Samwele wa Bubidi

15 Kupwa kwa bino bintu byonso, Abisalome welongela dikalo ne tubalwe ne bana-balume 50 ba kwenda lubilo kumeso kwandi.+ 2 Abisalome wadi ubūka lubanga futwi wakemana kufula kwa dishinda dya ku kibelo kya kibundi.+ Ponso padi pāya muntu na mambo a kusamba kwa mulopwe mwanda wa kutyibilwa mambo,+ Abisalome wadi umwita kanena’mba: “Le wi wa ku kibundi’ka?” nandi wadi ulondolola’mba: “Mwingidi obe i wa ku kisaka kimo kya mu bisaka bya Isalela.” 3 Abisalome wadi umunena’mba: “Tala, myanda yobe i myoloke kadi i myendele’mo, inoko kwa mulopwe kekudipo muntu wa kwivwana obe mambo.” 4 Abisalome wadi unena’mba: “Shi ami’tu ye watongelwe bu mutyibi mu ino ntanda! Longa muntu yense udi na mambo a kusamba nansha usaka kutyibilwa mambo wadi wa kwiya kondi, nami nadi wa kulonga buninge atyibilwe mambo mu boloke.”

5 Shi muntu wafwena kwivukwila kwadi, Abisalome wadi ōlola kuboko wamukwata kupwa wamufifya.+ 6 Abisalome wadi ulonga namino ku bene Isalela bonso badi bāya kutwela kwa mulopwe kutyibilwa mambo; enka namino, Abisalome wadi wiba mityima ya bantu ba Isalela.+

7 Ku mfulo kwa myaka iná,* Abisalome wanena mulopwe amba: “Nakwisāshila, ndeke ñende ku Hebelona+ nkafikidije mpiko yami yonapikile kudi Yehova. 8 Mwanda mwingidi obe wapikile ino mpiko misumininwe+ ponadi nshikete mu Ngeshula+ mu Shidea amba: ‘Shi Yehova anjokeje ku Yelusalema, nsa kulambula kyamulambu kudi* Yehova.’” 9 Penepa mulopwe wamunena’mba: “Enda mu ndoe.” Ponkapo wataluka waenda ku Hebelona.

10 Ino Abisalome watuma tubedibedi mu bisaka byonso bya Isalela, kanena’mba: “Shi mubaivwana’tu kuvuma kwa lusengo, nenai amba, ‘Abisalome wabikala mu Hebelona!’”+ 11 Ino bana-balume 200 ba ku Yelusalema baendele na Abisalome kwine’kwa; baityilwe, nabo baenda bitupu kuyuka mulongekela myanda mpika. 12 Kupwa, aye pa kulambula bitapwa, Abisalome waityija Ahitofele+ mwine Ngilo mudingidi wa Davida,+ wa ku kibundi kya Ngilo.+ Kitumba kyadi kyenda kinana’nka kunana, kadi bantu badi bekupa kudi Abisalome badi benda bavudila’ko.+

13 Kitatyi pa kupita’po muntu umo waiya kusapwila Davida amba: “Mutyima wa bantu ba Isalela ubaalamukila kudi Abisalome.” 14 Ponkapo Davida wanena bengidi bandi bonso baadi nabo mu Yelusalema amba: “Imanai tunyemei,+ mwanda i kutupu usa kupanda kudi Abisalome! Pejai, kutyina’mba wakāya bukidi kwitutana ne kwituletela kyamalwa, ne kwipaya bantu bonso ba mu kibundi na kipete!”+ 15 Bengidi ba mulopwe batentulula mulopwe amba: “Kyonso kyanena mfumwami mulopwe, bengidi bobe betabije kulongela monka.”+ 16 Ebiya mulopwe watamba ne ba mu njibo yandi bonso badi bamulonda, ino mulopwe washiya bakaji dikumi ba pafula+ ba kulama njibo.* 17 Kadi mulopwe waendelela kunyema pamo ne bantu bonso badi balonda, baimana ku Bete-Melake.

18 Bengidi bandi bonso baenda nandi* ne bene Keleta bonso, ne bene Peletyi,+ ne bene Ngata,+ bantu 600 bamulonda kutamba ku Ngata,+ badi bapita koku mulopwe wibatala.* 19 Kupwa mulopwe wanena Itai+ mwine Ngata amba: “Le nobe kyoendela netu i kika? Joka ukashikate na mulopwe mupya, mwanda wi mweni kadi wi musungi unyemene kwenu. 20 Waile’nka kesha’di, penepa dyalelo wanze kujokoloka netu, wende kitatyi kyomfwaninwe kwenda ne kokwa komfwaninwe kwenda? Kajoke, sela ne banabenu, Yehova akulombole buswe bwa ndamatyidile ne bubinebine!”+ 21 Ino Itai watentulula mulopwe amba: “Bine ne Yehova byadi mūmi, kadi bine ne mfumwami mulopwe byadi mūmi, konso kukekala mfumwami mulopwe, kwikale ku lufu nansha ku būmi, ko kukekala ne mwingidi obe!”+ 22 Ebiya Davida wanena Itai+ amba: “Enda utyibuluke.” Penepa Itai mwine Ngata watyibuluka, pamo ne bantu bandi bonso ne bana.

23 Muntu ense wa mu ntanda’ya wadi udila bikatampe padi patyibuluka bano bantu bonso, kadi mulopwe wadi wimene dya ku Musanza wa Kidelone;+ bantu bonso badi batyibuluka benda mu dishinda dyenda mu ntanda mutuputupu. 24 Ne Zadoki+ nandi wadi’po kadi wadi ne na bene Levi bonso+ badi baselele sanduku+ wa kipwano kya Leza wa bine;+ ebiya batūla Sanduku wa Leza wa bine pa nshi; ino Abiatala+ wakanda, papo bantu bonso bapwa kutyibuluka kutamba mu kibundi. 25 Ino mulopwe wanena Zadoki amba: “Jokeja Sanduku wa Leza wa bine mu kibundi.+ Shi Yehova wantōkelwa mutyima, nami usa kunjokeja ne kundeka neimone, mone ne kīkalo kyayo.+ 26 Inoko shi wanena’mba, ‘Nkikuloelelwepo,’ nabya alonge byobya byamona bu biyampe ku meso andi.” 27 Mulopwe wanena kitobo Zadoki amba: “Mwene wi mumoni?+ Jokela mu kibundi mu ndoe, kadi selai ne benu bana bana-balume babidi, Ahimaza obe mwana ne Yonafane+ mwanā Abiatala. 28 Tala, nsa kulejaleja dya ku byabu bya lwa ntobwa* bya mu ntanda mutuputupu enka ne bifika kinenwa kya kundyukija kitamba komudi.”+ 29 Penepo Zadoki ne Abiatala bajokeja Sanduku wa Leza wa bine ku Yelusalema, bashikata konka.

30 Davida paadi ukanda Lūlu* lwa Impafu,+ wadi udila koku ukanda; mutwe mupūte, wenda ku maulu pululu. Bantu bonso baadi nabo, nabo bepūta ku mitwe, kebenda badila koku bakanda. 31 Kupwa basapwila Davida amba: “Ahitofele udi mu boba bakuta kitumba+ na Abisalome.”+ Penepo Davida wanena’mba: “A Yehova,+ nakwisāshila, alamuna madingi a Ahitofele ke bulembakane!”+

32 Davida pa kufika pa mutwe wa lūlu padi pavudile bantu kwivukwila kudi Leza, tala, Hushai+ mwine Aleke+ waiya kumusambakana, wadi na munkukumba wandi musanike ne luvumbi ku mutwe. 33 Inoko Davida wamunena’mba: “Shi utyibuluke nami usa kwikala kiselwa kondi. 34 Ino shi ujokele mu kibundi kadi usapwile Abisalome amba, ‘Ami ne mwingidi obe, a Mulopwe. Nadi mwingidi wa shobe mafuku kunyuma ino pano ne mwingidi obe,’+ nabya ukabwanya kumvutakenya madingi a Ahitofele.+ 35 Mwene ba Zadoki ne Abiatala babitobo badi nobe kwine’kwa? Ufwaninwe kusapwila ba Zadoki ne Abiatala babitobo myanda yonso yoivwana mu njibo ya mulopwe.+ 36 Tala! Badi ne na babo bana babidi, ba Ahimaza+ mwanā Zadoki ne Yonafane+ mwanā Abiatala, ntumine nabo myanda yonso yoivwana.” 37 Ebiya Hushai mulunda* na Davida+ waenda mu kibundi kitatyi kyadi kitwela Abisalome mu Yelusalema.