Batyibi

13 Kadi bene Isalela balonga monka bibi ku meso a Yehova,+ Yehova nandi webapāna mu kuboko kwa bene Fidishitia+ mu myaka 40.

2 Mu kine kitatyi’kya, kwadi mwana-mulume umo wa mu Zola,+ wa ku kisaka kya bene Dani,+ dijina dyandi i Manoa.+ Wandi mukaji wadi ñumba wampikwa mwana.+ 3 Mwenda mafuku mwikeulu wa Yehova wamwekela mwana-mukaji kamunena’mba: “Tala, abe wi ñumba wampikwa mwana, ino usa kwimita ne kubutula mwana mwana-mulume.+ 4 Pano tá mutyima, kokatoma vinyu nansha kintu kyo-kyonso kikolwañana,+ kadi kokadya kintu kyo-kyonso kya disubi.+ 5 Tala! Usa kwimita ne kubutula mwana mwana-mulume, ino bwembe kebufwaninwepo kutenga ku mutwe wandi,+ mwanda mwana’wa ukekala mwine Nazila wa Leza tamba kubutulwa,* kadi aye ukanza kupandija Isalela mu makasa a bene Fidishitia.”+

6 Penepa mwana-mukaji wakasapwila wandi mulume amba: “Muntu wa Leza wa bine waiyanga kondi, kadi wadi umweka bu mwikeulu wa Leza wa bine, ulenga nzuba bya mwiko. Nkyadipo mwipangwile kwatamba, kadi nandi kansapwidilepo dijina dyandi.+ 7 Ino waunenanga’mba, ‘Tala! Usa kwimita ne kubutula mwana mwana-mulume. Pano kokatoma vinyu nansha kintu kyo-kyonso kikolwañana, kadi kokadya kintu kyo-kyonso kya disubi, mwanda mwana’wa ukekala mwine Nazila wa Leza tamba kubutulwa* kutūla ne ku difuku dyandi dya lufu.’”

8 Manoa wazenza Yehova amba: “Bamfwile’ko lusa, a Yehova. Nakwisāshila, muntu wa Leza wa bine owatumanga’wa āye monka kwitulombola bine byotufwaninwe kulonga na mwana usa kubutulwa’u.” 9 Penepa Leza wa bine waivwana Manoa, kadi mwikeulu wa Leza wa bine waiya monka kudi mwana-mukaji’wa paadi ushikete mu ntanda; wandi mulume Manoa kadipo pamo nandi. 10 Bukidi bonka mwana-mukaji wanyema lubilo wakasapwila wandi mulume amba: “Tala! Mwana-mulume waile kondi dyodya difuku’dya waumwekela.”+

11 Penepa Manoa wataluka waenda pamo na wandi mukaji. Wafika kwadi mwana-mulume’wa kamunena’mba: “Le abe ye mwana-mulume wesambanga na wami mukaji?” Nandi wamulondolola’mba: “I ami.” 12 Ebiya Manoa wanena’mba: “Binenwa byobe bifikidile! Le būmi bwa mwana bukekala bwa muswelo’ka, ne i mwingilo’ka wakengila?”+ 13 Penepa mwikeulu wa Yehova wanena Manoa amba: “Obe mukaji ufwaninwe kwilama ku bintu byonso byonamulombolanga.+ 14 Kafwaninwepo kudya kintu kyo-kyonso kitambile ku mañanza, kafwaninwepo kutoma vinyu nansha kintu kyo-kyonso kikolwañana,+ kadi kafwaninwepo kudya kintu kyo-kyonso kya disubi.+ Aye alame’tu bintu byonso byonamusoñanyanga.”

15 Ebiya Manoa wanena mwikeulu wa Yehova amba: “Shikata’po bidi tukulongolwele kana ka mbuji.”+ 16 Ino mwikeulu wa Yehova wanena Manoa amba: “Shi nshikate, nkisapo kudya byakudya byenu; ino shi musaka kulambula Yehova kyamulambu kisōkwe, mukokeja kulambula’kyo.” Manoa kadipo uyukile amba i mwikeulu wa Yehova. 17 Kupwa Manoa wanena mwikeulu wa Yehova amba: “Le dijina dyobe wi ani,+ mwanda wa tukulēmeke pasa kufikidila kinenwa kyobe?” 18 Inoko mwikeulu wa Yehova wamunena’mba: “Kyoipangwila dijina dyami i kika, byodidi dya kutendelwa?”

19 Kupwa Manoa wayata kana ka mbuji ne kyamulambu kya miseke walambula’byo Yehova pa dibwe. Ino Aye wadi ulonga bintu bitulumukwa papo Manoa ne wandi mukaji batala. 20 Padi pakanda lubimbi mūlu lutamba pa kisōkelo, mwikeulu wa Yehova nandi wakanda mu lubimbi lwadi lutamba pa kisōkelo’lwa papo Manoa ne wandi mukaji batala. Ponkapo bapona mapala abo pa nshi. 21 Mwikeulu wa Yehova kamwekēlepo monka ba Manoa ne wandi mukaji. Penepa Manoa wajingulula’mba i mwikeulu wa Yehova.+ 22 Kupwa Manoa wanena wandi mukaji amba: “Bine tusa kufwa, mwanda i Leza otwamona.”+ 23 Ino wandi mukaji wamunena’mba: “Shi Yehova wadi usaka kwitwipaya, kadipo wa kwitabija kyamulambu kisōkwe+ ne kyamulambu kya miseke ku makasa etu, kadi kadipo wa kwitulombola bino bintu byonso’bi, ne kadi kadipo wa kwitusapwila kintu nansha kimo mu bino.”

24 Kupwa mwana-mukaji wabutula mwana mwana-mulume wamwinika bu Samishoni;+ kadi padi penda patama mwanuke, Yehova wadi umwesela. 25 Mwenda mafuku mushipiditu wa Yehova washilula kumutonona+ mu Mahane-Dani,+ pa bukata bwa Zola ne Eshetaole.+