Ezekyele

21 Kinenwa kya Yehova kyaiya monka kondi amba: 2 “Mwanā muntu, tadija mpala yobe ku Yelusalema, kadi ela lubila pa bifuko bijila, kadi unene bupolofeto pa ntanda ya Isalela. 3 Nena ntanda ya Isalela amba, ‘Yehova wanena namino amba: “Nsa kulwa nobe, kadi nkasomona kipete kyami mu kikwa+ ne kutyiba’ko mu bukata mobe moloke ne mubi mwine. 4 Byonkatyiba’ko mu bukata mobe moloke ne mubi mwine, kipete kyami kikakulumwinwa ngitu yonso* mu kikwa kyakyo, tamba kunshi kutūla ne kungala. 5 Bantu bonso bakayuka’mba ami mwine, Yehova, nasomona kipete mu kikwa kyakyo. Kekikajokapo monka.”’+

6 “Ino abe, mwanā muntu, binza koku uzakala,* bine, binza bya malwa ku meso abo.+ 7 Kadi shi abakwipangula’mba, ‘Mwanda waka ubinza?’ ukebalondolola’mba, ‘I pa mwanda wa musapu.’ Ke-pantu ukāya binebine, mityima yonso ikasunguluka moyo kadi maboko onso akakōka kadi mishipiditu yonso ikafītwa kadi manwi onso akasūma mema.*+ ‘Tala! Ukāya binebine—ukafikidila,’ i Mfumu Mwinē Lupusa Lonso Yehova unena.”

8 Kinenwa kya Yehova kyaiya monka kondi amba: 9 “Mwanā muntu, nena bupolofeto wisambe amba, ‘Yehova wanena namino amba: “Nena’mba, ‘Kipete! Kipete+ kibanonwa, kadi kibasambulwa. 10 Kibanonwa mwanda wa kutukija bantu bavule, kibasambulwa mwanda wa kukelema pamo bwa mapeni.’”’”

“Le ketukasangalapo?”

“‘Le kikapela* nkonto wa wami mwana,+ na mokipelela mityi yonso?

11 “‘Kibaletwa’mba kisambulwe ne kwingidijibwa na kuboko. Kino kipete i kinonwe kadi kisambulwe, amba kitūlwe mu kuboko kwa yewa wipaya.+

12 “‘A mwanā muntu, dila+ ne kuyoyokota miyoa, mwanda kibaiya pa bantu bami; kidi pa bamfumu ba Isalela bonso.+ Bano’ba bakafwa ku kipete pamo na bantu bami. O mwanda kupila ditangatanga dyobe na njia. 13 Mwanda kibabandaulwa,+ le bikekala namani shi kipete kibapele nkonto? Kakekala’kopo* monka,’+ i Mfumu Mwinē Lupusa Lonso Yehova unena.

14 “Ino abe, mwanā muntu, nena bupolofeto ne kukupila makasa obe kadi upituluke misunsa isatu amba, ‘Kipete!’ I kipete kya boba batapwe, kipete kya kutukija bantu bavule, kibajokolokele.+ 15 Mityima yabo ikasunguluka moyo+ kadi bavule bakapona pa bibelo bya kyabo kibundi; Nkatapa na kipete. Bine, kikelemanga pamo bwa mapeni kadi i kisambulwe mwanda wa kutapa! 16 Keta ñwa ku lundyo! Enda ku lunkuso! Enda konso kutadidile bui bobe! 17 Nami nkakupila makasa ne kutalaja bukalabale bwami.+ Ami mwine, Yehova, nesambe’kyo.”

18 Kadi kinenwa kya Yehova kyaiya monka kondi amba: 19 “Ino abe, mwanā muntu, tūla tuyukeno pa mashinda abidi mwa kwiya kipete kya mulopwe wa Babiloni. Onso abidi akatamba ku ntanda imo, kadi kiyukeno* kilombola dishinda kikashimikwa popa peladile mashinda enda ku bibundi bibidi. 20 Ukatūla kayukeno pa dishinda dimo mwa kwiila kipete pa Laba+ wa bene Amone, ne dishinda dikwabo pa Yelusalema+ mukomejibwe mu Yuda. 21 Mwanda mulopwe wa Babiloni waleka kubuka lubuko pa mansanka a dishinda, peladile mashinda abidi. Ujinyanga miketo. Wipangulanga bilezaleza byandi;* ubandaulanga dityima. 22 Lubuko ludi mu kuboko kwandi kwa lundyo lufunka ku Yelusalema, mwanda wa kutūla bipungwa bya kutūta nabyo, kuleta kishima kya kwipaya, kutūta kyungwe kya bulwi, kutūdila bibelo bipungwa bya kutūta nabyo, kwimika dibunda dya kasāla, ne kūbaka lubumbu lwa kasāla.+ 23 Ino bikamweka pamo bwa lubuko lwa bubela ku meso a boba* bebatyipīle mityipo.+ Ino wavuluka mambo abo kadi ukebakwata.+

24 “O mwanda Mfumu Mwinē Lupusa Lonso Yehova wanena namino amba: ‘Mubalengeja mambo enu avulukwe pa kusokola kujilula kwenu ne kumwekeja bubi bwenu mu bilongwa byenu byonso. Pano pomwavulukwa, bakemusela ku bukomo.’*

25 “Ino difuku dyobe dibaiya, abe mutapwe bilonda bibibibi, mfumu mubi wa Isalela,+ kitatyi kya mfuto yobe ya mfulo. 26 Mfumu Mwinē Lupusa Lonso Yehova wanena namino amba: ‘Talula kivwalwa kya ku mutwe, kadi vūla kilukwa.+ Kebikekalapo muswelo umo onka.+ Zunzula yewa mupēlulwe,+ ne kutūkija yewa muzunzulwe.+ 27 Nkekyalamuna ke masala, masala, masala. Kadi kekikekalapo kya muntu nansha umo kufika ne bikāya mwine upelwe lupusa,+ kadi nkamupa’kyo.’+

28 “Ino abe, mwanā muntu, nena bupolofeto kadi wisambe amba, ‘Kino kyo kyanena Mfumu Mwinē Lupusa Lonso Yehova pa bene Amone ne pa mutonko wabo.’ Nena’mba, ‘Kipete! Kipete kibasomonwa mwanda wa kutapa; kibasambulwa mwanda wa kusasamuna ne kukelema pamo bwa mapeni. 29 Nansha byokudi bimonwa bya bubela ne lubuko lwa bubela podi, ukatentekwa pa batapwe,* bantu babi bafikilwa na difuku, kitatyi kya mfuto yabo ya mfulo. 30 Wikijokeje mu kikwa kyakyo. Nkakutyibila mambo mu kifuko mowapangīlwe, mu ntanda yowatambile’ko. 31 Nkakupungulwila kufītwa mutyima kwami. Nkakupujija mudilo wa bukalabale bwami, kadi nkakupāna ku bantu bakalabale, basendwe ba kyonakanya.+ 32 Ukekala kodi kya kwakija nakyo mudilo;+ mashi obe akamwangwa mu ntanda’ya, kadi kukavulukwapo monka, mwanda ami mwine, Yehova, nesambe’kyo.’”