Danyele

6 Dadiusa wamwene amba i biyampe kutūla’ko babilolo 120 mu bulopwe bonso.+ 2 Pangala pabo padi bengidi bakatampe ba bulēme basatu, umo wadi Danyele;+ kadi babilolo+ badi bebatūdila myanda, kutyina’mba mulopwe wakajimija bintu. 3 Danyele weshiyañanya na bengidi bakwabo bakatampe ba bulēme ne babilolo, mwanda wadi na mushipiditu+ utulumukwa, kadi mulopwe wadi usaka kumukandija mu bulopwe bonso.

4 Mu kine kitatyi’kya, bengidi bakatampe ba bulēme ne babilolo badi bakimba bubinga bwa kusambila Danyele mu myanda ya ntanda,* ino kebatenepo bubinga bwa kumusambila nansha kabubi, mwanda wadi muntu ukulupilwa, kadi mwadi kemwatenwepo kalengwa nansha kabubi. 5 Ebiya bano bantu banena’mba: “Mudi uno Danyele ketusapo kutana’mo bubinga nansha bumo bwa kumusambila, poso tumutanina’bo mu kijila kya Leza wandi.”+

6 Penepo bano bengidi bakatampe ba bulēme ne babilolo baenda kibumbo kudi mulopwe, kebamunena’mba: “A Mulopwe Dadiusa, ikala’ko nyeke. 7 Bengidi ba bulēme bonso ba bulopwe, bansenga, babilolo, bemaniji bakatampe ba bulopwe, ne bambikavu abakale ñeni pamo ya kutūla’ko lubila lwa mulopwe ne kukomeja kijila kya kukankaja,* amba mu mafuku 30, muntu ense ulombela kudi leza nansha kudi muntu yense pa kyaba kya kulombela kudi abe mulopwe, nankyo ukelwa mu kīna kya bantambo.+ 8 Shi ke pano, abe mulopwe, tūla’ko lubila utūle’po ne kiyukeno,+ kutyina’mba lwakashinta, mwendele kijila kya bene Mede ne bene Peleshia, kekibwanyapo kwipaibwa.”+

9 Penepo Mulopwe Dadiusa watūla kiyukeno pa lubila ne pa kijila kya kukankaja.

10 Ino Danyele uyuka’tu amba pa lubila pabatūlwa kiyukeno, waenda ku njibo yandi, yadi na kyumba kya pangala kyadi na madidisha adi pululu atadidile ku Yelusalema.+ Kadi misunsa isatu ku difuku wadi ufukata mu manwi kalombela ne kutendela ku meso a Leza wandi, monka mwaadi ulongelanga dibajinji. 11 Mu kine kitatyi’kya, bano bana-balume batwela, batana Danyele ulombela ne kuzenza Leza wandi amutōkelwe mutyima.

12 Penepo bafwena mulopwe, bamuvuluja myanda ya kijila kya kukankaja kya bulopwe amba: “Mwene watūdile kiyukeno pa kijila kya kukankaja’mba mu mafuku 30 muntu ense ulombela kudi leza nansha kudi muntu yense pa kyaba kya kulombela kudi abe mulopwe, ukelwa mu kīna kya bantambo?” Mulopwe walondolola’mba: “Wao mwanda i mwitabijibwe biyampe mwendele kijila kya bene Mede ne bene Peleshia kekibwanyapo kwipaibwa.”+ 13 Ponkapo balombola mulopwe amba: “Danyele, wa mu misungi ya Yuda,+ kakulēmekelepo abe mulopwe, nansha ke kijila kya kukankaja kyowatūdile’po kiyukeno, ino ulombelanga misunsa isatu ku difuku.”+ 14 Mulopwe pa kwivwana kino, wajingwa mutyima bininge, kalangulukila pa muswelo wa kukūla Danyele; walonga bukomo bwandi bonso bwa kumupandija kufika ne byaponene dyuba. 15 Ku mfulo, bano bana-balume baenda kibumbo kudi mulopwe, kebanena mulopwe amba: “A mulopwe, yuka’mba kijila kya bene Mede ne bene Peleshia kinena’mba kijila kyonso kya kukankaja nansha lubila bitūdile’ko mulopwe kebibwanyapo kushintwa.”+

16 Penepo mulopwe wasoñanya, ebiya basela Danyele bamwela mu kīna kya bantambo.+ Mulopwe wanena Danyele amba: “Leza obe oingidilanga kitatyi kyonso usa kukukūla.” 17 Kupwa basela dibwe, beditūla ku kibelo* kya kīna, mulopwe wakoma’po kashé na lumpete lwandi lwa kashé ne na lumpete lwa kashé lwa ba bulēme bandi, kutyina’mba kwakashintwa kintu pa mwanda wa Danyele.

18 Penepo mulopwe waenda ku njibo yandi mikatakata. Washikilwa na nzala bufuku bonso kadi wapela kwisangaja,* wakomenwa ne kulāla.* 19 Ku mfulo, mulopwe wabūka lubanga bwē, waenda bukidi ku kīna kya bantambo. 20 Aye pa kufwena ku kīna, waita Danyele na diwi dya bulanda. Mulopwe waipangula Danyele amba: “A Danyele, mwingidi wa Leza mūmi, le Leza oingidilanga kitatyi kyonso wabwanya kukukūla ku bantambo?” 21 Ponkapo Danyele wanena mulopwe amba: “A mulopwe, ikala’ko nyeke. 22 Leza wami watumenga mwikeulu wandi, wamume kyakanwa kya bantambo,+ kebanongelepo kibi,+ mwanda nadi wampikwa mambo ku meso andi; kadi nkikulongelepo kibi abe mulopwe.”

23 Mulopwe wasangala bininge, wasoñanya balupule Danyele mu kīna. Danyele pa kwabuka mu kīna, kalongelwepo kibi nansha kimo, mwanda wakulupile mudi Leza wandi.+

24 Penepo mulopwe wasoñanya, ebiya basela bantu basambīle Danyele, bebela mu kīna kya bantambo, ne babo bana ne babo bakaji bene. Abo kebafikile ne panshi pa kīna pene, bantambo bebakwata, balalakanya mikupa yabo yonso.+

25 Penepo Mulopwe Dadiusa walembela bantu bonso, mizo, ne ndimi bashikete konsokonso pa ntanda+ amba: “Ndoe mivule ikale nenu! 26 Nasoñanya’mba mu bufumu bonso bwa bulopwe bwami, bantu bafwaninwe kuzakala ku meso a Leza wa Danyele.+ Mwanda aye i Leza mūmi kadi udi’ko nyeke. Bulopwe bwandi kebukonakanibwapo, kadi buledi* bwandi i bwa nyeke.+ 27 Aye ukūlanga,+ upandijanga, ne kulonga biyukeno ne bintu bya kutendelwa mūlu ne pano pa ntanda,+ mwanda wakūla Danyele ku makufi a bantambo.”

28 Penepo uno Danyele waikala biyampe mu bulopwe bwa Dadiusa+ ne mu bulopwe bwa Kilusa mwine Peleshia.+