Divilu

12 Penepo Yehova wanena ba Mosesa ne Alone mu ntanda ya Edipito amba: 2 “Uno kweji ukekalanga ngalwilo ya myeji yenu. Ukekalanga kweji wenu umbajinji mu myeji ya mu mwaka.+ 3 Lombolai kitango kyonso kya Isalela amba, ‘Mu difuku dya dikumi dya uno kweji, abo bonso bafwaninwe kuyata mukōko+ mwendele njibo ya shabo, mukōko umo ku njibo ne njibo. 4 Ino shi ba mu njibo ba kudya mukōko’wa i batyetye, nabya abo ne mulondakani nabo* wa pabwipi bakeabila’o mu njibo yabo mwendele bungi bwa bantu.* Pomukabala bantu, mukayuka bungi bwa mwita wa mukōko ukadya muntu ne muntu. 5 Mukōko wenu ufwaninwe kwikala wampikwa bulema,+ mukōko mulume wa mwaka umo. Mukokeja kutonga mukōko mulume mwana nansha mbuji. 6 Mufwaninwe kulama’o kufika ne mu difuku dya 14 dya uno kweji,+ kadi kipwilo kyonso kya kitango kya Isalela kifwaninwe kwiutapa pa kapita i kāni.*+ 7 Bafwaninwe kuyata mashi amo beashinge pa ñunji ibidi ne pa lubao lwa pangala pa kibelo kya mobo mwine mobadīla’o.+

8 “‘Bafwaninwe kudya mwita mu bwine bufuku’bwa.+ Bafwaninwe kwiosha pa mudilo ne kwiudya na mikate yampikwa kiyujo+ ne mani alula.+ 9 Kemwakidyai’o mubishi nansha mutēke mu mema, ino oshai’o pa mudilo, mutwe wao pamo ne maulu ne bya munda. 10 Kemufwaninwepo kushiya nansha kamo kufika ne lubanga, ino byobya bikashala kufika ne lubanga mufwaninwe kwibisōka mu mudilo.+ 11 Mukadya’o namino, muningije mikaba yenu,* bikwabilo ku maulu, ne mukombo mu kuboko kwenu; kadi mufwaninwe kwiudya bukidibukidi. I Pashika ya Yehova. 12 Mwanda nkapitanga mu ntanda ya Edipito mu bwine bufuku’bwa ne kukupila umbedi ense mu ntanda ya Edipito, kushilwila ku muntu kutūla ne ku nyema;+ kadi nkafikidija butyibi pa baleza bonso ba Edipito.+ Amiwa ne Yehova. 13 Mashi akekala bu kiyukeno kyenu pa mobo momudi; kadi nkamona mashi ne kwimutabuka, kipupo kekikemufikilapo kwimonakanya ponkakupila ntanda ya Edipito.+

14 “‘Dino difuku dikekalanga bu kivulukilo komudi, mufwaninwe kusoba’dyo masobo a Yehova mu nkongo yenu yonsololo. Mufwaninwe kusoba’dyo bu kijila kya myaka na myaka. 15 Mukadya mikate yampikwa kiyujo+ mu mafuku asamba-abidi. Bine, mu difuku dibajinji mufwaninwe kutalula mukama usosoma mu mobo enu, mwanda muntu ense udya kintu kyele kiyujo kushilwila ku difuku dibajinji kufika ne ku difuku dya busamba-bubidi, yao muntu* ufwaninwe kutyibwa’ko* mu Isalela. 16 Mu difuku dibajinji, mukalonga kitango kijila, ne kitango kikwabo kijila mu difuku dya busamba-bubidi. I kutupu mwingilo ukengilwa mu ano mafuku.+ Poso enka byobya bisaka kudya muntu* ense byo bikemuteakanibwa.

17 “‘Mufwaninwe kulama Masobo a Mikate Yampikwa Kiyujo,+ mwanda mu dino difuku, nkatambija bibumbo* byenu mu ntanda ya Edipito. Kadi mufwaninwe kulama dino difuku mu nkongo yenu yonsololo bu kijila kya myaka na myaka. 18 Mu difuku dya 14 dya kweji mubajinji, kyolwa, mukadya mikate yampikwa kiyujo kufika ne ku difuku dya 21 dya kweji, kyolwa.+ 19 Mu mobo enu kemukatanwapo mukama usosoma mu mafuku asamba-abidi, mwanda shi muntu adye kintu kyele kiyujo, ekale mweni nansha mubutwilwe mu ino ntanda,+ yao muntu* ufwaninwe kutyibwa’ko* mu kitango kya Isalela.+ 20 Kemufwaninwepo kudya kintu kyo-kyonso kyele kiyujo. Mufwaninwe kudya mikate yampikwa kiyujo mu mobo enu onso.’”

21 Mosesa waita bukidibukidi bakulumpe bonso ba Isalela,+ kaebanena’mba: “Endai mukatonge banyema* bana mu kisaka ne kisaka, mutape kitapwa kya Pashika. 22 Kupwa mukatubika kimuna kya hisopa mu mashi adi mu kyoilo ne kushinga’o pa lubao lwa pangala pa kibelo ne ku ñunji ibidi; muntu nansha umo mu bukata mwenu kafwaninwepo kutamba panja pa kibelo kya njibo yandi kufika ne lubanga. 23 Penepa Yehova pakapita mwanda wa kuponeja kipupo pa bene Edipito ne pakamona mashi pa lubao lwa pangala pa kibelo ne pa ñunji ibidi, bine Yehova ukatabuka kibelo’kya, kakalekapo kipupo kya lufu* kitwele mu mobo enu.+

24 “Mufwaninwe kulama kino kintu bu musoñanya wa myaka na myaka komudi ne kudi benu bana.+ 25 Kadi pomukatwela mu ntanda ikemupa Yehova monka mwaanenene, mufwaninwe kulama kino kitatyi.+ 26 Shi benu bana abemwipangula’mba, ‘Le kino kitatyi kishintulula bika komudi?’+ 27 mukalondolola’mba, ‘I kitapwa kya Pashika kudi Yehova, mwine watabukile mobo a bene Isalela mu Edipito paaponeje kipupo pa bene Edipito, ino wapandija mobo etu.’”

Penepo bantu bafukata kebevukwila. 28 Penepa bene Isalela baenda, balonga enka mwasoñaninye Yehova ba Mosesa ne Alone.+ Balonga enka nabya.

29 Ebiya mu bukata bwa bufuku, Yehova waipaya umbedi ense mu ntanda ya Edipito,+ kushilwila ku umbedi wa Felo wadi ushikete pa lupona lwandi kutūla ne ku umbedi wa musungi wadi mu kifungo,* ne umbedi ense wa nyema.+ 30 Felo wabūka bwine bufuku’bwa pamo ne bengidi bandi bonso ne bene Edipito bakwabo bonso, kwadi miyoa mikatampe umbukata mwa bene Edipito, mwanda kekudipo mu njibo kemwafwilepo muntu.+ 31 Ponkapo waita ba Mosesa ne Alone+ bufuku kanena’mba: “Talukai, tambai mu bantu bami, ne banwe ne bene Isalela bakwabo. Endai mukengidile Yehova, monka momwanenene.+ 32 Selai ne mikōko ne bañombe benu mwende, monka momwanenene.+ Inoko mufwaninwe ne kungesela.”

33 Kadi bene Edipito bashilula kuningila bantu batambe bukidibukidi+ mu ntanda’ya, badi banena’mba, “mwanda batwe bonso ketudi pamo bwa bafwe!”+ 34 Ebiya bantu basela mukama kumeso kwa kwelwa’mo kiyujo, pamo ne bintu byobasambakenyanga’mo mikama* bavungila’byo mu bisandi byabo bebisela pa bipuji. 35 Bene Isalela balonga byebalombwele Mosesa, balomba bene Edipito bintu bya ndalama ne bya olo pamo ne bisandi.+ 36 Yehova walengeja bene Edipito batōkelwe bantu mutyima, bebapa byobalombele, nabo batūta bene Edipito.+

37 Penepo bene Isalela batamba ku Lamesese+ baenda ku Sukote,+ kubwipi kwa bana-balume 600 000 ba lwa nshi, kutalula’mo bana.+ 38 Ne kibumbo kikatampe kya bantu basobakane*+ nakyo kyaenda nabo, ne mikōko ne bañombe, bimunanwa bivule bine. 39 Bashilula kutēka mikate mijokoloke yampikwa kiyujo ku mukama obaselele mu Edipito. Wadi wampikwa kiyujo, mwanda bapangilwe bukidibukidi mu Edipito bakomenwa kuteakanya mpao.+

40 Myaka ya kushikata kwa bene Isalela, yobashikete mu Edipito+ i myaka 430.+ 41 Ku mfulo kwa myaka 430, enka mu dine difuku’dya, bibumbo* byonso bya Yehova byatamba mu ntanda ya Edipito. 42 I bufuku bobakasobela Yehova masobo a kwibalupula kwawebalupwile mu ntanda ya Edipito. Buno bufuku bufwaninwe kulaminwa Yehova na bantu bonso ba Isalela mu nkongo yabo yonsololo.+

43 Penepo Yehova wanena ba Mosesa ne Alone amba, “Kino kyo kijila kya Pashika: I kutupu mweni ukadya’yo.+ 44 Ino shi muntu udi na umpika mwana-mulume wapotele ku lupeto, ufwaninwe bidi kumutweja kwisao.+ Penepa kabwanya kudya’yo. 45 Mweni ne muntu wa kaji kebabwanyapo kudya’yo. 46 Ikadilwa mu njibo imo. Kemufwaninwepo kuselela mwita panja pa njibo, kadi kemufwaninwepo kulala mukupa nansha umo.+ 47 Kitango kyonso kya Isalela kifwaninwe kusoba’yo. 48 Shi mweni ushikatanga nenu kadi usaka kusoba Pashika kudi Yehova, nankyo bana-balume bonso ba mu yandi njibo bafwaninwe kutwejibwa kwisao. Penepa kafwena kubwipi kusoba’yo, kadi ukekala pamo bwa muntu mubutwilwe mu ntanda’ya. Ino i kutupu muntu wampikwa kutwejibwa kwisao ubwanya kudya’yo.+ 49 Kijila kimo kyonka kikengidijibwa ku muntu mubutwilwe mu ntanda’ya ne ku mweni ushikete umbukata mwenu.”+

50 Penepo bene Isalela bonso balonga enka mwasoñaninye Yehova ba Mosesa ne Alone. Balonga enka nabya. 51 Enka mu dine difuku’dya, Yehova watambija bene Isalela pamo ne bibumbo* byabo mu ntanda ya Edipito.