Bilongwa bya Mafuku Umbajinji

15 Kadi wadi ūbaka’nka kūbaka andi mobo mu Kibundi kya Davida, walongolola ne kifuko kya Sanduku wa Leza wa bine, wamushimikila ne pema.+ 2 Kine kitatyi’kya kyo kyanenene Davida amba: “I kutupu usa kusela Sanduku wa Leza wa bine poso’nka bene Levi kete, mwanda Yehova webatongele kusela Sanduku wa Yehova ne kumwingidila mafuku onso.”+ 3 Kupwa Davida wakongakanya Isalela yense mu Yelusalema mwanda wa kukaselela Sanduku wa Yehova pa kifuko kyaweilongolwedile.+

4 Davida wakongakanya lutundu lwa Alone+ ne bene Levi:+ 5 ku bene Kohata, mfumu Udiele ne banababo 120; 6 ku bene Meladi, mfumu Asaya+ ne banababo 220; 7 ku bene Ngelashoma, mfumu Yoela+ ne banababo 130; 8 ku lutundu lwa Edizafana,+ mfumu Shemaia ne banababo 200; 9 ku lutundu lwa Hebelona, mfumu Ediele ne banababo 80; 10 ku lutundu lwa Uziele,+ mfumu Aminadaba ne banababo 112. 11 Ne kadi Davida waityija babitobo, ba Zadoki+ ne Abiatala+ kadi ne bene Levi, ba Udiele, Asaya, Yoela, Shemaia, Ediele, ne Aminadaba, 12 webanena’mba: “Banwe mwi mitwe ya mobo a bashandya bene Levi. Mwipandulei, banwe ne banabenu, selelai Sanduku wa Yehova Leza wa Isalela ku kifuko komulongolwedile. 13 Byokemwamuselelepo dibajinji,+ bulobo bwa Yehova Leza wetu bwetwakīle,+ mwanda ketwakimbilepo muswelo muyampe wa kumusela.”+ 14 Ebiya babitobo ne bene Levi bepandula mwanda wa kukasela Sanduku wa Yehova Leza wa Isalela.

15 Penepo bene Levi basela Sanduku wa Leza wa bine pa bipuji byabo na mitembo,+ enka mwāsoñaninye’kyo Mosesa mungya kinenwa kya Yehova. 16 Ebiya Davida walombola bamfumu ba bene Levi batonge’ko banababo batuimba ba kwimba na nsangaji, pamo ne byombanwa bya ñimbo: byombanwa bya myonji, nsense,+ ne membo.+

17 Penepo bene Levi batonga Hemana+ mwanā Yoela, mu banababo namo, Asafa+ mwanā Belekia, mu banababo bene Meladi namo, Etana+ mwanā Kushaya. 18 Badi pamo na banababo ba mu kibumbo kya bubidi:+ Zekadia, Bena, Yaziele, Shemilamote, Yehiele, Uni, Ediabu, Benaya, Maaseya, Matitia, Edifelehu, ne Mikenenya ne Obede-Edome ne Yeiele batulama ba ku kibelo. 19 Batuimba, ba Hemana,+ Asafa,+ ne Etana bo badi ba komba membo ya mukuba;+ 20 ba Zekadia, Aziela, Shemilamote, Yehiele, Uni, Ediabu, Maaseya, ne Benaya nabo badi bomba byombanwa bya myonji bileulule pa Alamote;*+ 21 kadi ba Matitia,+ Edifelehu, Mikenenya, Obede-Edome, Yeiele, ne Azazia nabo badi bomba nsense mileulule pa Sheminite,*+ mwa kwingidila bu bakulu ba bañomba. 22 Kenania+ mfumu wa bene Levi wadi utala myanda ya kusela bintu, mwanda wadi mwibipotolole, 23 ba Belekia ne Elekana badi batulama ba ku kibelo pa mwanda wa Sanduku. 24 Babitobo, ba Shebania, Yoshafata, Netanele, Amasai, Zekadia, Benaya, ne Ediezela badi bēla bininge bimpungidi kumeso kwa Sanduku wa Leza wa bine,+ ba Obede-Edome ne Yehia nabo badi bengila bu batulama ba ku kibelo pa mwanda wa Sanduku.

25 Penepo Davida ne bakulumpe ba Isalela ne bakata ba tununu badi benda pamo kukasela sanduku wa kipwano kya Yehova ku njibo ya Obede-Edome+ na nsangaji.+ 26 Leza wa bine pa kukwasha bene Levi badi baselele sanduku wa kipwano kya Yehova, balambula bitapwa bya byana bya bañombe bilume bisamba-bibidi ne mikōko milume isamba-ibidi.+ 27 Davida wadi uvwele kotyi wampikwa maboko wa mbwija milumbuluke, pamo ne bene Levi bonso badi baselele Sanduku, batuimba, ne Kenania mukata wadi utala myanda ya kusela bintu ne batuimba; kadi Davida wadi uvwele ne efoda ya bukonge.+ 28 Bene Isalela bonso badi baselele sanduku wa kipwano kya Yehova koku bela nsadi ya tusepo,+ bavumija lusengo, ne bimpungidi,+ ne membo, koku bomba bininge byombanwa bya myonji ne nsense.+

29 Ino sanduku wa kipwano kya Yehova pa kufika mu Kibundi kya Davida,+ Mikale+ mwanā Solo watala munshi pa dididisha wamona Mulopwe Davida ukilakila koku usepelela; washilula kumufutulula mu mutyima wandi.+