Bene Kodinda Umbajinji

1 Ami Polo, waityilwe kwikala mutumibwa+ wa Kidishitu Yesu pa kiswa-mutyima kya Leza, ne Sosefene mwanetu, 2 ku kipwilo kya Leza kidi mu Kodinda,+ kudi banwe bapandwilwe mu bumo na Kidishitu Yesu,+ baityilwe kwikala bajila, pamo na boba bonso badi pi na pi beta dijina dya Mfumwetu Yesu Kidishitu,+ Mfumwabo kadi Mfumwetu:

3 Kanye ka ku buntu bitupu ne ndoe ya Leza Tata wetu ne ya Mfumwetu Yesu Kidishitu bikale nenu.

4 Mfwijanga’ko Leza wami mafuku onso pa mwanda wenu pa kanye ka ku buntu bitupu ka Leza komupelwe mudi Kidishitu Yesu; 5 mwanda mu bintu byonso mwapetejibwe mudi aye, mu bukomo bonso bwa kwisamba ne mu buyuki bonso,+ 6 monka mwaningijibwe mu bukata mwenu bukamoni bwa myanda ya Kidishitu,+ 7 kutyina’mba mwakabulwa kyabuntu nansha kimo, pano pomwilaija na kipyupyu kusokolwa kwa Mfumwetu Yesu Kidishitu.+ 8 Kadi aye usa kwimuningija kufika ne ku mfulo, amba mubulwe mambo a kutopekwa mu difuku dya Mfumwetu Yesu Kidishitu.+ 9 Leza i wa binebine,+ mwine wemwityile mwikale mu kipwano* pamo na wandi Mwana Yesu Kidishitu Mfumwetu.

10 Pano nemwisāshila, banwe banabetu, mu dijina dya Mfumwetu Yesu Kidishitu amba mufwaninwe kunena banwe bonso bimo, ne amba kekwakikala kwilalulula mu bukata mwenu,+ ino amba mwikale umbumo bwa binebine mu ñeni imo ne mu mulangilo umo onka.+ 11 Mwanda bamo ba mu njibo ya Koloe baunombwele myanda yenu, banwe banabetu, amba mu bukata mwenu mudi lupotopoto. 12 Kyonsaka kunena i kino, amba muntu ne muntu umbukata mwenu unenanga’mba: “Ami ne wa Polo,” mukwabo amba, “Ami ne wa Apolosa,”+ yeu nandi amba, “Ami ne wa Kefasa,”* ungi nandi amba, “Ami ne wa Kidishitu.” 13 Le Kidishitu welalulula? Le Polo waipailwe ku mutyi pa mwanda wenu? Nansha le mwabatyijibwe mu dijina dya Polo? 14 Nafwija’ko Leza mwanda nkyabatyijepo muntu mu bukata mwenu poso enka Kipusa+ ne Ngaiusa,+ 15 kutyina’mba kwakekala muntu unena’mba mwabatyijibwe mu dijina dyami. 16 I amo, nabatyije ne ba mu njibo ya Shitevanusa.+ Ino bakwabo’bo, nkiyukilepo shi nabatyije’ko muntu mukwabo. 17 Mwanda Kidishitu kauntuminepo kubatyija, ino i kusapula myanda miyampe;+ kadi ke na munenenopo wa tunangu,* kutyina’mba mutyi wa masusu* wa Kidishitu wakekala wa bitupubitupu.

18 Mwanda kunena myanda ya mutyi wa masusu* i bulembakane ku boba boneka,+ ino ku batwe bapanda, i bukomo bwa Leza.+ 19 Mwanda i kilembwe amba: “Nkonanga tunangu twa bantu ba tunangu, kadi nkapelanga* ñeni ya bantu ba ñeni.”+ 20 Lelo wa tunangu udi pi? Lelo musonekeji* udi pi? Lelo wa lupata wa ino ngikadilo ya bintu* udi pi? Lelo Leza kalamwinepo tunangu twa ino ntanda ke bulembakane? 21 Mwanda, mu tunangu twa Leza, ino ntanda byokeyayukilepo Leza+ kupityila ku tunangu twayo,+ Leza waloelelwe kupandija boba betabija kupityila ku bulembakane+ bwa byobya bisapulwa.

22 Mwanda Bayuda balombanga biyukeno+ ne Bangidiki nabo bakimba tunangu; 23 ino batwe tusapulanga Kidishitu waipailwe ku mutyi, ku Bayuda i kikukaja ino ku mizo i bulembakane.+ 24 Inoko, ku boba betyilwe, ne Bayuda ne Bangidiki, Kidishitu i bukomo bwa Leza kadi i tunangu twa Leza.+ 25 Mwanda kintu kilembakane kya Leza i kya tunangu kupita bantu, kadi kintu kikōkekōke kya Leza i kikomo kupita bantu.+

26 Mwanda mubamone amba mu banwe baityilwe, banwe banabetu, kemudipo bavule ba tunangu mwendele ngitu,*+ nansha bavule ba bukomo, nansha bavule ba ku bisaka bilēme,*+ 27 ino Leza watongele bintu bilembakane bya ino ntanda mwanda wa kufwija bantu ba tunangu bumvu; kadi Leza watongele bintu bikōkekōke bya ino ntanda mwanda wa kufwija bintu bikomo bumvu;+ 28 kadi Leza watongele bintu bityetyetyetye bya ino ntanda ne bintu bifutululwe, bintu kebidi’kopo, mwanda wa kujimankanya byobya bidi’ko,+ 29 amba kekwakikala muntu wa* kwitumbija ku meso a Leza. 30 Ino i pa mwanda wandi pomwikele mu bumo na Kidishitu Yesu, waikala kotudi ke tunangu twa kwa Leza, ne boloke,+ bupandulwe’mo,+ ne bunyongolodi na kinkūlwa,+ 31 amba kikale’nka mokilembelwe amba: “Muntu wa kwitumbija, etumbije mudi Yehova.”*+