Mwendele Mako

6 Watalukile kokwa, waiya mu yabo ntanda,+ bandi bana ba bwanga nabo bamulonda. 2 Penepo dya Sabato pa kufika, washilula kufundija mu shinankonka, ne bantu bavule badi bateja batendela, kebeipangula’mba: “Le uno muntu wamwene bino’bi kwepi?+ Kadi i kika kyapedilwe tuno tunangu ne kyalongela bino bilongwa bya bukomo?+ 3 Le ke ayepo sendwe wa mbao,+ mwanā Madia+ kadi mwanabo na Yakoba,+ Yosefa, Yudasa, ne Shimona?+ Ne banababo bana-bakaji mwene tudi nabo muno?” Penepo bashilula kukukala pa mwanda wandi. 4 Ino Yesu webanena monka’mba: “Mupolofeto ulēmekwanga konso, ino kalēmekwangapo’nka mu yabo ntanda ne mu babutule bandi ne mu njibo yandi aye mwine.”+ 5 O mwanda kabwenyepo kulonga’mo kilongwa kya bukomo nansha kimo, poso’nka kutenteka makasa babela bamobamo ne kwibabelula. 6 Bine, watulumukile mwanda kebadipo na lwitabijo. Ino wadi wenda koku ne koku mu bibundi bya kubwipi kubwipi, wenda ufundija.+

7 Penepa waita Ba Dikumi ne Babidi, waanza kwibatuma babidi babidi,+ webapa lupusa pa mishipiditu ya disubi.+ 8 Kadi, webakoma’mba kebakasela kintu nansha kimo mu lwendo—nansha mukate, nansha mufuko wa mpao, nansha lupeto* mu mikaba yabo+—poso’nka mukombo kete, 9 ino bavwale bikwabilo kadi kebakivwala bivwalwa bibidi.* 10 Webanena monka’mba: “Konso komutwela mu njibo, shikatai’mo enka ne byomukataluka pa kifuko’pa.+ 11 Kadi kifuko kyonso kyobakapela kwimutambula nansha kwimwivwana, pa kutamba’ko, kūkulai biloba bya mu mayo enu ke bukamoni kobadi.”+ 12 Penepo baenda kebasapula’mba bantu besāse,+ 13 kadi badi bapanga bandemona bavule+ ne kufukanya babela bavule māni ne kwibabelula.

14 Penepo Mulopwe Heloda waivwene’kyo, mwanda dijina dya Yesu dyatumbile, kadi bantu badi banena’mba: “Yoano Umbatyiji wasanguka mu bafwe, o mwanda ulonga bilongwa bya bukomo.”+ 15 Ino bakwabo badi banena’mba: “I Ediya.” Bangi nabo amba: “I mupolofeto pamo bwa umo wa mu bapolofeto ba pa kala.”+ 16 Ino Heloda pawaivwene’o, wanena’mba: “Uno Yoano onatēteje mutwe, ye aye wasanguka.” 17 Ke-muntu Heloda aye mwine watumine bantu bakakwate Yoano bamukute mu kifungo pa mwanda wa Helodyasa, mukaja mwanabo Fidipa, waasongele.+ 18 Mwanda Yoano wadi unenanga Heloda amba: “I kijila abe kuyata mukaja mwanenu.”+ 19 Penepo Helodyasa wamukwatyilwa kīji kadi wadi usaka kumwipaya ino byadi bimukomena. 20 Mwanda Heloda wadi utyina Yoano, pa kuyuka’mba i muntu moloke kadi ujila,+ kadi wadi umulama biyampe. Pa kupwa kumuteja, wadi ukomenwa kya kulonga, penepo kamuteje’nka kumuteja na nsangaji.

21 Penepa difuku difwaninwe dyafika patēkele Heloda mu difuku dya kubutulwa kwandi+ bidibwa bya kyolwa bya bandi bengidi bakatampe ba bulēme ne bakulu ba basola ne bana-balume ba ntumbo ba mu Ngadilea.+ 22 Ponkapo mwanā Helodyasa mwana-mukaji watwelele’mo waja, wasangaja Heloda ne boba badi badya nandi.* Mulopwe wanena nsongwakaji’wa amba: “Nombe kyonso kyowakasaka, nami nkakupa’kyo.” 23 Eyo, wamutyipila ne mutyipo amba: “Kintu kyonso kyowakanomba, nkakupa’kyo, nansha ke kipindi kya bulopwe bwami.” 24 Penepo watamba wakepangula inandi amba: “Lelo nombe kika?” Aye amba: “Mutwe wa Yoano Umbatyiji.” 25 Ponka na ponka watwela lubilo mudi mulopwe kamulombe amba: “Nsaka umpe’nka pano mutwe wa Yoano Mubatyiji pa nsāni.”+ 26 Nansha kino byokyamufītyije mutyima bininge, mulopwe kasakilepo kupela kumupa byaalombele, mwanda wa mityipo yaatyipīle ne betwa bandi.* 27 Penepo mulopwe watuma ponka na ponka sola mulami ne kumusomanya akalete mutwe wa Yoano. Nandi waenda wakamutēta mutwe mu kifungo, 28 waleta mutwe pa nsāni, wapa’o nsongwakaji, nsongwakaji nandi wakapa’o inandi. 29 Bandi bana ba bwanga pa kwivwana nabya, baiya kusela umbidi wandi bakeulādika mu kibundu.*

30 Batumibwa baela Yesu mu bukata kebamulombola bintu byonso byobalongele ne byobafundije.+ 31 Nandi webanena’mba: “Iyai kufula kwa bunka bwenu mukōkolokwe’ko bidi.”+ Mwanda kwadi bantu bavule badi bāya bakwabo benda, kadi kebadipo nansha na kyaba kya kutūja badye byakudya. 32 Byobiya baikila mu bwato kebenda kufula bakekale kwa bunka bwabo.+ 33 Ino bantu bebamwene pobadi benda, kadi bavule bayuka’o, penepo ba mu bibundi byonso baenda lubilo lwa nshi, bebabadikidila kufika’ko. 34 Aye pa kwabuka, wamona kibumbo kikatampe, webakwatyilwa lusa+ mwanda badi pamo bwa mikōko yampikwa mukumbi.+ Ebiya washilula kwibafundija bintu bivule.+

35 Inoko nsá byoyadi ke mipite bininge, bandi bana ba bwanga nabo baiya kwadi kebanena’mba: “Kuno i kufula kadi nsá ke myende bininge.+ 36 Wibatalule bende mu madimi ne mu bibundi bya pabwipi bakepotele byakudya.”+ 37 Nandi webatentulula’mba: “Mwibapei byakudya.” Nabo bamunena’mba: “Le twende tukapote mikate ya ndenadi* 200 ne kupa’yo bantu badye?”+ 38 Webanena’mba: “Le banwe mudi na mikate inga? Endai bidi mukatale!” Pa kupwa kujingulula, banena’mba: “I itano, ne twita’po twa lui tubidi.”+ 39 Penepa walombola bantu bonso bashikate bisumpi bisumpi pa biyombo bibishi.+ 40 Nabo bashikata mu bisumpi bya bantu katwa katwa ne bya bantu makumi atano atano. 41 Byobiya wayata mikate itano ne twita twa lui tubidi, watala mūlu waesela dyese.+ Penepo watyumuna mikate’ya kape’yo bana ba bwanga’mba nabo batūdile’yo bantu, kadi waabila bonso twita twa lui tubidi’twa. 42 Ponkapo bonso badya ne kwikuta baikuta, 43 kadi baboya’po bilala 12 biyule bā bya bipindi byashele’ko, kutentekela’po ne mwita wa lui.+ 44 Boba badile mikate badi bana-balume 5 000.

45 Penepa, ne kwija kwine mpika, waikija bandi bana ba bwanga mu bwato babadikile bobwa bukila bwa Betesaida, aye patalula bidi kibumbo.+ 46 Ino aye pa kupwa kwibashadika, waenda ku lūlu kukalombela.+ 47 Kyolwa pa kōloba, bwato papo bwadi kebudi pa bukata bwa dijiba, ino aye wadi bunka ku ntanda.+ 48 Ebiya aye pa kwibamona balwa na kuvua, mwanda kivula kyadi kīya mobenda, waiya kobadi ku kilo kya buná kya bufuku,* ulandala pa dijiba; ino walonga na aye wibapita.* 49 Abo pa kumumona ulandala pa dijiba, balanga’mba: “I kimonwa!” Penepo kebaila na diwi dikatampe. 50 Mwanda abo bonso bamumwene kadi bavutakanibwa mutyima. Ino ponka na ponka wesamba nabo kanena’mba: “Kankamanai! I amiwa; kemwakikwatwai moyo.”+ 51 Byobiya waikila mu bwato mobadi, ne kivula kyatalala. Ponkapo batendela bikatampe mpata, 52 mwanda kebaivwanijepo buluji bwa mikate, ino mityima yabo yadi ikilēma pa kwivwana.

53 Abo pa kukija kufika ku ntanda, baiya ku Ngenesaleta, bashīka bwato dya kubwipi.+ 54 Ino abo pa kwabuka’tu mu bwato, bantu bamuyuka. 55 Penepo baenda lubilo pi na pi mu ntanda yonso’ya bashilula kusela boba babela pa tubitanda kebenda nabo kokwa kobadi bevwana’mba ye kwadi. 56 Kadi monso mwaadi utwela, mu bibundi bityetye nansha bikatampe ne mu madimi, badi batūla babela mu mansoko, kadi badi bamwisāshila’mba batenge’tu nansha ku manyamvwa a kivwalwa kyandi kya pangala.+ Ne bonso badi batenga’ko badi bakoma.