitobo.

4 “Bino’bi byo bivwalwa byobakalonga: kivwalwa kya pa kyadi,+ efoda,+ kotyi wampikwa maboko,+ munkukumba mutungule tupangotupango, kivwalwa kya ku mutwe,+ ne lukuka;+ bakalongela mwanenu Alone ne bandi bana bino bivwalwa bijila, amba añingidile bu kitobo. 5 Bengidi ba bwino bakengidija olo, ne nyushi ifītuluka, ne myoya ityilakana, ne bityila pyā, ne bukonge bulumbuluke.

6 “Bafwaninwe kulonga efoda wa olo, nyushi ifītuluka, myoya ityilakana, bityila pyā ne bukonge bulumbuluke bujinge, kadi bakamutungula.+ 7 Efoda ufwaninwe kwikala na tubipēta tubidi twa pa bipuji twilunge ku mafulo abidi a kūlu. 8 Kikaya* kisuke,+ kilamike ku efoda mwanda wa kumukuta biyampe, nakyo kikekala kya bintu bimo byonka: olo, nyushi ifītuluka, myoya ityilakana, bityila pyā, ne bukonge bulumbuluke bujinge.

9 “Ufwaninwe kuyata mabwe abidi a onikise,+ ulembe’po majina a bana ba Isalela,+ 10 majina asamba pa dibwe dimo, majina asamba ashele’ko pa dibwe dikwabo, elonda mungya kubutulwa kwabo. 11 Mulembi wa pa mabwe ukalemba majina a bana ba Isalela pa mabwe abidi’a enka mwalembelanga pa kashé.+ Kupwa abe ukeakuja mu tubipungwa twa olo. 12 Ukela mabwe abidi pa tubipēta twa pa bipuji bya efoda bu mabwe a kivulukilo kudi bana ba Isalela,+ kadi Alone ufwaninwe kusela majina abo ku meso a Yehova pa tubipēta twandi tubidi twa pa bipuji bu kivulukilo. 13 Ukalonga tubipungwa twa olo 14 ne miyololo ibidi ya olo yonkayonka mijinge pamo bwa monji,+ kupwa ukakuta miyololo idi bwa myonji ku tubipungwa.+

15 “Ufwaninwe kunena sendwe utungulanga bisandi alonge kivwalwa kya pa kyadi kya butyibi.+ Kikalongwa pamo bwa efoda, kya olo, ne nyushi ifītuluka, ne myoya ityilakana, ne bityila pyā, ne bukonge bulumbuluke bujinge.+ 16 Kikekala na mitamba iná ya bula bumo shi i kikonye pabidi, bula bwa dikasa dimo* mu bula, ne bula bwa dikasa dimo mu bunkimbwa. 17 Ukela’ko mabwe makwike, milongo iná ya mabwe. Mulongo mubajinji lubi, topaze, ne emelode. 18 Mulongo wa bubidi tilekwaze, safile, ne yasepe. 19 Mulongo wa busatu dibwe dya lesheme,* angate, ne ametesete. 20 Mulongo wa buná kisodite, onikise, ne yade. Afwaninwe kukwikwa mu tubipungwa twa olo. 21 Mabwe’a akekala mwendele majina a bana ba Isalela 12. Dibwe ne dibwe dikalembwa’po pamo bwa kashé, dijina ne dijina dyelekeja kisaka kimo mu bisaka 12.

22 “Ufwaninwe kulonga miyololo mijinge ku kivwalwa kya pa kyadi, pamo bwa myonji ya olo yonkayonka.+ 23 Ufwaninwe kulonga nzenze ibidi ya olo ya ku kivwalwa kya pa kyadi, ulamike nzenze ibidi’ya ku yoi mfulo ne yoi ya kivwalwa kya pa kyadi. 24 Ufwaninwe kukobeka myonji ibidi ya olo mu nzenze ibidi idi ku yoi mfulo ne yoi ya kivwalwa kya pa kyadi. 25 Ukakobeka mafulo abidi a myonji ibidi mu tubipungwa tubidi, kadi ufwaninwe kwitulamika ku tubipēta twa pa bipuji bya efoda, dya kumeso. 26 Ukalonga nzenze ibidi ya olo ne kwiyela ku mafulo abidi ku mulomo dya munda mwa kivwalwa kya pa kyadi, utadidile efoda.+ 27 Ukalonga nzenze mikwabo ibidi ya olo kumeso kwa efoda, munshi mwa tubipēta twa pa bipuji, kubwipi na poilungile, kūlu kwa kikaya* kisuke kya efoda.+ 28 Kivwalwa kya pa kyadi kikakwatwa na monji ufītuluka, ukutyila nzenze yakyo ku nzenze ya efoda. Uno monji ukakwatyija kivwalwa kya pa kyadi ku efoda, kūlu kwa kikaya* kisuke.

29 “Alone ufwaninwe kusela majina a bana ba Isalela ku kivwalwa kya pa kyadi kya butyibi pa mutyima wandi shi katwela mu Kijila bu pa kuvulukila kyaba kyonso ku meso a Yehova. 30 Abewa ukatūla Udimi ne Tumimi*+ mu kivwalwa kya pa kyadi kya butyibi, kadi bifwaninwe kwikala pa mutyima wa Alone shi katwela ku meso a Yehova, kadi Alone ufwaninwe kusela bya kutyiba nabyo mambo a bene Isalela pa mutyima wandi ku meso a Yehova kyaba kyonso.

31 “Ufwaninwe kulonga kotyi wampikwa maboko wa efoda, ense wa nyushi ifītuluka.+ 32 Kukekala kipunzu kungala* pa bukata. Kipunzu’kya kikekala na kamulomo kufulakufula kafuminwe’ko na sendwe usukanga bisandi. Kikekala pamo bwa kipunzu kya kotyi wa byuma, kutyina’mba kwakasanika. 33 Ufwaninwe kulonga mangelenade a nyushi ifītuluka, ne myoya ityilakana, ne bityila pyā kufulakufula konso kwa milomo yandi, pamo ne ndibu ya olo pa bukata bwao. 34 Ufwaninwe kupatankanya papa ludibu lwa olo papa ngelenade, papa ludibu lwa olo papa ngelenade, kufulakufula konso kwa milomo ya kotyi wampikwa maboko. 35 Ukavwalwa na Alone mwanda wa kwingila mingilo, kadi kuvuma kwa ndibu kufwaninwe kwivwanikwa shi katwela mu kipandulwe ku meso a Yehova ne shi katambe, kutyina’mba wakafwa.+

36 “Ufwaninwe kulonga kipāpo kikelema kya olo yonkayonka, ne kulemba’po enka mulembelwanga pa kashé amba: ‘Buujila i bwa Yehova.’+ 37 Ufwaninwe kukutyila’kyo ku kivwalwa kya ku mutwe+ na monji ufītuluka; kikekala’nka pa mpala ya kivwalwa kya ku mutwe. 38 Kikekala pa mpala ya Alone, kadi Alone ukasela kiselwa shi muntu walubila bintu bijila,+ byobapandulanga kudi bene Isalela pobebilambulanga bu byabuntu bijila. Kikekala nyeke pa mpala yandi, amba betabijibwe ku meso a Yehova.

39 “Ufwaninwe kusuka munkukumba wa bukonge bulumbuluke mutungule tupangotupango, ulonge kivwalwa kya ku mutwe kya bukonge bulumbuluke, ulonge ne lukuka lusuke.+

40 “Ukalonga ne minkukumba, ne nkuka, ne tupūto twa ku mutwe twa bana ba Alone bana-balume,+ mwanda wa ntumbo ne buya.+ 41 Ukavwika mwanenu Alone ne bandi bana pamo nandi, kadi ukebashinga māni,+ kwibatūla ke babitobo*+ ne kwibapandula, nabo bakañingidilanga bu babitobo. 42 Kadi wibalongele ne tuputula* twa bukonge twa kufya ngitu ya mutaka wabo.+ Twanza ku kifuka kufika ne ku matangatanga. 43 Tufwaninwe kuvwalwa na Alone ne bandi bana shi kebatwela mu pema wa kubungakena’ko nansha shi kebafwena ku kisōkelo mwanda wa kwingila mu kifuko kijila, kutyina’mba bakapya mambo ne kufwa. Kino i kitungo kya lonso kwadi ne ku lutundu* lwandi lukalonda’ko.