Ezekyele

45 “‘Shi mubaabanya ntanda bu bupyani,+ mukalambula kipindi kijila kya ntanda bu kyabuntu kudi Yehova.+ Kikekala kya maboko* 25 000 mu bula ne maboko 10 000 mu bunkimbwa.+ Kifuko kyayo kyonso* kikekala kipindi kijila. 2 Mu kino’ki mukekala kipindi kya kifuko kijila kya mitamba iná ya bula bumo, kya maboko 500 momu,+ maboko 500 momu,* kadi kikekala ne na maboko 50 a madyo ku mitamba yonso.+ 3 Mu kino kipimo, mukapima maboko 25 000 mu bula ne maboko 10 000 mu bunkimbwa, kadi muno’mu mukekala kipandulwe, kintu kijila nakampata. 4 Kikekala kipindi kijila kya ntanda kya babitobo,+ bengidi ba mu kipandulwe, bafwenanga mwanda wa kwingidila Yehova.+ Kikekala kifuko kya mobo abo ne kifuko kikola kya kipandulwe.

5 “‘Bene Levi, bengidi ba ku tempelo, bakekala na kipindi kya maboko 25 000 mu bula ne maboko 10 000 mu bunkimbwa,+ kadi bakekala ne na byumba bya kudīla’mo 20*+ bu kintu kyabo.

6 “‘Mukapāna kifuko kya maboko 25 000 mu bula (kidingakene na kyabuntu kijila) ne maboko 5 000 mu bunkimbwa bu kintu kya kibundi.+ Kikekala kya njibo yonso ya Isalela.

7 “‘Kadi mfumu nandi ukekala na ntanda ku mitamba yonso ibidi ya kyabuntu kijila ne ya kifuko kyabilwe kibundi. Ikekala kubwipi na kyabuntu kijila ne kintu kya kibundi. Ikekala mutamba wa kushika ne mutamba wa kutunduka. Bula bwayo, tamba ku mukalo wa kushika kutūla ku mukalo wa kutunduka bukadingakana na kipindi kimo kya kisaka.+ 8 Ino ntanda ikekala ke kintu kyandi mu Isalela. Bamfumu bami kebakasusulapo monka bantu bami,+ kadi bakapa njibo ya Isalela ntanda mungya bisaka byabo.’+

9 “Mfumu Mwinē Lupusa Lonso Yehova wanena namino’mba: ‘A bamfumu ba Isalela, mubapityija’byo kipimo!’

“‘Lekai lūma lwenu ne kususulañana, mulonge bilulame ne byoloke.+ Lekai kuyata kipyanwa kya bantu bami,’+ i Mfumu Mwinē Lupusa Lonso Yehova unena. 10 ‘Mukengidija bipimo bya bulēmi bibwane, kipimo kya efa* kibwane ne kipimo kya bate* kibwane.+ 11 Kukekala kipimo kitūngwe kya efa ne kipimo kya bate. Kipimo kya bate kikekala kya kipindi kimo kya pa bipindi dikumi bya homa,* kipimo kya efa nakyo kikekala kya kipindi kimo kya pa bipindi dikumi bya homa. Kipimo kya homa kikekala kipimo kya kupimina’po. 12 Shekele*+ imo ikekala na mangela* 20. Kadi mashekele 20 kubweja’ko mashekele 25 kubweja’ko mashekele 15 akekala mane* imo komudi.’

13 “‘Kyabuntu kyomukaleta i kino: ku homa ense wa ñano, mukaleta’ko kipindi kimo kya pa bipindi bisamba bya efa kadi ku homa ense wa mebele a buluba, mukaleta’ko kipindi kimo kya pa bipindi bisamba bya efa. 14 Mposo ya māni ikapimwa na kipimo kya bate. Bate i kipindi kimo kya pa bipindi dikumi bya kola,* kadi mabate dikumi i homa umo, mwanda mabate dikumi i homa umo. 15 Kadi ku luombe lwa bimunanwa bya Isalela, mu mikōko 200 mukaletwa mukōko umo. Ino’i ikekala ya kyamulambu kya miseke,+ kyamulambu kisōkwe kituntulu,+ ne bitapwa bya kipwano,+ mwanda wa kupūtyila bantu bubi,’+ i Mfumu Mwinē Lupusa Lonso Yehova unena.

16 “‘Bantu bonso ba ntanda’ya bakapa mfumu wa Isalela kino kyabuntu.+ 17 Ino mfumu ye ukekala na kiselwa kya byamulambu bisōkwe bituntulu,+ kyamulambu kya miseke,+ ne kyamulambu kya bitomibwa mu kitatyi kya masobo,+ makweji katenta, Masabato,+ ne masobo onso atūdilwe’ko mu njibo ya Isalela.+ Aye ye ukaleta kyamulambu kya bubi, kyamulambu kya miseke, kyamulambu kisōkwe kituntulu, ne bitapwa bya kipwano, mwanda wa kupūtyila njibo ya Isalela bubi.’

18 “Mfumu Mwinē Lupusa Lonso Yehova wanena namino amba: ‘Mu kweji mubajinji, difuku dibajinji dya kweji, ukayata ñombe mulume mwana wampikwa bulema wa mu luombe, kadi ukatōkeja kipandulwe ku bubi.+ 19 Kitobo ukayata’ko mashi amo a kyamulambu kya bubi ne kwiashinga ku ñunji ya tempelo,+ ku mafinko aná a mulomo ujokolokele kisōkelo, ne ku ñunji ya kibelo kya kipango kya munda. 20 Bino’bi ye byokalonga mu difuku dya busamba-bubidi dya kweji pa mwanda wa yewa ense ulonga bubi kwampikwa kusaka nansha kwampikwa kuyuka;+ kadi mukapūtyila tempelo bubi.+

21 “‘Mu kweji mubajinji, difuku dya 14 dya kweji, mukasoba masobo a Pashika.+ Mukate wampikwa kiyujo ukadibwa mu mafuku asamba-abidi.+ 22 Mu dine difuku’dya, mfumu ukaleta ñombe mulume mwana bu kyamulambu kya bubi pa mwanda wandi ne pa mwanda wa bantu bonso ba ntanda’ya.+ 23 Mu mafuku asamba-abidi a masobo, aye ukaleta bañombe balume bana bampikwa bulema basamba-babidi ne mikōko milume isamba-ibidi yampikwa bulema bu kyamulambu kisōkwe kituntulu kudi Yehova difuku ne difuku mu mafuku asamba-abidi,+ ne mbuji mulume difuku ne difuku bu kyamulambu kya bubi. 24 Ukaleta ne kyamulambu kya miseke kya efa umo ku ñombe ne ñombe mulume mwana ne efa umo ku mukōko ne mukōko mulume ne hina* umo wa māni ku efa ne efa.

25 “‘Mu kweji wa busamba-bubidi, difuku dya 15 dya kweji, mu mafuku asamba-abidi a masobo,+ ukaleta kyamulambu kya bubi, kyamulambu kisōkwe kituntulu, kyamulambu kya miseke, ne māni, byonso bya muswelo umo.’”