Ezekyele

6 “‘Ino shi mulami wamone kipete kīya, ino kavumijepo lusengo+ kadi bantu kebadyumwinwepo, ebiya kipete kibaiya kibasela būmi bwa* muntu umo mu bukata mwabo, yao muntu ukafwa mwanda wa kilubo kyandi, ino ami nkalandula mulami mashi andi.’*+

7 “Ino abe, a mwanā muntu, nakutūla bu mulami ku njibo ya Isalela; kadi shi ubaivwana kinenwa kya mu kyakanwa kyami, ufwaninwe kundyumwina’bo.+ 8 Shi nanena muntu mubi amba, ‘A mubi, bine ukafwa!’+ ino abe kwisamba mpika mwanda wa kudyumuna mubi ashinte mwiendelejo wandi, aye ukafwa bu muntu mubi pa mwanda wa kilubo kyandi,+ ino ami nkakulandula mashi andi. 9 Inoko shi ubadyumuna muntu mubi amba aleke dishinda dyandi, ino wapele kushinta mwiendelejo wandi, aye ukafwa pa mwanda wa kilubo kyandi,+ ino abe ukapandija būmi bobe* binebine.+

10 “Kadi abe, a mwanā muntu, sapwila njibo ya Isalela amba, ‘Mubanena’mba: “Butomboki bwetu ne bubi bwetu bubetulēmena bininge, bubetulengeja tushinike;+ le penepo tukashala bōmi namani?”’+ 11 Wibalombole amba, “‘Bine ne byondi mūmi,” i Mfumu Mwinē Lupusa Lonso Yehova unena, “Ami nkisangelangapo lufu lwa mubi,+ poso amba muntu mubi ashinte dishinda dyandi+ amba ashale mūmi.+ Jokai, jokai ku mashinda+ enu mabi, mwanda le kyomufwila i kika, a njibo ya Isalela?”’+

12 “Kadi abe, a mwanā muntu, lombola bana ba bantu bobe amba, ‘Boloke bwa muntu moloke kebukamupandijapo shi watomboka;+ kadi bubi bwa muntu mubi kebukamukukajapo shi waleka bubi bwandi;+ kadi yewa ense moloke kakabwanyapo kushala mūmi pa mwanda wa boloke bwandi difuku dyalonga bubi.+ 13 Shi nanena moloke amba: “Bine abe ukashala mūmi,” ino aye wakulupila boloke bwandi kalonga bibi,*+ i kutupu kilongwa kyandi nansha kimo kya boloke kikavulukwa, ino ukafwila bubi bwalonga.+

14 “‘Ino shi nanena mubi amba: “Bine abe ukafwa,” inoko aye waleka bubi bwandi kalonga bilulame ne byoloke,+ 15 kadi mubi’wa wajokeja kyeya+ ne kulubula byaanyoñomwene,+ kanangila mu bitungo bya būmi pa kuleka kulonga bibi, bine aye ukashala mūmi.+ Kakafupo. 16 I kutupu bubi nansha bumo bwalongele bukamulambikwa.*+ Bine ukashala mūmi mwanda walonga bilulame ne byoloke.’+

17 “Ino bantu bobe abanena’mba, ‘Dishinda dya Yehova i dikondame,’ adyo papo dishinda dyabo dyo dikondame.

18 “Shi muntu moloke waleka boloke bwandi kalonga bibi, ufwaninwe kufwa pa mwanda wabyo.+ 19 Ino shi muntu mubi waleka bubi bwandi kalonga bilulame ne byoloke, ukashala mūmi pa kulonga namino.+

20 “Ino mubanena’mba: ‘Dishinda dya Yehova i dikondame.’+ Nkatyibila muntu ense mambo mu bukata mwenu, mwendele mashinda andi, a njibo ya Isalela.”

21 Mwenda mafuku, mu mwaka wa 12 wa bu misungi bwetu, kweji wa dikumi, mu difuku dya butano dya kweji, muntu umo wapandile ku Yelusalema waiya kondi+ kanena’mba: “Kibundi kibapone!”+

22 Penepo kyolwa kumeso kwa yewa muntu wapandile kwiya, kuboko kwa Yehova kwaiya pondi, washitula kyakanwa kyami kumeso kwa yewa muntu kwiya lubanga kondi. Ebiya kyakanwa kyami kyashituka, bumāma bwami bwapwa.+

23 Penepo kinenwa kya Yehova kyaiya kondi amba: 24 “Mwanā muntu, bekadi ba ano masala+ banenanga pa mwanda wa ntanda ya Isalela amba, ‘Abalahama wadi’tu muntu umo, ino wayete ino ntanda ke yandi.+ Ino batwe twi bangi; bine ntanda ibetupebwa ke yetu.’

25 “O mwanda wibasapwile amba, ‘Mfumu Mwinē Lupusa Lonso Yehova wanena namino amba: “Mudyanga byakudya na mashi,+ kadi mutulwilanga meso enu ku bilezaleza byenu bya mukenye,* ne kadi mumwañanga’nka kumwanga mashi.+ Le penepo kyomukayatyila ntanda ke yenu i kika? 26 Mwikulupile kipete kyenu,+ muloñanga bilongwa bya munyanji, kadi muntu ense mu bukata mwenu usubijanga mukaja mukwabo.+ Le penepo kyomukayatyila ntanda ke yenu i kika?”’+

27 “Ukebanena namino amba, ‘Mfumu Mwinē Lupusa Lonso Yehova wanena namino amba: “Bine ne byondi mūmi, boba bashikete mu masala bakapona ku kipete; boba bashikete mu ntanda, nkebapāna bu byakudya ku banyema ba ntanda; kadi boba bashikete mu bifuko bikomejibwe ne mu mitá bakafwa misongo.+ 28 Nkalamuna ntanda ke mu ntanda mutuputupu musalwe bininge,+ mitatulo yayo ya kibengo ikafudijibwa, kadi ngulu ya Isalela ikasalwa,+ kwampikwa muntu nansha umo upita’mo. 29 Penepo bakayuka’mba ami ne Yehova ponkalamuna ntanda ke mu ntanda mutuputupu musalwe bininge+ pa mwanda wa bintu byonso bya munyanji byobalonga.”’+

30 “Ino abe, a mwanā muntu, bantu bobe besambanga myanda yobe abo bene na bene kubwipi na mumbu ne pa bibelo bya mobo.+ Banenanga abo bene na bene, muntu ne muntu na mwanabo amba, ‘Iyai, twivwane kinenwa kitamba kudi Yehova.’ 31 Bakāya kibumbo kushikata ku meso obe bwa bantu bami; kadi bakevwana binenwa byobe, ino kebakalonda’byopo.+ Mwanda bakufukulanga* na kyakanwa kyabo ino mutyima wabo ukomwa meso kumwena mu bya budimbidimbi. 32 Tala! Kobadi abe udi pamo bwa lwimbo lwa bukena, lwimbwa na diwi diyampe ne kombwa na bwino na kyombanwa kya myonji. Bakevwana binenwa byobe, ino i kutupu nansha umo ukebilonda. 33 Kadi shi bibafikidila—ne i bine bikafikidila—bakayuka’mba mupolofeto wadi mu bukata mwabo.”+